Rawngbawlna: Lal Isua atangin

Rawngbawlna hlawhtling – Mimal inpekna leh Pathian hnathawh.

Ex.3:11,12; Jona 3:1-5;Mt. 28:16-20

“Kha tia Isua a thawhleh hnu, Vana a lawn chhoh khan Vantirkoh Gabriel-a hian Vanram kawt chhuahah  a lo hmuak a, Lal Isuan a tihtur a zuk hlen tak avang khan a lo lawm ve em em a, Lal Isua hnenah chuan “Lalpa, hrehawm nasa I zuk tuar a, mihringte chhandam nan I thawk nasa em em a, mahse tu in nge khu rawngbawl hna khu rawn chhunzawm ta ang le?” tiin a zawt a, Lal Isua chuan “Petera leh a thiante kutah ka hnutchhiah a lawm” tiin a chhang a. Mahse Gabriela chuan mihringte chaklo zia leh nep zia a hriat chian em avangin, “Petera leh a thiante chuan rawn chhunzawm peih ta silo sela an ai awh tur midang dah that emaw ruatlawk emawte i nei em?” tiin a zawt leh a, chuta Lal Isua chhanna chu “Anmahni khu ka ring tawk a ni”ati an ti.

Tun tumah hian Rawngbawlna hlawhtling chu mimal inpeknaah leh Pathian hnathawha innghat a nih zia zirchhuah kan tum dawn a ni.

Zoram dinhmun: Tunlai kan zoram dinhmun hi kan chhut chiang ve ngai emaw, inawkhlum, pawngsual, tualthat, ruangchhar, sar thi leh chhiat rup rupna a va thleng nasa em!! (Inkang 74) Sualna a pun nasat vang a ni lo maw? Nge, Pathian thinurna kan tawngbaw zawk? Kohhran mi leh sa te kan harh thar a hun tak zet a ni. Tunlaia Pathian thu lar tak pakhat chu ‘ Kohhran hian Biak In thleng pha tawhlo te, humsual daite, sualina a phuar mek te hi a va pan chilh zawk tur a ni’ an ti. A awmzia chu “lo kal rawh u, inkhawm ang u, Pathian thu rawn ngaithla rawh u’ tilovin Lamlianah te leh daiah te Kohhran hi a vak chhuak zawk anga Biak In thleng pha tawhlo te hnenah chuan Pathian Thu hi a va tlangaupui tawh zawk dawn a ni,’ tihna a ni awm e.

          Engpawhnise, Kohhran mipuite hian kan rawngbawlnaah hian hei aia nasa leh zuala tan kan lak a ngai a ni. Hmanni khan William Graham-a ministry ten rawngbawlna Mizoramah leh Nagaland-ah an rawn nei a, a hnua a rawngbawlna report a sawi lehnaah chuan “Mizoram leh Nagaland chu Kristian tamna hmun a nia, mahse, America ram ang maiin a hming maia Kristian an tam, kristian chu an inti mai a, mahse an nunah hmuhtur a awmlo’ a ti. Hnam dangte pawh hian min va hrechiang em ka ti a ni.

Rawngbawl hna:  Tun tum a Rawngbawlna kan sawi tur hi chu Ringtu zawng zawng chunga innghat ‘chanchin tha hril’ rawngbawlna hi a ni. Kohhran huang chhungah chuan ‘Rawngbawltu’ tia lam bikte an awm a, mahse kan vai hian rawngbawltu vek kan ni tih hi I theihnghilh lo ang u, Lal Isuan chanchin tha hril rawngbawl hna kan kovah a dah kha, chu chu Kohhran rawngbawlna hnapui ber pawh a ni.

Keini hian rawngbawlna hlenchhuah tur kan nei a ni. Kan chhungkuaah te, thenawm khawvengah te, Kohhran huangchhungah te leh zoram pum huapah ngei pawh. Lal Isua Krista chanchintha hi la hrelote hnenah nilovin hreve tawh, mahse awi tak tak duhlotute hnenah hei aia nasaa kan tarlan a ngai a ni. Missionary hna te, Kohhrana chanvo neihte chauh hi rawngbawlna a ni lova, Krista zuitu leh ringtu chuan chanchintha hril hi kan tih makmawh, kan chunga tla a ni. Lk 11:23-ah khan Lal Isuan engtin nge a tih kha? “Ka lam a tanglo tawh phawt chuan mi do a ni, mi lakkhawmpui lo chuan a tidarh a ni” a ti. Ringtu awm mai mai, inkhawm satliah kan nih chuan a tidarhtute zingah kan lo tel ve reng mai thei a ni.

Rawngbawltu hlawhtling: Awle, Rawngbawlna hlawhtling hi rawngbawltute tam leh tlemah a innghat lova, Pathian thuawihnaah te, inpeknaah te leh Amah Pathian hnathawhah te hian a innghat zawk a ni.

Pathian rawngbawl hna a hlawhtlin theihna tura mi tlemte te hnathawh I han thlir teh ang u:-

1)    Mosia: Mosia khan a tir lamah Pathian Kohna kha hnarin pha nasa viau mahse thuawih takin Pathian rawng a bawl a, a unaupa Arona nen khan Israel fate, sang tam tak, Aigupta sorkar chak tak lak ata hruaichhuaktu an lo ni ta a ni.

