PATHIAN BIAK INKHAWM NGAIH PAWIMAWH

                                        PATHIAN BIAK INKHAWM NGAIH PAWIMAWH
                                                                    Sam 84:1,2 ; Johana 4:23

Khuhhawnna : 

        Mizote hi huho nun ngaina leh inpawh tlang taka cheng ho, khawtlang inrelbawlna fel tak nei a, in\henawm khawvenna pawh ngaipawimawh em em \hin kan ni a. “|henawm te do ai chuan khaw sarih do a thlanawm zawk” ti hiala khawtlang nun inzawmna \ha ngaipawimawh hnam kan ni \hin.
Kristian kan nih hnu pawhin hei hian Pathian kan Biak dan pawh a nghawng thui hle a, a huhoa Pathian Biak kan ngai pawimawh a, a huho leh pawl anga thiltih chu nuam pawh kan ti \hin. Tin, a huhoa Pathian kan biakna hmun ‘Biak In’ pawh kan ngai pawimawh a, a \ha leh lian, nalh leh ropui thei ang bera sak kan tum ta zel a nih hi. Mahse, khawvel \hang zel leh hmasawnna lo kal chuan mimal, chhungkua, leh khawtlang hawi zawng a rawn her danglam tial tial a, kan Pathian Biak Inkhawm thlengin nghawng a rawn nei chho ta a ni.

I. Pathian Biak Inkhawm Awmzia:
             Pathian Biak Inkhawm awmzia sawi dawn chuan ‘Pathian bia (worship)’ tih leh ‘Inkhawm (Worship service)’ tiin \hen hrang ila hriatfiah a awlsam zawk awm e.

a) Pathian Biak awmzia (Worship) : Pathian bia tih hian chibai buk te, a hnena inhlan te a kawk a; ‘Pathian chibai buk’ tih hi kan hman lar tak chu a ni. Thuthlung Hluiah Hebrai \awngin Pathian bia tih sawina eng emaw zat a awm a, ‘mahni intihniam (vawi 86)’, ‘rawngbawl/rawngbawlsak (vawi 11)’, ‘zah/\ih (Josua 22;25)’ ‘Pathian zawng, zawt vel (Ezra 6:21). Heng bakah hian Pathian bia tih sawi nan a hman lar tak a awm a ‘zah leh \ih taka biak’ tih hi Daniala bung 3-naah khan vawi 11 lai hman a ni bawk. Tin, fak tih te, lawm tih te, \awng\ai tih te, inhlan tih te leh thutiam siama hlen ngei tura intiamna thute hi Pathian bia sawina \awngkam dang te chu an ni.

            A chunga kan sawi lan tak a\ang hi chuan ‘Pathian biak’ awmzia chu zah tak leh \ih tak chunga kuna chibai buk, amah fak leh chawimawi, a hnena inhlan leh lawm chunga a rawng bawl, mahni intiam chunga a hnena intukluh te a ni a, Thuthlung Thara ‘Pathian chibai buk/ Pathian bia’ tihte nen a danglamna a awm chuang lo. 

        R.W.F. Wootton-a (uton-a) chuan kawngli (4) in a hrilhfiah a:
1) Pathian biak chu Pathian ropuina hriatna a ni a, miin Pathian ropuizia a hriat chuan ama tlawmzia a hria a, zah tak leh \ih tak chungin a be lo thei lo.
2) Pathian biak chu Amah chawimawina leh fakna a ni a, Pathian ropuizia leh a hnathawhte miin a hriat chuan Pathian a faklo theilo.
3) Pathian biak hi keimahni leh Pathian intawhna a ni.
4) Pathian biak chu mahni inhlanna leh thilpek pek hi a ni.

Tin, kan sawi hmaih hauh loh tur chu Pathian biak hi inpawlna, Pathian nena inpawlna leh Amah avanga a mite inpawl khawmna a nih thu hi a ni. A huhova biaknaah phei chuan a betuten a huhovin Pathian an pawl a, chutah a betute chu an inpawlho bawk a ni. He inpawlhona chi hnih tel lo chuan a huhova Pathian biakna hlawhtling tak a awm thei lo.

b) Kohhran Inkhawm/ Pathian Biak Inkhawm (worship service):
                    Missionary ten ringtua min siam hnu lawk, tlemte kan nih lai a\angin Pathian chu a huhova biak min zirtir a, chu chuan Biak In pawh neih thuai kan chak phah niin alang. Mizote ngat phei hi chu a huhoa thil ti \hin, hnatlang \hin, inlawm hnam kan nih vang nge mimala Pathian biak leh pawl pawh tam tak chuan kan ngaisak lutuk lo niin a lang hial a, a huhova kan tih hi kan ring mai emaw ni tih hial tur a ni.

