Beiseina

Beiseina

         

          Vanduaina leh harsatna ten a siruklaa min han tlakbuak tak tak hi chuan ‘Pathian hi khawnge a awm le..?’ tih mai awl tak a ni \hin. Kohhran inzirtirnaah leh kan Bible-ah ngei pawh Pathian inpuanna, thlamuantu leh \anpui vartu hnai reng anih zia sawi kur dup thin mah ila, manganna chhumpuiin min han chim \ak \ak a, kan nun leh kan chhungkua a han suasam meuh chuan Pathian \anpuina beisei chu sawi loh, ‘Pathian pawh hi a awm tak tak em le? Mihringte zeldin chawp mai mai a ni lo maw..?’ tih inzawh ruk neuh neuh chang a awm fo \hin. Chutih rualin mihring theihna leh thiamna lo sang chho zel hian Pathian kan mamawhna min paihthlak sak ve hret hret thei tho mai.  

‘Pathian hi a thi tawh maw?!’

          Friedrich Nietzsche (1844 –1900), German mi thiam pakhat chuan kum 1932 khan, “Pathian hi a thi tawh a, kan that daih tawh a ni” a lo ti tawh a. Chu chuan Kristian khawvelah ngaihdan a tiphir nasa em em a, mi tam tak Pathian rinna a pheh sak nasa hle a ni. Nietzsche-a sawi tum hi mi thenkhatten an hresual fova, Pathian hi mihringte anga thi tawh tak tak a tihna emaw an ti thin. Mahse a ni lo. Nietzsche-a sawi tum tak zawk chu ‘Europe rama sakhaw thurinte leh puithunate hian mi rilruah awmzia a nei tawh lova, kan thil thlir dante hi kan rilru puthmang atan a tlak tawh love.’a tihna zawk a ni.

‘Pathian aiah Mihring’…

          Kum zabi 19-na a lo her chhuah meuh chuan mihring finna leh thiamna a pung nasa em em a, Science leh technology lamah hmasawnna nasa tak a rawn thleng a, chuvang chuan mihringte hi Pathian tel lo paw’n kan nung thei a ni an ti ta hial a. Mihring thiltihtheihna lam an dah lian a, Pathian leh mihring an \henhrang a, van lam aiin lei lam an thlir a, chu chuan sakhuana thil pawh rilru lama inzirtirna leh inkaihhruaina lam thil sathliahah an chhuah bawk a ni. Chu achhap-ah Indopui II-na rawn thlengin Pathian hmangaihna leh Kristian nundan tha inzirtirna, Kohhranin a lo neih \hin chu a rawn phet a, Juda nuai chuang, khawngaihna tel miah lova tihhlum (Holocaust) leh sawisak avangte khan Pathian rorelna leh thiltihtheihna, hmasang ata tawh Kristiante inzirtirna chuan rinhlelh a hlawh zo ta a ni. ‘Pathian a thi tawh’ titute hian Pathian chu awm tawh lo angin emaw he khawvela inrawlh tawh lo angah an ngai thin. Chuvang chuan, Pathian tel lovin he khawvelah Kristian tha tak nih theihna kawng an zawng a, mihring chuan a nun kal chho zelah a laimu a chang a ni.  

          He ngaihdanin a tarlan chian em em chu ‘mihring hi Pathian tel lovin a awm thei a, Pathian kan rinna leh a chunga rilru kan nghah \hinna zawng zawng kan lak kian hunah chuan mihring finna leh theihna chu nasa takin chherchhoh leh tih puitlinin a awm dawn a ni’ tih a ni.

‘Tawp chin nei Mihring’…

          Mahse, mihring chuan thlen theih chin a nei tlat..! A ngaihtuahna zawng zawng hmanga a beih pawhin hriat loh chin a nei a, a tha leh zung zawng zawng nen a \an pawhin tihtheih loh a nei tih a hmuchhuak zel bawk si. A beih nasat poh leh mihring nep zia a hmuchhuak tam ting mai a ni. Engemaw chen chu ama tha chakna leh thluak hmangin kal thin mah se, a lungawina khawp hlawh chhuak tur erawh chuan a thlen theih chin a tawi si a. A chungah thil duhawm lo tak tak thlen chang a awm a, duhthlang thei ni ngat sela chuan Vanduaina tih hi a-rim a-ra pawh a hre ngai tawh lo ang. Thihna te’n a nunah thla an zar a, nui reng tura inring khan \ah hawm hawm chang a nei tam zawk a. A mit hmuh leh a beng hriata thil thlengte chu a thiamna leh finna hmangin hrilhfiah theih chang nei mah se, a ngaihna hre lova indawm kun tlawk tlawk chang a tawng zawk si thin a.

