“Khawngaihna leh Thiltih” (Eph.2:1-10)

A textual Sermon on

“Khawngaihna leh Thiltih” (Eph.2:1-10)

 “Khawngaihna leh Thiltih” tih hi Ephesi khua amite hnen a Tirhkoh Paula lehkhathawn eng atangin kan en ang a, Chutah chuan kan nun a khawngaihna in hna a thawh dan leh chu khawngaihna chu eng atana kan hmuh nge? Eng nge kan tih ve tur tih te kan zirho dawn a ni.

Khawngaihna:-

            Mizo te hian khawngaihna hi kan ngai hlu a kan uar em em mai a, gospel camping kan neihna ah te pawh kan tuipui ber chu Pathian hmangaihna leh khawngaihna hi a ni fo thin a. Pathian khawngaihna hi amak a, sawifiah thiam ahar a, mahse a changtu/dawngtu erawh chuan chiang takin a hrefiah lawi si ani.

            Thupui a kan luh tak tak hma in ‘Khawngaihna mak,mawi leh duhawm’ tih hla mawi tak phuahtu, Pathian khawngaihna changtu John Newton-a chungchang sawi lawk teh ang.

“ Kum 7 anih kumin Anu in a boralsan a, School te pawh a kal ve lauh lauh a, mahse ahnu kum 3 hnu ah chuan apa lawngah tuipui lamah a kal ta ani. Chuta tang chuan kum tam tak chhung chu awmdan thalo tinrengin a nung zui a, Beidawnna, retheihna leh thihna kotlangah vawi tam tak a ding a, Lawng captain anih hnu paw’n a thawhpuite ngei ngei paw’n ran tluk pawhin an ngailo hial a ni. Chuti khawp a mihring tling tawhlo chuan Pathian khawngaihna a chang ve ta mai chu mak ati em em a, ‘khawngaihna’ tih ri chauh pawh chu atan chu ri mawi leh duhawm ber ani ta hial awm e. A thlan lungah pawh ama duhdan ang ngei in tihian an ziak a- ‘ John Newton-a, Pathian dodala a hming tibawrhbanga, Africa rama salte chhiahhlawh lo ni thin chu Kan lalpa leh chhandamtu khawngaihna nasa tak avang chuan Krista zarah hualhim, siamthar, ngaihdamna changin reitak ata tih chhiat tuma alo beih Rinna thupuang tura ruat’

Ephesi 2:1-10:-

2:1-3:- 1)Pathian in lei leh van a siam a, lei ah chuan mihring Ama anpui in  A siam bawk a, thil tha, A duhzawng ti a Amah nena leng dun turin A siam a ni. Amaherawhchu Bible a kan hmuh angin mihring chu suala tlu in Pathian ata mihrang an lo ni ta a chu chu tirhkoh Paula chuan ‘thi in ni’ tiin chang khatna ah khan a sawi a, ‘misual inni ti mai lovin mitthi inni’ ti a sual a awmte dinhmun a sawi hian tawngkam a duhthawh viau tih a hriat a, Mitthi chuan engmah a hmu theilo a, a hre theilo a, a suangtuah thei heklo bawk...engtih theihna mah a neilo.

Mihring chu sualna avangin Pathian zahngaihna, thatna leh hmangaihna hmu fiah tha theilo alo nita, Pathian kohna ri pawn a beng dar a ti nghing pha tawhlo. (Biak In dar ri engahmah ngailo tih ka hrechhuak zawk mai). Mitthi tawh chu mihring theihna hmang a kaihthawh leh theih anilo ang chiahin Sual avanga thi te pawh mihring thatna leh theihna hmang a kaihthawh leh theih annilo.

2) Paula hian ‘sual’ lam sawi nan hian ‘Tisa, nunhlui leh khawvel awmdan’ tih hi a hman dan tlang lawn a ni a, ‘boruak a thuneitute lal’ atih hi chu setana leh a hote sawina ni awm tak a ni. Sual a thi anih miau avangin thim thuneihna hnuai a awm, sual lam awn tlat mihring alo nita ani.

3)  Mihring chu Pathian lakah mihrang, sual a thi anih tak ah chuan a chak zawng leh duhzawng, nuam tih zawng angin a khawsa zui ta a... Helai chang a chhinchhiah tlak deuh awm chu Misual vek kan nih zia tarlan nan Paula ngei pawh hi a in sawitel a ‘keini pawh kan tel vek a’ ati.

