Tho la, Eng rawh

Tho la, Eng rawh (Ni leh Chi aia tangkai thil dang a awmlo)

Matthaia 5:14-16

                An sawi thin. Hmanlai ata tawh ‘Thim’ hi thilthalo sawina atan te, sual sawi nan te leh hrehawm lam sawi nan te kan lo hmang tawh thin a. Kan Bible ah ngei pawh hian Thim chu Sual leh a hnathawh sawi nan te, setana (Thim lal fapa) leh ahote sawi nan a hmang a (Sam 82:5;Is.9:2;Mat.4:16;8:12.) chutihrual chuan a thu-ep (opposite) ‘Eng’ erawh chu Pathian leh a hnathawh, thil tha lam sawi nan a hmang ve thung (Sam104;2;119:105;Dan.2:22; 1Joh.1:5). 1. Khawvel eng: Amah Lal Isua ngeiin Khawvel eng anih thu a sawi a (Joh.8:12) Amah zuitute, amah a awmte pawh chu Khawvel eng annih thu a sawi bawk.

                Pathian in he khawvel a siam khan a chhia a, a ruak ngawtin a awm a. Mahse, chu khawvel ti eng a, enkawl a, venghim tur chuan mihring a din ta a ni. A siam mihringte chuan khawvel an en a, hlim takin Pathian nen an leng dun thin a. Mahse, Sual avangin chu eng chu alo chuai ta a,  thim hmak erawh chu a anilo. He khawvel entu ber a ruat mihringin anih tur ang anih tak loh ah chuan he khawvel chu thim thuneihna hnuaiah a awm ta ani. Mahse, khawvel en a, mihringte dinhmun dik tak a hlangkai leh turin LalIsua alo kal ta a, ani chuan mihringte hnenah ‘Khawvel eng inni e’ tiin a rawn hrilh ta ani.

2. Tlangchhipa khaw awm: Judai ram a khawpuite kha tlang pangah emaw mual pawng chhip ah emaw a awm tlangpui a, chuvangin hla tak atang paw’n anhmuh theih thin. Chutiang ang chuan Isua zirtirte, ahma zawng a atu amahin ‘ka ui/ka ar’ antih loh kha, mi mit fukna anni ta a. Thenkhatten an fak a, a thenin an sawisel a, LalIsua zuitu annih miau avangin mi hriat an hlawhlo thei ta lo ani.

3. Hrai hnuai a dah khawnvar: Miin khawnvar an hal (an chhit) chuan enge maw entu tur atan an duh tihna ani. Khawnvar hal alh a, enge maw a khuhbo leh daih hi ‘halloh(chhitloh)’ nen a in ang reng. LalIsuan a zirtirte kha eng turin a duh a, khawnvar in inchhung pumpui a en chhuak angin, khawvel en turin a duh ani. Enge maw in an eng ahliah anih chuan ‘khawnvar khuhbo’ ang chiah anni tihna ani.

                LalIsua hian Ringtu nihna leh dinhmun a sawi chiang khawp mai. Amah kha Eng anih avangin a zuitute pawh kha an eng a, a goal pawh ‘khawvel en’ a ni. Tlangchhip a khaw awm chu eng ang khua pawh nise hmuh an awl a, khaw sual tak emaw khaw nuam tak pawh nise hriat an awl bik a ni. Ringtu chuan mi mit an la a, tluk palh chang pawh nei se an hmingchhe hma a, thiltha ti pawh nise hmuhhmaih an har thin. Tin, Khawnvar chu Inchhung ti eng tur a chhit anih a, adahna tur hmun dik tak a dah anih chuan Inchhung pum a en thin a, eng bik lai emaw thim bik lai a awm ngailo. Ringtu te pawh hi kan vel ti eng tur a ruat kan ni a, tih en duh bik lai emaw duhloh lai neih a remlo.

                ‘I awmna kha hmun thianghlim a ni’ titu kan Pathian hian hmun fai leh thianghlim sa, mi fel hlang hlak awmna ah min hruai a tum lemlo. Kan awmna hmun theuh hi ti thianghlim a, ti tui (chi a al) a, ti eng turin min duh zawk a ni. Chuvangin, Kum in ah hian tho la eng rawh, I tho duhlo emaw I eng duhlo emaw pawh nise ‘Ringtu ka ni’ kan intih ve si chuan tlangchhip a khaw awm ang mai a langsar kan ni tawh tho tho.