Lal Sutpui Vuan

Lal Sutpui Vuan

(Rom 6:16; I Kor.7:22)

            Hmanlai kan pi leh pute hunlai khan Lal annei thin a, anhuam chhungah na na na chuan thutawp neitu leh siamtu anni. Ziak in dan leh hrai nei thlip thleplo mahse tihdan phung leh hnam dan tam tak vawnnun annei thung a, Lal tihtur leh mipui tih tur pawh felfai tak a zam a ni. Mahse, chutihrualin thutawp neitu chu Lal ani reng tho.

            Hmanlai mizote kha indo thin, mi lu la thin an ni a. Khua leh khua in run atam avangin mi huaisen an pawimawh hle a, ralthat hnem chu Thihhnu piahlam (Pialral) ah pawh nuamsa tak a khawsa tur a ngaih anni. Mahse, tualthat (Ralthat nilo) an ngaihdan erawh chu a dang daih. Tual thah chu sawiloh ‘Thenawmte do aiin khawsarih do pawh athlanawm zawk’ anlo ti hial thin. Tin, tualthah chu thianglo anga ngaih a ni a, a thattu thlahte thleng a vanduaina/anchhia in a umzui an ring. Chuvangin, nupui/pasal chungchang ah pawh an inchhui tel hial thin.

            Mahse, mihring khawsak ho reng rengna hmunah hian in ngeih tlang tak a awm kumkhua a theih loh a, intihthinrim chang emaw insual chang emaw a awm thin. Tin, chutiang hun kherlo ah pawh nise tum luih vang emaw tihpalh vang a tualthah theih a ni. Miin tual athah chuan achung a anchhia tla tur mai bakah a thah a chhungte khan remchang anhmuh phawt chuan an that ve thiang a ni, phuba lak a thiang tihna anih chu! Mahse, kan pi leh pu te khan dan tha tak mai anlo nei hlauh mai a, miin tual lo that palh se emaw tilui pawh nise him dam tak a awm ala duh anih chuan a rang thei ang berin ‘Lal sutpui’ avuan anga, Lal in a humhim tawh ang. Lalsutpui avawn hnu ah chuan a chungah phuba lak athiang tawhlo a, atinatu chuan lal pawi a khawih tihna alo ni tawh zawk thin.

            Mahse, he ngaihdamna hi athlawn hauhlo, Lal sutpui vuantu chu amah leh athlahte thlengin Lalbawi anni kumkhua tawh thung dawn a ni. Lal thlazar hnuaiah Lal rawng a bawl tawh ang a, a chung a phuba lak tumtute lak ata himna chu a zalenna hmangin a leichhawng ta a ni.

            Kan sualna zawng zawngte kha thihpui tham vek anni, mahse, Lal sutpui vuan tawhtute tan chuan kha sualna khan thihna a thlen thei tawhlo. Lal ta kan ni tawh a, kumkhua a Pathian rawng bawl tawh tur kan ni. Zalen tak a duh zawng leh nuam tih zawng anga awm turin zalenna kan nei tawhlo a, kan duhthlanna te chu Pathian hnenah kan hlan tawh a ni. Sual avanga chatuan thihna changtur khan Chhandam anih nan pawisa a pelo a, tawngkam thiam takin Pathian a dawr heklo, Lal sutpui vawn mai chu  Chatuan nunna ani tih ahriat avangin a vuan mai a ni, abak chu Lal duhdan a awm zui kha ani tawh mai. Kristiante hi Pathian sutpui vuantute kan ni e. Kumthar ah chuan Lal Sutpui vuantute kan nih ang ngeiin I nung teh  ang u.