          Chuvang chuan mihring chu ‘mi beidawng’ a nih loh nan ‘Beiseina’ a neih a ngai ta a, beiseina reng reng nei tawh lote hi ‘mi beidawng’ chu an ni si a.  A Beiseina neih chuan a hma-ah lungawina kim a awm ngei a ni tih a hriattir anga, tluk leh tlak fawm chung paw’n chu thil chang tur chuan a theihna leh finna a hmang tawh zawk dawn a ni. Mahse, a thil beisei chu a dik a, a rintlak a, a lo thleng ngei dawn a ni tih a hriat chian loh vaih chuan thui kal lovin ‘Beidawnna ruamah’ a tla lut tho tho dawn a ni.

‘Beiseina nung neitu Kristian’…

          Beiseina hrim hrim hi mihring chuan kan nei a, mahse kan thil beisei leh kan beisei inghahna azirin a inang lo thei hle a ni. Beiseina dik lo leh rintlak lo neite tan chuan ‘Pathian hi a thi’ tawh a, an beiseina pawh mihring leh a thiltihah a innghat \hin, mahse, tawp chin a nei tlat si. Suangtuahna khawvelah a chengin, a duh zawng leh it zawng a beisei \hin, chumi nei tur chuan mihring tha chakna te, thiltihtheihna te leh sum leh pai thlengin an hmang \hin.

          Kristiante beiseina erawh chu ‘Rinna’ nen a kalkawp tlat a, a rin miau avangin a beiseiah a chiang bawk \hin. Chu chuan eng ang dinhmun atang pawhin hmalam-ah ke a chhehtir ngei ngei a ni. Kristian nun hrim hrim hi beiseinaa khat a ni a, Nun-Krista hi Beiseina pum chhuak liau liau a ni bawk. Pathian thu-ah hian beisei tur awm ta miah lo se emaw, kan Bible hi lehkhabu naran ve mai ni ta sela chuan mi azawnga mi khawngaihthlakawm ber kan ni mai awm e.

          Ringtu beiseina erawh chu Lal Isua, thihna ata tho leh hnena innghat tlat a nih avangin a nung a, mihring thiltih a tel ve miau loh avangin tawp chin a nei lo a ni. Ringtu chuan rinna nen a beiseina a kaldun tir a, chuvang chuan a beiseiah a innghat thlap a, hmuhtheih lam nilovin hmuhtheih loh lam a thlir zawk a ni.

‘Ka tlantu chu a nung tih ka hria’…

          Lal Isua kha thlan a\ang khan tho leh ta lo se, zalh hlen ni tasela chuan Kristiante beisei hi engmah lo mai a ni ang a, beiseina beidawn thlak tak a ni ngei bawk ang. Mahse, Thlarau Thianghlim puihna azarah Ringtu chuan a beisei chu a nung a ni tih rinnain a hria a, Lal Isua thuthiam zawng zawngte kha a la rawn thleng dik ngei dawn tih a hriat bawk avangin beisei takin chu hun chu a nghak zawk a ni.

          Thuthlung hluia zawlneite sawi tam ber pakhat chu ‘Pathian ram beiseina’ kha a ni. Chu beiseina chuan Israel fate pawh kha a tithlamuang a, nghakhlel takin chhuan tam tak chhung an lo thlir tawh a ni. Thuthlung thar hun a rawn thleng a, chu chuan Lal Isua thawhlehna chu Israel fate beisei em em tihhlawhtlinna a ni tih a rawn tilang ta a ni (TT.2:26). Mahse, Israel fate chuan an pawm thei tlat lo, chuvang chuan Jentailte chuan Beiseina thar an neih phah ta zawk a, ‘ka tlantu chu a nung tih ka hria.’ tiin beiseina chu an kalpui ta zawk a ni. Israel faten an pawm loh chhan kha eng dang a ni lo, an beisei kha a dika, mahse an beisei dan erawh a dik ta lo a ni.

A hmawrbawkna’n…

          Mizote hian kum 100 chuang Kristianna hi kan lo hmelhriat ve ta a, mihring kum anga chhut chuan puitling \hankin rual zet chu a ni ve tawh awm e. Kristian dangte zingah rau rau pawh Vanram beiseina nei lian em em, Lal Isua lo kallehna pawh beisei nasa berte zing ami kan ni ve ngei chuan a rinawm. Kan Hla neih ho hi han en ila, ‘Vanram ngaih hla’ a \hahnem viau reng a ni.

          Mahse, kan nundan hi bihchian chuan Beiseina nung hi kan nei tak tak em le? A kum tela mahni intihlum kan thahnem telh telh maite hi ngaihtuah chian a va hun tawh em!! Pathian kan lo beisei dante hi a dik tawk reng em le? Lal Isua kan beiseina hian Pathian thuawihnaah te, chhelnaah te leh rinawmnaah te min hruai lut em? Nge keimahni peih chin tawkah hian kan lo rek bung \hin zawk le..? Mihring mihrinnaa fel hi a tha a, mihring finna te leh thiamna, changkanna te pawh hi kan mamawh chu a ni ngei mai, mahse Pathian thu aia kan dah hmasak chhung chuan ‘ Beiseina nung’ nei lo kan ni anga, Lal Isuaah kan innghat lo tihna a ni bawk ang.