ENGKIM NEITU PATHIAN

ENGKIM NEITU PATHIAN 

I Chronicle : 29:10-14; Estheri 4:12 – 14.

Pathian hruaina leh malsawmna zarah tun hun kan lo thleng leh thei ta a, heng zawng zawng hi keimahni theihna leh tlin vang lam a nilo a, Amah Pathian vang liau liau a ni.

1) Pathian hi engkim neitu  ani:

          I Chronicle 29:10-19 inkarah hian Davida’n mawi tak mai a Pathian a fakna kan hmu a, he lai a Davida fakna tawngtai hi ngun tak a chhiar chuan Davida hian Pathian hi ava hrechiang tak em…atih theih a ni.

          Davida khan Temple sa chak viau mahse Pathian in Solomona kutah a dah ta zawk si a, chuvangin Temple sakna tur chak lakkhawm mai kha atih theih tawk a ni. Davida hi lal ropui, rorel thiam tak a nih avangin Israel ram kha a hausa hle a, sumdawnna lam te kalpuiin sum tam tak a thawk chhuak a ni. Davida khan sawrkar sum ringawt hmang pawh khan Temple ropui tak a sa thei ang tih a hria a, mahse mipuite kha sum leh pai thawh ve turin a ngen tlat lawi si a ni. Engvang nge niang? Davida khan Pathian  hrechiang em a ni… he khawvel sum leh pai, ro hlu kan tih ve zawng zawng te hi Pathian ta vek anih zia hrechiangin engkim hi Pathian ta a nih thu a tlangau pui mai a ni.

          He khawvel a sum leh pai kan thawhchhuahte, in leh lo kan din te, fanau rochan kan neih thleng hian ‘Kan ta’ emaw kan ti thin a, mahse anilo, engkim neitu chu Pathian hi a ni. Kan nunna pawh inches khat a pawtsei theilo hian he khawvelah hian ‘ka ta’ ti a chhal tur, chatuan daih hi engmah kan neilo. Chu chu Lal Davida pawh hian a hrechiang khawp mai, Pathian Temple sak nan a Rangkachak, Lungmantam thahnem tak a pek te, a khua leh tuite rangkachak pek te, Dar leh Thir, lungmantam pek te kha engtin nge atih kha, “ Engkim hi ita ani a, ita chu kan rawn pe mai che anih hi…” ati.

2) Sual Vangin Pathian in neitu nihna a hloh:

          Eden bawhchhiatna avangin khawvelah sual alo lut a, chu chuan Pathian ta engkim mai chu a khawih pawi zo ta. “Pathian ta nihna hnuai a, engkim zalen tak leh thianghlim tak a awm kha alo bawlhlawh zo ta a, chu chuan mihringte pawh min fan a, khawvel chu sual leh tha indona hmun alo chnag zo ta.

          “ENgkim hi Pathian ta ani” kan tih mek lai hian kan Pathian hian mimal, chhungkua leh khawtlangah ‘Neitu nihna’ a hloh mek a. Mi tam tak chuan “Pathian tan’ tih ai chuan keimahni sahmim puarna tur hi kan enghelh ber thin. Kumin Krismas kan hman zawh tak te kha han ngaihtuah let leh ila, keimahni nuam tih zawng leh thlakhlelh zawng, kan chhungkua hlimna tur ringawt kha kan beisei ber a ni awm e… thil sual ani hauhlo, mahse Engkim neitu Pathian hrelo hian engkim neih kan tum thin hi a fuhlo lai chu a ni.

          Tunlai khawvel hi han thlir ila, sualna hi ava punlun ta em! Setana hian ‘Neitu’ nih ava tum nasa ta em…Khawvel ram hrang hrang, Kristian ram ni a kan hriat thin te chuan ‘Neih in ang’ te inneihna hi an pawmpui tawh a sin. Kan Bible in anemngheh ngei, Inneihna chu Mipa leh Hmeichhia inkar athleng tur ni a  kan hriat kha Hmeichhia leh hmeichhia inkarah te, mipa leh mipa inkarah tea lo thleng ta si. Hmani lawkah pawh Australia chuan an rorelna insangah ‘Neih in ang’ te inneihna a pawmpui thu zuk puang a mawle.