2)    Jona: Jona pawh khan atirah chuan Pathian thu kha a hnial a, Ninevi khuaa Pathian thu va hril ai chuan Tarsis lam a tlanbo te kha a tum a. Mahse a tawpah chuan Pathian thuawiin Ninevi khuaah Pathian thu a va tlangau pui ta a ni. Mak tak maiin mihring nuaikhat leh singhnih mai ni lo, an ran vulhte nen lam khan chaw an nghei a, saiip puan sinin Pathian an au nghal chuah chuah mai a nih kha. Tunlai ang chu ni se World record a siam hial mai thei a ni, mi pakhat sermon-a mi an pianthar tam ber tum a ni hial awm e.

3)    Zirtir Sawmlehpahnih: Lal Isua’n a hnathawh rawn chhunzawm zel tura a thlanchhuahte an ni, an rawngbawlna chu sawi vak pawh a ngailo tirawh u. Khatih hunlai kha chuan In pakhata inkhawm tham leh Ringtu an awm a, mahse tunah chuan Khawvela sakhaw lian ber a ni ta.

Kan sawi tak Mosia, Jona leh Zirtir sawmlehpahnih te kha rawngbawltu hlawhtling tak vek an ni. A number ang zawnga chhiar chuan an tam lo khawp mai, mahse an rawngbawlna kha a hlawhtling em em si a ni. Engvangnge ni ang le?

An in pekna leh Pathian thu an awihna vang chauh kha a ni.

Kan Kohhranah pawh hian active member chu a tlem zawk kan ni mai thei, kan chhungkuaah pawh Pathian ngaihsaktu awm chhun kan ni mai thei, kan khawtlangah leh Zoram pum huap pawhin a tlem zawk hi tihtak zeta Pathian rawngbawltu kan ni mai thei, engpawh nise Pathian thuawi chunga inpekna nen he rawngbawlna hi kan kalpui a nih chuan rawngbawlna nung leh hlawhtling a la ni em em ang. Pathian hian kan chhungkua, Kohhran, khawtlang leh rampum ti eng tur hian mi tam tak a mamawh hran lo, nang leh kei kan awm a, Pathian hnathawh lanna turin a tawk em em a ni.

Tam lam ni lovin inpekna leh a thuawihnaah zawk a ni rawngbawlna hlawhtling chu a awm. Lal Isuan “Lei chi in ni e” min ti, kan chhungkua, Kohhran, khawtlang leh rampum al turin min ti a ni. Lei chi chu thil vawn that nan te, lei tihthat nan te an hmang thin. Han ngaihtuah ila, mizote paw’n ‘chi’ chu chawhmeh al nan, thil tih tui nan kan hmang thin. Bai te kan chhuang thin,a al nan leh a tih tui nan chi tlem kan thlak thin tirawh u, tuman a inzatin kan thlak ngai lo, chawhmeh zat emaw vel kha chi thlak ta ila tuman kan ei thei lo ang. Mahse chi tlemte chuan chawhmeh pumpui chu a altui tawk em em a ni.

Chutiang bawkin nang leh kei, mi tlemte hian kan chhungkua, Kohhran, khawtlang leh rampum hi kan al tawk a ni, kan khawtlang leh ram ti tui tur hian vawiin chawhnua rawn inkhawm te hi a tawk lutuk tlat.

 Pathian hnathawh: A tawp bera ka sawi leh duh chu rawngbawlna hlawhtlinna tur atan a pawimawh ber, ‘Pathian hnathawh’ a ni. ‘Thlarau thianghlim hnathawh’ te pawh ti ila a sual tampui awm lo e. Kan sawi tak Mosia, Jona leh Zirtir sawmlehpahnih te rawngbawlna hlawhtling takah khan Pathian hnathawh a tel tluanchhuak parh a ni.

An mihring mihrinna zawnah chuan tuman khatiang thil ropui kha an tilo tawp ang, mahse an thuawihna leh inpekna te khan Pathian a chettir zawk a ni.

Ringtu inti thenkhat chuan rawngbawlna hi keimahni chauh tihtur emaw kan tia, kan huphurh thin, a nih loh paw’n alo hlawhtlin deuh leh keimahni tih liau liau emaw kan ti leh a, chapona a lo awm leh thin. Mahse, he rawngbawlhna, Lal Isua min pek hi Pathian nena tang duna thawh tur zawk a ni a, rawngbawltu tel lovin rawngbawlna a awm theilo a, Pathian hnathawh tel lovin rawngbawlna hlawhtling beisei theih a ni lo tih I hre thar ang u.

“Khawi hmunah pawh, khawvel tawp thleng pawha kan hnena awm zel tiamtu kha a rawng kan bawl Lal Isua ngei hi a ni e, chuvangin kan tam emaw kan tlem emaw min awmpui zel ang tih hriain thuawih tak leh inpekna thar nen he rawngbawl hna hi kan awmna hmun theuhah I thawk zel ang u.