                Kohhran Inkhawm tih hi a tawi zawnga sawi chuan ‘a huhova Kohhran mipuiten Pathian kan biakna’ ti ila a sual awm lo e. Hmun dang ang bawka a huhova Pathian kan biak dan langsar ber chu Kohhran Inkhawm hi a ni. Kohhran chuan a huhova Pathian biakna dik tak kan neih theihna turin Inkhawm kalphung mumal tak a nei a, chu inkhawma a kipui pawimawh zualte chu Bible chhiar, \awng\ai, hla sak leh thuhril te hi an ni a, inkhawm dan azirin thawhlawm lakkhawm a ni bawk. Heng Pathian biakna hmanrua (elements of worship) zawng zawng hian Pathian biak dan dik taka Kohhran mipuite min hruai a tum avangin chanvo neitute tan tih mai mai a thiang lo a. Chuvangin, Inkhawm chhunga thiltih engkim hi uluk taka buatsaih leh tihtakzeta tih tur a ni.

                            Kohhran in Pathian Biak Inkhawm hunbi kan neih piahlamah KTP te hian Fellowship leh Thawh\anni zan inkhawm (worship) kan nei a, Fellowship hi Pathian biakna ni tho mahse, a tum leh hawizawng a dang deuh thung. Engpawhnise, a hmaa kan sawi tawh angin Pathian biak hi Amah Pathian nen kan inpawlna leh a betute ho kan inpawlkhawmna anih avangin a khawi emaw zawk zawk thlauhthlak a thiang lo a, midangte nen inpawlhona \ha nei chuang si lo a Pathian pawl tum hian Pathian biakna dik tak min thlen ngai lo ang. 

II. Pathian Biak Inkhawm leh Tunlai khawvel:
                            Tunlaia kan Pathian biak inkhawm dan kalhmang leh zia hi a tir ami inher danglam chho hret hret niin a lang. Kum 1906-a harhna hmasa ber lo thlen hunlai leh a hma hretah khan Kohhran hian Inkhawm dan mumal tak a la nei lem lo a, Ringtu inkhawm tluangtlam pangngai ang tawpin an kal niin alang. Mission veng Kohhran Committee in January 10, 1910-a inkhawm kalhmang an rel kha a bul \anna a ni mai awm e. Chutihrualin, kum 1950 bawr thleng khan Inkhawm kalhmang a la mumal lutuk lo a, \an hun bituk a awm lo a, an kim hun kha an \an hun a ni mai. Tin, ban dawna Lal |awng\aina sawi emaw Malsawmna emaw sawi lo a, Upa min berin a \hut hmun a\anga “I \in tawh ang u le,” a tih mai chang a tam.
                        Mahse, tunah chuan Inkhawm dan phung mumal tak kan nei ta a, Biak In \ha leh hmanrua tunlai thei ang ber zela Pathian biak kan tum ta te pawh hi hmasawnna chikhat chu a ni ngei mai. He khawvel thiamna leh Pathian thu hriatna kawngah pawh kan \hang zel a, tunlai \halai te hi chu Sunday School pass chhuak, beginner a\anga Senior department chhir chhuak hi atam zawk kan ni hial awm e. Mahse, Kohhran hrang hrang attendance report leh dinhmun en hian Kohhran inkhawm zat hi a tlahniam telh telh niin an sawi. Rev. Dr. R. Vanlaltluanga chuan, “Kan Kohhran inkhawm hi pyramid (A bul lam lian a, zuih chho telh telh) ang a ni e” a ti  \hin.

                        Tunlai khawvel boruak min nektu hrang hrang a awm a, Pathian biak inkhawm (abikin \halai te zingah) nghawng nasa zual bik te tarlang ila:

a) Khawvel hmasawnna: Hmasawnna/Changkanna han tih hian ‘Changkang/hmasawn’ kan teh dan a zir te pawh a ni ang a, heta kan sawi tum erawh chu kan khawvel hun kal zelin a hrin chhoh ‘Internet lama hmasawnna’ lo piang hi a ni.
                                Kum 20 hmalama kan nundan leh tuna kan awm dan hi khaikhin chi pawh a ni ta lo. Tunah chuan ‘Khawvel pumpui hi Thingtlang khua pakhat ang mai a ni (Global village)’ an ti. Kan awmhmun a\angin khawvel chanchin engkim kan hre zung zung thei a, chu mai a ni lo, kan inbe thei a, kan inhmu thei a, engkim kan sawiho thei a nih hi. Hei hian a hrinchhuah chu sap ram/ Korea ram kal miah lovin an nunphung (culture) leh nun dan (lifestyle) chu awlsam takin kan lo la chhawng ve zung zung ta a.                