A then hurna lamah an kal, a then ruihhlo lamah te, a then duham nate, mahni hmasialna ah te tlanin chapo takin an leng thin a ni. Chutia mahni duh dan leh duhthu a khawvel han hman vel te chu nuam viau angin han lang mahse rei alo daihlo a thlamuanna tak tak rilru ah a awm thei thlawtlo a, Pathian tello chuan miin that han tum teh mahsela a daih rei tak tak lo a a thlamuang chuanglo. Mahni leh mahni a in thlamuan theilo a, sual chu kalsan a nun thara han nun te duh ve thin mahsela Pathian tello chuan a nun a buai a, a chang te chuan sim duh mahsela a sim hleitheilo a, Pathian hrem hmabak mai kan ni. Sual man chu thihna ani’ Pathian thu in a ti sia, mihring chu thlarau thihna, hremhmun a kal mai hmabak a ni.

Ephesi: 2: 4-5:- Chang 4-na bul intanna hi a mawi khawp mai, Paula chuan mihring te sual nasat zia chang thum thleng a sawi hrep hnu ah, ‘Nimahsela/Mahse’ a rawn ti a, a awmzia chu a thil sawilai a inher danglam dawn ani tihna a ni. Mihring dinhmun chhe tak chuan Pathian khawngaihna avanga beiseina a neih thu rawn sawiin Pathian hmangaihna thukzia a rawn chhawp chhuak ta. “ Khawngaihna a nasa’ tih hi a saptawng lamah ‘Rich in mercy’ tiin a dah a, ‘Khawngaihna a hausa’ ‘Khawngaihna ngah’ ti ang pawn a sawi theih ang. Chu a hausakna luangliam chuan mihringte sual a thite chu Lal Isua Krista ah a rawn kaitho ta ani.

2:6-7:- Helai ah hian Lal Isua Krista a he khawngaihna hi chang kan ni tih te, Lal Isua thihna leh thawhlehna tawmpuitu chuan Vanramah pawh Lal Isua ropuina kan la tawmpui ve dawn ani tih a sawi chiang khawp mai, chanvo ropui tak va ni em! Chuvang tak chuan Paula hian a tuarna zawng zawngte kha vanram a ropuina ala chan tur nen chuan tehkhin chi ah pawh a ngailo reng a ni. A fapa meuh pawh zuah lova a khawngaihna lantirtu chuan nakin hnu zelah pawh khawngaihna in ala hruai zel ang tih a ring tlat a ni a, anun kha Pathian khawngaihna in a khalh zel dawn a ni, chu chu a dawtah hian a rawn sawi ta chiah a.

            Ephesi:2 : 8 ah tirhkoh Paula chuan chiang takin rinna avanga khawngaihnaa chhandam kan nih thu a sawi a, chu chu mihring te phu vang leh thawhchhuah lam thil a nihloh zia rawn sawi zuiin  Pathian thil pek liau liau a nihzia chiang takin a sawi a. A awmzia hriat chian leh zual nan tihian sawi ta ila ‘Khawngaihna avangin Pathian in Chhandamna min siamsak a, chu khawngaihna hnuaiah chuan Chhandamna chang turin rinnain kan lut a ni’ Rinna chungchang hi sawi zui vak a chakawm khop mai, Paula hian Khawngaihna leh Rinna hi a suihzawm tlat ani tih hria ila, Chhandam hi a  thawh a thawh chhuah chu nisela chuan thil tha ti tam deuh te chauh khan an dawng/ chang emaw a ni anga mahse chutiang niloin mi zawng zawng, a sual kan tih ber leh a fel kan tih ber te thlengin inang khatin a pe a ni. Hetah hian Pathian khawngaihna zauzia leh huap zawh zia a lang chiang hle mai.

Chutah, chang 10 ah hian Khawngaihnaa chhandamten chu khawngaihna an chhanlet dan tur chiang takin min hrilh zui nghal a, chu chu ‘thil tha tih’ a ni. Theologian pakhat chuan ‘mihringin chanchintha an pawmna leh thiltih hmanga an chhanletna hi Paula’n Rinna a sawi awmzia ani e’ ati a, chuti anih chuan khawngaihna avang a chhandamna changtu chuan thil tih tur anei tihna ani. Thilsiam thar, Pathian kutchhuak ngei anih tak avangin thil tha ti thei turin a in fit a, a in ring bawk a, chu thil tha tih chu Pathian rem lo ruatlawk, a khawngaihna changtu te awmdan tur a Pathianin alo buatsaihsa vek a nih avangin khawngaihna hnuai ah chuan a hahdam ru tlat.