          Kan zoram ngei pawh hi en ila, ‘engkim hi Pathian ta’ anihna kan hloh hret hret niin alang. Keimahni mimal nunah, kan chhungkua ah, leh kan khawtlangah ‘ENgkim hi Lalpa ta ani’ ti thei tur khawpin kan khawsa em? Tunhnai a zirchianna leh tehna thar berah chuan Mizoram hi HIV hrik pai tamna ber State kan ni ta.  ‘Engkim hi Pathian ta a ni’ kan tih rualin hian Pathian tan kan va awm silo em… Chuvangin, kan mimal nun, Chhungkua leh khawtlang nun enlet ila, “Lal Isua a lalber e…” kan ti ngam angem?

          Pathian ram hi, mi tam tak chuan thlarau khawvel a chen tur chauh emaw anti thin. Mahse, chanchintha bu kan en chuan kan Lalpa Isua ngei khan he khawvelah Pathian ram kha ni din a tum ni!  ‘Pathian ram din hi  engkim Pathian ta anihna leh chumi zuk hmuhfiah theihna chu a ni mai. Nge kan chung a tla chanvo kan tih hlawhtlin hian kan duh tawk thin zawk le? Kohhran Hmeihchhe din chhan te, KTP rawngbawlna te, Pavalai Pawl lo pianna chhan zawng hian tum thuhmun annei vek…he khavawvel a Pathian lalberna din hi a ni.

.

3) Tun hi a hun leh hmun chu a ni:

          Kan khawvel chhiat zia kan hria, sawi vak vak pawh a ngai kher awmlo e. Kan tu leh fate thutha tinreng kan hrilh chung pawn nunkawng diklo lam an zawh thin si. Kan Bible ngeiin ENgkim hi Pathian ta nih thu chiang tak a a sawi chung pawh hian Pathian ta anihna a lang hleithei thin silo. Keini ringtu te hian tih tur kan nei a ni.

          Lalnu Estheri kha juda mi, Lal Ahasuera nupui a ni a. Mahse phiarrukna hrang hrang a vangin Juda zawng zawng chu tihhlum tur a rawtna kal mek kha a awm a. An mangang em em a, Mordekaia meuh pawh Lalnu Estheri hnenah tanpuina a  dil ruai mai a ni, ‘ Lalnu inihna chhan hi hetiang thil thlen dawn vang hi a ni” ti hial khawp in a ngen ngawl a. Pathian in chu dilna chu hria in Engkim tithei Pathian anihna a rawn pholang a, Juda hnam pumpui hi chhanhimin an awm leh ta a ni.

          Awle, Pathian hian inkhawm satliah emaw turin tumah ni min ko lo a, enge maw tihtur neiin min ko theuh a, chu min kohna zawn chu kan hrechhuak thiamlo thin a ni. He khawvelah A lalram din a, engkimtithei Pathian anihna pholanin awm se tih kha a duh a ni. Chumi tihlawhtling tur chuan Pathian hian kut/ke dang a neilo, keinni tho te hi a ni hman a duh chu! Pathian tan rinawm takin kan lo awm tawh pawh a ni mai, Pathian tan a inserhrang in nun kan lo hmang pawh a ni thei e…I awmna hmun leh hun kha ruahman lawk vek a ni a, kha kha Pathian thiltihtheihna in a hliahkhuh mekchu a ni.

          Chuvangin, zanin ah hian inngaihtuah chiang ila, kan khawvel chhe tawh tak, setana lalram zau zel tur hi kan ven ava tul tawh em! Lalnu Estheri, a chipui Judate tan a a ding ang khan, keinni te pawh hi Pathian ram dinna atan kan ding ve ngam dawn lawmi? Lalnu Estheri khan danlo angin Lalhmaah a ding a, a duh chu a thlen mai a ni. Keinni ve thung erawh hi chu khawvel chhiatna lam pan mek in kan tlan a,  A tuam dam ai chuan kihhnawk lam te hi kan buaipui thin.

          Engpawhnise, tunah ah hian ‘Engkim hi Pathian ta a ni a, a nizel bawk anga, keini hi arawngbawltute kan ni…”tih hi kan pawm a ngai. Awm hmun atang a ‘Ram hi Lalpa ta ani' tih mai hi chu a awl khawp mai, mahse, ringtute erawh hi chuan huaisen takin he ram hi Lalpa ta anih zel theih nan kan tan tlan a ngai a ni. MImal, chhungkua leh khawtlangah tan kan la a nga, he ram thalo kan tih hi Pathian ram din theihna tur a kan sawngbawl a ngai ani.