                Zaikhawm/Lenkhawm aiin Praise & Worship chuan min hip tawh zawk a, Biak In chhung aiin khawi lai Hall vela han ‘Home Coming’ vel chu ‘tunlai’ riauin kan hre ta zawk a nih hi! Hengho hi a\ha lo a ni lo, mahse, Mizo Kristianin Pathian Biak Inkhawm kan neihsaah hian duh khawp lohna leh nuam tih lohna kan neih phah a, ‘a boring’ kan ti fo \hin.
                Tin, |halai nawlpuiin kan tuipui Social media (Fb, Watsapp, IG Etc) te hian Pathian Biak Inkhawm hi a nghawng nasa viau bawk. Inkawmho si lo a \halai rual awmkhawm i hmu fo em? Social media hian khawvel dangah min chen tir a, \hian dang min kawm tir a, \hian chi hnih leh khawvel chi hnih ah  min chen tir a sin. Mi tam takin an tih fuh loh fo \hin chu nitina kan chenpui, kan hnatlan pui leh inkhawm pui \hin te aia Social media a \hian dangte kan kawm nasa zawk hi a ni. Hei hian a huho nun (fellowship life) a tichhia a, K|P thiltih khawmna a tel ai chuan mahni inlum a\anga \hian dang kawm kan thlang zawk \hin. Tin, tunlaia Online Games – rawn chhuak tharte pawh hian kan bul vel a mite nena inkungkaihna \ha neih ai chuan \hian dangte nen a thiltih ho duhna min neihtir a, kohhran attendance va tihsan ai chuan kan games khelh a point hmuh san kha kan ngai pawimawh zawk \hin. Chuvangin, Smart Phone kan hum a, Internet signal a \hat phawt chuan mahni in kan tlei em em a, huho nun kan hmanna hmun (Kohhran Inkhawm, K|P activity etc) a tel chu kan peih lo tial tial niin alang.

b) Sakhua ngaihsaklohna:
                    Sawi tawh ang khan information Technology \hang chak lutuk chuan khawvel a sawr zim a, ram changkangte nunphung leh ngaih dan chuan nasa takin \halaiteah bu a khuar mek a, Globalization chuan huang khatah min khung khawm anih ber hi. Hemi phena thil lo kal, a unaupa tih mai tur, a nawr kal tlattu a awm a, chu chu ‘post-modernism ideology’ an tih hi a ni. He ngaih dan hi kum zabi 19 hunlai vela in\an daih tawh ni mah sela, kan \halaite nunah nasa takin nghawng a nei chho a, ala nei dawn chauh pawh a ni mahna! He ngaihdan in a ken ber chu ‘Tunlai khawvelah chuan dik ber, \ha ber, leh fuh ber hi a awm tawh lo, a thlirtu mihring a zir a ni mai’ tih a ni.
                    Tin, he mi hrula ngaih dan awm tawh sa, BC zabi 5-naa Protagoras-a ngaih dan “Mihring hi engkim tehna, tehkhawng, khaikhawmna a ni” tih a\anga in\an, ‘a laipuia mihring dahna leh, mihring mihrinna chawisanna’ hi tun thleng hian ala awm a, a sap\awnga ‘Humanism (Mihring dah chungnunna)’ tih hi hre lem lo hian kan nun dan a lo kaihruai thui thei khawp mai. He ngaih dan hian Pathian chungchanga Kristian zirtirna ziding a hnawl a, mihring chu nuam a tih dan ang zelin a nung mai tur a ni a ti a, mimal zalenna a dah sang hle. Tin, mihring sualna leh \hatna chungchang pawh hi amah mihring lamah (nature) ni lovin a chenna leh awmna boruak (environment) a zir a ni mai tih anih avangin Bible-in ‘sual’ a tihte hi thil sualah a ngai ve vek lemlo. Mizoramah pawh Zu hi sual anih leh nih lohah kan inhnial luai luai hi maw!
                    Heng ngaih dan chi hnih hian kan ram \halaiteah bu a khuar nghet tawh hle a, mihring mihrinna chawisanna leh mimal thlirna ngaih pawimawhna te hian eng emaw zawng tak chuan mimal nun hlutna min hriattir a, inrintawkna min pe bawk. Chutihrualin, Sakhua ngaihsak lohna leh sakhaw rawngbawltute (Pastor, Kohhran Upa, K|P hruaitute etc) leh rawngbawlna ngaihnepna min neihtir nasa hle thung. Kohhranin ziak loh dan kan neih pakhat chu “Kohhran aw hi Pathian aw a ni” kan ti \hin. Mahse, tunah chuan Kohhran in thu a chhuah leh ngenna a siam te, a rorel dan te pawh langsar takin kan sawisel ngam ta a, “Kohhran ngaihdan hi dik ber leh \ha ber a ni bik lo” kan ti ta te pawh a ni mai thei!
Chuvangin, \halai tam tak hian active taka Kohhran belh kher hi a \ulna an hre lem lo a, Kohhran huang pawn lamah pawh hian mihring hian \hatna dan kan nei a ni an ti. Mimal nun dah lenna a nasat avangin ‘nuam ka tih zawng a ni em?’ tih hi kan tehna lek pakhat a ni a, nuam kan tih zawng anga Kohhran Inkhawm leh K|P activity-te kalpui a nih loh chuan tel tumna kan nei lem lo. Tin, Mizo society ah sakhaw dang vuan chunga mizo nih in nghawng ala neih nasat em avangin a hming maia Kristian, run dal leka Inkhawm hi kan tam viau awm e!
                       Heng bakah hian tunlai boruak min nektu tam tak a awm a, sawi vek sen a ni lo ang. Kan awmna hmun (khua/veng) azirin min nek nat dan pawh a inchen kher awm lo e. K|P ah hian kum 15 leh kum 40 inkar kan tel avangin kan sukthlek leh tuipui zawng pawh a hrang hlawm ngei bawk ang a, hei hian naupang zawk te leh puitling tawhte inkarah awl (generation gap) a siam \hin.

