Chhiahtlang Pastor Bial KTP Half year meet leh Bial zaipawl silver Jubilee 2012 Thlirletna

“Hei zet chu (h) !!!”

Lalramluahpuia Colney.

Chhiahtlang Pastor Bial KTP Half year meet leh Bial zaipawl silver Jubilee chu kan hmang liam leh ta reng mai a,hun chinchhiah tlak leh hlim awm anih rualin hmasawn kan la ngaih zia min hriat thar tirtu, thlarau leh tisa lam a hlawkna kan channa ni thei se la a duhawm khawp mai. Engpawhnise, a kil hrang hrang hrut kual zawngin han chip nawn leh teh ang...

1.      A dawngtu Kohhran inbuatsaihna a tha: Venghlun Kohhran inbuatsaihna a tha tih ahriat khawp mai. Uniform, ei leh in, Bawlhlawh bawm, stage chei dan leh banner ah te, faina lam leh Usher/receptionist-te chevel zawng zawng te kha fak loh theih a nilo, “Hei zet chu (h)” tih tur a tam khawp mai. Engpawhnise, Meet (ti tawh mai ang) lo dawng tawh te zingah chuan inbuatsaihna nei tha pawl tak chu anni e.

2.      Khualtha kan thleng: Speaker atan a kan sawm Rev.Vanlalzuata leh kan Synod Zaipawl (kan koh danin) te an fuh khawp mai. “Thalaite leh Kristian Chhungkua” tih thupui sawi tur atan chuan Pu.Zuata tluk hi chu Zoram khawvelah hian an tam vaklo reng a ni. A tui zawng leh duh zawng tak kan chhawpsak bawk a, Pathian thu nung tak leh tha tak kan ngaithla ani, “kha thusawi zet chu(h)!!” tih tlak a ni e.

3.      Branch reports: Branch report petute an ti tha tlangpui, chutihrualin inbuatsaihna tha tawklo hmuh tur anla awm tho mai. Report petu tur kan nih chuan kan tawngkam hman tur te (Khawlai tawngkam tam tak hi Pulpit a hman a remchanglo), kan report

4.      Zaipawl a tha thawkhat: Branch hrang hrang zaipawl atha thawkhat, mahse hmasawnna tur kan ngah khawp mai. Kan Speaker sawi ang deuh khan zai mawi leh nalh piahlamah nung tak a zai hi tum ta ila zaipawl atha leh zual ngei ang.

Fak tur leh fakna tur thil tam tak ala awm, langsar silo a chanvo pawimawh tak tak hlentu te kha sawi chhuah vek sen annilo, engpawhnise, Chhiahtlang Pastor Bial KTP hian nasa takin hma a sawn zel ani tihy kawng tam tak ah alang ani.

“Mihring siamthat nan khawdur angai” anti thin, khawdur em nilo mahse hma kan sawn zelna atan leh kan in enfiah nan thil thenkhat ngaihmawh awm deuh te han tarlang teh ang.

5.      Sound lamah hmasawn kan ngai: Khawvel changkanna in a ken tel chu sound system changtlung hi a ni. Sound lam a chiankuan loh chuan eng Programme mah hi a hlawhtling tak tak thei thinlo. Tun tum kan meet  pawh inbuatsaihna tha tak hnuai ah sound lam fel tawklo a awm leh thin, a bik takin zaipawl zai dawn ah music tract play lawk theihloh chang a awm zoh zoh mai, chubakah a mixing lam atha tawklo deuh thin. Rawtna tlem han sawi teh ang...

Music tract hi Branch tam zawk chuan mobile phone hmangin kan play tlangpui thin a, hei hi kan buai thinna pakhat chu niin alang. Chuvangin Music Player mumal zawk kan neih angai a ni. CD player emaw hmang ta zawk ila kan buaina tam tak hi chu a kiang ngei ang le, sound controltu lam tan pawh Music player chikhat chauh kan hman dawn a vangin mixing lam tih dang lam vak vak ngai thin kha engemaw chen chu kan pumpelh ngei bawk ang. Chubakah, kan music tract te hi kan zai hma hian enchhin hmasak (Play chhin)na chang hria ila, sound duty te tan pawh mixing lam khawih dan tur ahriat lawk ngei bawk ang le.

6.      Inkhawm kaihhruai chungchang: Kan Bial hruaitute inkhawm kaihhruai dan tawk anthiam khawp mai, chutih rualin hmasawn kan ngaihna lai tur erawh a awm nual mai. Chairman in Coat ha chung a neck tie a awrh lo te, inkhawm kaihhruai dan (Bible chhiar, tawngtai...etc) in la lawn fuh vaklo te, thupuan te (Ziaktu chu thupuan ngai puang tur a sawm a ni a, ama ngaihdan leh thahnem ngaihna sawi tel chiam chiam thin hi a rem changlo), hun tawp thleng a Thuhriltu hun pek chungchangte (Chairman chanvo chu inkhawm a tawp thleng a hruai ani), tawngkam hman dik tawk loh thenkhat ‘malsawm tawngtai (malsawmna hi tawngtai anilo a, malsawmna sawi tur a sawm mai kha atawk viau a ni), Banna hla ( Ban hla hi kan hlabu ah a awm ngailo)” leh thil dang thenkhat ah te khan inbuatsaih uluk deuh chu kan ngai a ni.

7.      Thlalak kan ngam mah mah: Changkanna in a ken tel zing ami vedio leh still camera kan leklam danah in zir kan ngai khawp mai. Inrinni zan a thlalatu chet dan te, Branch thenkhat zai lai a thlalatu thenkhat kal kual te, Pathianni chawhnu a lamtual tan tlang rawk rawk khawp a camera kan lek te kha a mawilo piah lamah inkhawm zahawmna a tibo deuh thin niin alang. Pandal hnuai a thleng awm tak tak kha Biak In chhunga thleng hmuh tur a awm nual a, Biak In zahawmna leh Pathian biak urhsunna hi thalai ten in zirtir thar kan mamawh khawp mai.

8.      Special item a nawi: A tlangpui thu in fellowship a kan special item neih te hi kan ngai pawimawh tawklo thin. Branch thenkhat te inbuatsaihna athat rual in ti ve mai mai Branch hmuh tur ala awm kumtin hi siamthat angai khawp mai. Branch pakhat ve meuh aiawh atan a kan item neih te kha kan nam nul deuh mai mai a ang, nasa zawk a inbuatsaih kan ngai a ni.

Tin, item tha leh thalo kan tehna hi adik tawklo fo thin. Member tam zawk hian zirtir nei em emlo, fiamthu nuihzathlak kan lawm  zawk tlat niin alang a, min ti nui dur dur theilo item chu ‘thalo’ kan ti tlangpui thin bawk. Chuvangin kan ngaih hlut zawng leh lawm zawng hi kan thlak deuh chu a ngai ani. Tin, mi tih dan la chhawng mai lova mahni pum chhuak liau liau hi kan item neih tur ah hian zawn hram hram a pawimawh khawp mai.

Pastor Bial KTP conference ah hian KTP pual programme a awm leh ngei anga, chutah pawh chuan fellowship item nawi leh phuahchhawp tak tak a awm loh nan Bial lam atang a item duan lawk hi a fuh khawp ang le. Engpawhnise kan Bial hian nasa takin hma kan sawn tih alang a, chutih rualin hmabak tam tak kan la nei. Inkhawm, Zaipawl leh Special item kan neih te reng reng hi rawngbawlna vek ani tih hre thar ila, nasa zawkin tan ila sauh sauh zel ang u.