Kan sawi tak ang khan Mizo te hian khawngaihna hi kan uar in kan duh em em a, uar tur pawh a ni. Amaherawhchu ‘Rinna avanga khawngaihnaa chhandam in ni, chu chu in thawh chhuah a ni lo, Pathian thilpek a ni’ tih zawh chiah ah hian kan tawp fo zel mai a, kan FULL STOP daih zel a, kan tih ve tur lamah hian kan indah awl hlauh zel a, hei hi chu a diklo deuh a ni.

Khawngaihna, Ephesi: 2: 10 a kan hmuh ang hian, Ringtu chu Pathianin Isua Kristaa thil tha tih a bul alo tan tawh ang chiahin khawngaihna changtute zawng zawng chu thil tha ti turin a ko a ni. Hei hi Paula khawhawi zawng pawh ani, ‘Rinna chuan thil ati’ tih lam nilovin ‘ kan rin chuan thil kan ti a ni’ tih lam zawk a ni.

THILTIH:-

Hei tak hi a pawimawh khawp mai a kan uar lai ber tur pawh niin a lang a ni. Jakoba lehkhathawn a kan hmuh ang khan “Rinna chu thiltih tello chuan thi a ni” tih a ni a, chuvangin rinna leh thiltih chu thil kalkawp tlat a ni a then hran theih an nilo a kan ni tin nunah chu kan rinna chu kan tih lan a ngai, a awmzia chu nitin thianghlimna kawng kan zawh a ngai a ni. Pathian thu in “Mi fel chu rinna in a nung ang” a tih ang khan kan rinna chu kan nunpui anga kan nun ah a lang tur a ni.

Zawlnei Mika chuan Thiltha chu ‘Dik tak a thiltih te, khawngaihna ngainat te, thuhnuairawlh taka Pathian nen a lendun anih thu a sawi a. Engpawhnise, Tute lakah nge thiltha chu kan tih ang?

i)                    Pakhatnaah,Pathian mit hmuhah thil tha kan ti tlat tur a ni. Mi hmuh phakloh chinah chuan rinawm a har duh thin khawp mai. Nula tlangval te tan pawh han awm fal chuan lo kal hrat a awl thin a, chutiang chiah chuan sorkar hna thawk te pawh office ah emaw te tham na emaw kawng dangin corrupt na tur chance hi a tam em em a, a hunah tak zel ‘Thil tha’ chu kan tih tlat a pawimawh a, Pathian lakah engmah kan thup theilo a engkim a hmu vek a, a hmuh phak loh a awm miau loh avangin thil tha chauh tih reng mai hi kan tih tur a ni.

ii)                  A dawt lehah chuan kan mihring pui te chungah thil tha kan ti tur a ni. A har khawp mai. Mahni hlawkna leh chak zawng hi chu a tih mai theih a, mahse midang tana tha, midang chunga thil tha tih chu har viau, mahni kan hek phah emaw kan hah phah emaw anih dawn phei chuan kan harsat leh zual. Keimahni tana pawi tur emaw hlawkna lam tur ni miahlo pawh ni sela kan rilru thianghlim loh avangin that chhuah a har kan ti fo thin a, mahni hmelma te chungah ngat phei chuan theihloh hiala ngaih a ni a. Amaherawhchu chutah tak mai chuan Pathian khawngaihna kan hmuh chuan kan tisa lam duhna nilo in Pathian duhzawng, ‘thil tha’ ti turin  kan thinlung ah a rawn thawk a kan mihring pui te chungah thi tha leh dik chu ti thei turin min buatsaih ta a ni.

iii)                A pathumnaah chuan Thilsiam chungah thil tha kan ti tur a ni. Mihringte hi thilsiam enkawl tur a ruat kan ni, Thilsiam dangten Pathian fate lo lan hun an nghakhlel ani tih hria ila, Chhandamna changtu, khawngaihna a kaihhruai mek kan ni tih tilang tur hian thilsiam te hi kan enkawl that angai a ni.

Awle, vawiin chawhnu a rawn inkhawmte hi mahni theuh in en ila, Khawngaihnaa chhandamna changtu ka ni inti chung si hian thil tha kan ti em? Pathian khawngaihna avanga rawngbawlhna ka chelhna ah hian chu rawngbawlhna chu ka hlen em?Nge a tithuanawptu ka ni zawk? Thiltha titur a siamthar, Khawngaihnaa chhandam Ringtu ni zel turin inbuatsaih ila, tunlai khawvelah thiltha ti peihlo ringtu, rawngbawltu anlo chhuak mek zel a, chung mite chuan KTP, Kohhran Hmeichhia, Pavalai Pawl mai nilo Kohhran pumpui huap paw’n harsatna min thlen thei ani tih hria in Pathian lakah, kan mihringpuite lakah leh thilsiam dangte lakah hian thil tha iti zel teh ang u . Amen.