III. Engtia hmalak tur nge? 

                        Hmalak dan tur hi kawng tam tak a awm ngei ang a, a bul berah chuan Pathian Thlarau Thianghlim hnathawh kan mamawh ngei ang. Chutihrualin, mihring lam hian tih ve tur leh tih ve theih kan nei a, kawng thum (3) chauh sawi ila:-
a) Hruaituten hma an hruai a ngai:
                        Kristian |halai Pawl hi pawl a nih angin hruaitu an awm a, Office Bearers leh Committee member-te mai nilo Group hruaitute pawh hi K|P huangah chuan ‘Hruaitu’ kan tihte an ni. Kohhran huang anih avangin Tisa leh Thlarau lam thlengin hruaitute hian mawhphurhna an nei.
                        Eng pawl pawh nise hruaituin hma hruai hna thawh a tum loh chuan ‘pawl chak’ a ni thei ngai lo a, hruaitu chu member-te aiin a thawkrim ang a, a thlan pawh a far nasa zawk tur a ni. John R. Mott-a chuan, “Hruaitu chu kawng chin hria leh kal hmasa, amah zui tura mite hruai theitu hi a ni” a ti. Pathian Biak Inkhawmah pawh hian hruaitute hi tel \hap \hap thei ila chuan member-ten Inkhawm an phur phah ngeiin a rinawm. Hruaitute berin Inkhawm kan \hulh fo chuan member-te ah Inkhawm thulh awlsamna a thlen phah thei.
                    Kum tin hian Kohhranin Rawngbawltu Inhlan tharna hun hmangin rawngbawltute pual inkhawm a buatsaih \hin a, ‘Rawngbawltu’ a ngaih chin ringawt pawh hian Biak In chhung kan mawi tawk viau zel. Mahse, a hnu zelah erawh inkhawm kal kan tlem pharh \hin a, a chhan chu Rawngbawltute zingah inkhawm \hulh kan tam tih na a ni fo.
                Zawhna chhangtu zinga \hahnem takin ‘K|P hruaitute hi an inkhawm \halo’ niin an sawi a. Committee member leh Group hruaitu chin hi chu rokhawlhna lian tak kan nei anih loh chuan inkhawm ngei ngei tur a ngaih kan ni a, chu chu Hruaitu nihna in a ken tel a ni bawk. Chuvangin, hruaitute hian Biak In chhungah member-te hi khalh luh tum lovin hruai luh I tum zawk ang u.

