Drama: “ Hetiang hian Tawngtai rawh u”

“ Hetiang hian Tawngtai rawh u”

(Hmeichhe pakhat alo lang a..)

Hmeichhia: Ekhai…tunlai chu ka va hlimlo tak  em!! Ka nundan hi a dik tawklo a ni… Bialpa ka nei a, ka hlim tak tak silo, thiante nen zu kan han inho a, hlim chhung a rei chuang silo…Thlanro lamah, Polytechnic an sakna tur hmun lamah te ruatheh tlai khan hlim hmel takin ka leng ve a..mahse a tuk lawk ah ka ngui leh bur si…enge maw diklo hi chu a awm a ni. Ka hlim tur a ni, he khawvelah hian hlim takin ka awm tur a ni…mahse, engtin nge ka tih ang??? Aaaaa…Pathian lam hi bel chhin phawt ila, hlimna tluantling a awm ta a nih leh ka ti fuh ani mai.

                Mahse, engtin nge ka tawngtai ang?….engtin nge Pathian khi ka biak pawh ang le ooooo…

(Chutihlai tak chuan music a rawn ri a, Rapper a rawn lut a, a rawn Rap bawk a……music a tawp a)

Hmeichhia: Thianpa, min lo tanpui teh, Pathian hnenah tawngtai ve ka duh a, tawngtai dan ka thiam silo a…minlo zirtir teh…

Rapper: Lungngai mah ta che…’Leng zawng zing a mawi ber, ka hrilh nang che tawngtai dan…’….. Ka tih dan ang chiah hian I ti dawn nia…(Din dan leh kut dah dan an in hrilh a…)

                “Iou, I hma ah kan lo kun e, aw lalpa,

                Ka rawn inhlan e, aw lalpa,

                Min lo pawm ve ang che, aw lalpa.

Hetiang hian nitin vawihnih, chaw eikham apiangin tawngtai thin la, I hlim mai ang. (a kalsan ta a…)

Hmeichhia: khawnge, keimahin in ti ve chhin teh ang….(a tichhin a…)

                                A chhanna a va reh vung vung si ve  emmm!, ka tihdan hi a diklo aniang a.

(Chutih lai chuan mihlim pakhat a lo lang a, a rawn hallelui tuar tuar a…)

Hmeichhia: Thianpa….

Mihlim: jdhgihydvhwbldkns;kjiaejfc;ej……..enge ni?

Hmeichhia: Pathian hnenah tawngtai ka duh a, tawngtai dan ka thiam silo a, minlo zirtir ta che…nang I rau hmel deuh a…

Mihlim: ihouhrf;iygelidyfloqwpirp93uhryiygvaskuhdcbzdgf;owe9uyt’0pr428utoiqerof……..awle, kan Pathian hi thlarau a ni a, rau deuh a biak tur a ni. Ka tih dan ang zelin I rawn ti dawn nia…

                ‘ekhai…hei rawwww/…Aw lalpa…het tret tret/…misual ka ni, jshcsihgsvuxgv………../i hnenah ka rawn in pumpek vek e……amennnnn/’

                He ti hian tawngtai la, pathian I be pawp ngei ngei ang.

Hmeichhia: Awle, ka lo tawngtai tawh ang e….(Mihlim chu tawnghriatloh nen a rak nawk nawk chung chuan a kalbo a)

Khawnge…kan tawngtai leh chhin teh ang…(a tawngtai leh a…)

Ava har ve mawleeee….hetiang te chu pathian pawh hian a hrethiam dawn emawnileeee

(Chutihlai chuan mipakhat, tunlai tak a inchei chung a Bible rawn keng hi alo lang a…)

Mi pakhat: Hello…I thra maw?

Hmeichhia: Tha e, mahse maw Thianpa, Pathian hnenah tawngtai ka duh a, tawngtai dan ka hre silo a, min pui thei angem?

Mi pakhat: Of course…ka pui em em ang che…Kan pathian hi hmanlai pathian a ni lo a, tunlai pathian a ni…chuvangin, a tunlai thei ang ber a biak tur a ni….ka tihdan ang hi I rawn follow ve dawn nia.

                ‘ Haleluiah…praise the lord…Lalpa, kan fak a che…halleluiah...aw….holy spirit, kan chawimawi a che….i hnenah kan rawn in hlan e…Amen’

                Ti hian tawngtai thin la, Biak In ah kher angailo, KTP a inhman kher pawh angailo….a tunlai thei ang ber a biak hi a ni mai.. (A kalsan a…)

Hmeichhia: A dik viau tak ang a…. KTP kher pawh alo ngaih loh chu a..khawnge kan tawngtai ve leh chhin teh ang ( A tawngtai a…)

                Mahse, ngatinge, saptawng hman uar kher hi angai emawnileee…. Aaaaa…ka hrethiam neih nuai tawhlo e a…a thenin a chham a chham antia, a then tawnghriatloh..thenkhat lahin a changkang thei ang berin anti bawk sia…kan Pathian biak tum hi a in anglo emawnile…?

(Chutihlai chuan mipkhat, KTP hruaitu alo lut a….)

KTP: Mami puih theihna che ka nei em?

Hmeichhia: Ka pu, ka nundan hi ka ning a, ka hlim tak tak theilo a, hlimna tluan tling duhin Pathian hnenah tawngtai a inhlan ka tum a, mahse a tihdan ka hrelo a ni….mi chi hrang hrang in tihdan chi hrang hrang min kawhhmuh a, tihdan tur ber ka hrelo a, ka buai a ni.

KTP: Mami, lungngai mah ta che, kan Pathian hi nimin, vawiin leh naktuk Pathian a nia, a danglam ve lo a, chi hrang hrang a biak ngai a ni heklo. Mihringte hi kan in anglo hlawm em em a, chuvang chuan mahni phak ang tawk leh thiam dan in kan be mai thin zawk a ni.

(Hmeichhia chu a kai a, mipui lam a thlirpui a…music a rawn ri riai riai bawk a)

Enteh mami, I thalaipui te hian KTP ah hlim takin hun an hmang a, an tawngtai a, Pathian a be pawp a sin. Kan Pathian hian langsar tak a tawngtai emaw, hriatthiam mang loh a tawngtai emaw changkang tak a amah biak hi a phut ngai reng reng lo. Thinlung tak a tawngtaite chu, au vak vaklo mahse, van khawpui khi a ti nghing thin a sin…chuvangin maw, tawngtai hi tihdan, Style lam anilo a, I chhungril lam zawk kha a ni e…tihtak zet a I tawngtai anih chuan, eng ang pawn ti rawh, Pathian beng dar a nghawr che ngei ngei ang. Kan pahnih in, tihtak zetin I tawngtai ang hmiang..

Hmeichhia: Awle, tihtakzet a tawngtai tur tih hi tuma’n min hrilh ngailo a

(An thingthi a, an tawngtai ta a…music chidang alo ri a….Music a tawp a)

Hmeichhia: Ka pu, tunah chuan ka harh ta huai e…tawngtai hi style lamah nilovin tihtakzet a tawngtai alo ni zawk tih ka hrechiang e…tun a tang chuan KTP ah telin Pathian hnenah tihtakzetin ka lo tawngtai zel tawh ang e.