b)Pathian Nung bia kan ni tih hriat a ngai:
                    Kristiana inchhal tam tak hian “Tunge i Pathian chu?” tih zawhna hi mumal takin kan chhang thei lo mai awm mange! Islam sakhua zuitu, mosolman- te hi tluk lohna lian tak kan nei \hin. Anni chuan tihtak zetin an pathian (allah) hi an bia a, chawnghei thla (Ramjan) anih chuan an nghei mai a, zingkar leh tlai ni tlak rualin an ‘allah’ ruah ruah \hin anih hi. An biakin (mosque) a i kal a nih chuan urhsun taka an pathian be lai i hmu fo ang a, chapal tak ngial pawh bun lut phal lo khawpin an lo vawng thianghlim ang. Anni chuan an pathian biak an hria a, thih chilh ngam khawpa nasa in an be mai. Pathian nung betu zawk te nun hi a thi a, a nung lo zawk betute nun hi a nung zawk emaw tih tur a ni fo!!!
                    Pathian kan biak laia kan awmdan hrim hrim te pawh siam\hat a ngai, Amah fak leh chawimawi nana zai ni si hi kan va hlim lo \hin em! Phur lo zetin kan zai a, chawimawi kan tum Pathian pawh hi a lawm ngut ang emaw? Pathian thu (sermon) sawi ngaihthlak dawnte hian \hut ngil a, beisei nei taka lo men fiah kawk kawk awm tak hi kan \hu-awn sauh sauh a, muthluk tum ran hian kan han maimichhing ta daih \hin zawk a nia. A betute biak danah hian kan Pathian hi a Nung a ni tih alang loin i hre ve \hin em?

c) Inkhawm hi tih \han ah (habit) neih rawh:
                    “A rau lo” kan ti mai thei, mahse, inkhawm hi Habit (tih\han/chin\han) a neih theih a ni. Chin\han/ tih\han (Habit) chi hrang hrang kan nei ang, \henkhat chuan ke hlang kang chunga chaw ei te hi tih\hanah an nei a, hrehawm an ti lem lo a, \henkhat tan erawh chuan thil hrehawm tak a ni thung ang, a chhan chu tih\hana an neih ve loh vang a  ni.
                Habit chu thil eng emaw kan tih nawn fo avanga ngai a kan neih, kan taksa leh rilru in thil nihphung emaw awm dan tur ve renga a ngaih tawh hi a ni. Kohhran Upa pakhat chuan, “Inkhawm hi hman a\angin tih\hanah ka neih tawh a, ka tan chuan inkhawm \hulh mai hi a harsa tawh zawk” a ti. Thil tih reng reng hi a tirah ninawm leh hrehawm deuh mahse kan tih hram hram chuan taksa leh rilru in ngaia neih chin a nei a, a tur ve reng emaw tiin harsa ti lemlo takin kan ti zui ve tawh mai \hin. Hetiang chiah hian Pathian Biak Inkhawm pawh hi Habit-a neih theih tur khawpin chhunzawm \ha ila, a tir lamah chuan inkhawm \hulhna tur chhuanlam \ha tak tak pawh kan hmu ngei ang, mahse, kan taksa leh rilru in a pawm hunah chuan inkhawm \hulhna chhan tur chhuanlam singkhat chuang hmu mah ila, inkhawmna chhan tur pakhat chauh pawh kha kan inkhawm pui em em ang.
Kan \hianpa pakhat chuan, “Ka inkhawm loh chhan hi thil dang teh chiam a ni lo, ka inkhawm lo laklawh mai mai a ni” a ti a, a dik ang. Inkhawm loh laklawh a awm chuan inkhawm laklawh pawh a awm thei ngei bawk ang. Chuvangin, Pathian Biak Inkhawm hi Kristian Habit-te zing a mi a ni tih hriain, habit-a nei tur khawpin taimak i chhuah ang u.

Thukharna :
                     Khawvel hmasawn zelah tunlai mizo \halai tam zawk rilru en hian Kohhran Pathian Biak Inkhawm hi ‘a tam lutuk’ tia kan tihtlem hun ala awm mai thei, Inkhawm tur inhmuh zawh loh avanga kan Biak In kan khar sup sup hun pawh ala thleng mahna! Mahse, \hangthar te hian Pathian Biak Inkhawm hlutna kan hriat a, kan ngaih pawimawh telh telh erawh chuan he ramah hian Biak In a ding reng ang a, a tlusawp ve ngai lo ang.