Krista Rilru: Inngaihtlawmna

KRISTA RILRU

(Philip. 2:5-9; Rom 11:36-12:2; Exo: 32: 31-32)

Introduction:

            Thuhriltu tam takin tunlai thalaite nundan sawi nan leh dem nan ‘It’s my life’ ‘Hei hi ka nun a nia, I sawi ve tur a awmlo, ka duh dan danin ka nung ang’ tih thu hi an hmang a, kan lo ‘amen – pui viau a, “kan thalaite tak hi chu aww”, kan tifo thin. Mahse, he thu hian thalaite mai nilo, tunlai khawvel a her danglam tawh zia te, Kohhran huang chhung meuh pawh min luhchilh nasat zia hi kan chhut ngai em? Thalaite nundan leh rilru put hmang ni a kan hriat hi naupang, tleirawl, nu leh pa…mihring rilru put hmang hrim hrim zawk ani mai awm mange tih hial turin a tu ate mah hi kan banglo a sin.

            Tunah phei chuan ‘Selfie’ kan ti, a larna ala reiloh tehlul nen, nu leh pa thleng thlengin kan selfie ta sup sup mai a nih hi. Kum 2002 khan ‘selfie’ tih thumal hi an hmang tan a chauh a, tun a kan handset hman a kan hmuh, a hmalam a camera awm tel hi 2003 khan an siam chhuak tan chauh a ni, chutah pawh Selfie nilovin Video call nan. Engpawhnise, ‘Selfie hi a thalo e’ tih lam nilovin, mihring rilru put hmang a pholang chiang lutuk hi zir tham a awm ve hrim hrim. Mihring rilru lam zir mi te chuan ‘Selfie’ hian ‘mahni kan in ngaih pawimawh zia a pholang’ an ti. Ani tak e, Selfie a thla ka lak chuan KEIMAH ka lang chiang ber a, midang zawng chu a background ah, ka hnungah anlo lang ve chauh thin. Ka hnung a mi te kha eng ang paw’n lang tha mahse, keimah ber ka lan chhiat chhung chu ‘delete, delete, delete..’ a ni mai.

             Awle, tun tumah hian ‘Krista Rilru’ tih hi kan zirho ang a, eng ang rilru pu tur nge kan nih tih zir chhuah kan tum ang.

1. Krista rilru: Philippi mite hnena Tirhkoh Paula’n lehkha a thawnah khan chiang takin a sawi a, “Krista Isua rilru ang hi nangni pawhin pu zel rawh u. A ni chu Pathian anpui ni mah sela, Pathian tluka awm chu tum tlat turah a ngai lo va, mahni inti tlawmin bawihah a in siam a,…a inngaitlawm a…” a ti. Amah Isua ngei paw’n ‘ Thuhnuairawlh leh inngaitlawm ka nih hi’ a ti bawk a. A rawngbawlna zawng zawng nen a en khan ‘Krista Rilru chu Inngaihtlawmna hi a ni. Chu rilru ah chuan mahni indah pawimawh berna a bo a, Pathian leh mihring tana rawngbawl chauh a pawimawh. A zirtirte ke a silsak tum khan engtin nge atih kha? “ Kei Lalpa leh zirtirtu mahin in ke ka sil chuan, nangni pawh in ke in insilsak tur a ni” ati. He rilru hi a ni Tirhkoh Paula’n ‘pu ve rawh u’ min tih ni.

2. Inngaihtlawmna chu enge ni?

            Rev. Lalsawma chuan “Mizotawng a Inngaitlawm tih hrim hrim hi a diklo, mahni ‘inngaih’ ‘in teh’ ‘inhmuh dan’ lam anilo, chu ai chuan in teh ngailo nun tlawm leh thianghlim a ni zawk. Inngaihhniam te, tling lo nia inngaih te, mite tluk ve lova inhmuh te, mahni nepzia inhriatte hi inngaihtlawmna emaw kan ti thin a, mahse, ani mai lo, chapona lam chan a ni zawk’ a ti.

            Inngaihtlawmna han tih hi ahming pawh a mawi a, chutihrualin, sawifiah thiam hi ava har si em! Rev. Lalsawma sawi ang deuh khian inngaitlawm emaw kan tih hi alo nilo fo thin a, ‘kan lo tlawm der’ zawk alo ni. A thente hi chu ‘kan in ngaitlawm deuh ar thin’ awm e! Mipa khat chu a inngaitlawm leh lutuk a, a bialnu in, “Ka hmangaih lutuk che” atih te hian “a ngai love” ati anti. Heti em em a inngaihtlawmna hi chu kan sawi tum a ni lo e.

            Inngaitlawm sawifiah nan Lal Isua erawh chuan Naupang a hmang a, “Chutichuan, inngaitlawm a, he naupang anga awm chu vanrama ropui ber a ni ang (Mat 18:4)” ati. Naupangte hi an inngaitlawm meuh em? Rilru lam zir mite chuan heng hunah te hian thudik kan sawi chhuak thin an ti – Thinrim lai, zu ruih lai, leh naupan lai. Naupangte hian inngaihtlawm an tum hranlo, inngaitlawm tih pawh an in hre ngai lemlo. An nihna angin an nung tawp mai a, anmahni lam an in teh ve vak vak lo, rilru tluang takin an nung tawp mai a ni. Han hau vak mah ila, min haw rei chuanglo a, thil lo tisual palh pawh nise pawi ti awm em em in an awm chuanglo, dawt sawi te hi an va thiamlo tak em! Vervekna rilru an pu lo a, elsenna in hmun a luah heklo, anthill tih apiangah an in chiah pilh thei zel a, mahni infak chawp lam anti ve ngailo. He rilru tak hi a ni Lal Isua’n a hmuh fuh a, entirnan a naupang a hmanna chhan chu.

            Chapona atang hian inngaitlawm awmzia hi a chiang leh zual awm e, inngaitlawmlo chu chapo anni mai. Chapona hi ani law’mi Lucifera meuh pawh a tluk chhiatna chhan kha. Chapona chu mahni induhsakna, mahni hmasialna, midangte chung a indahna, Mahni indah pawimawh ber na ( Extreme Self-centerness) a ni. Chuti a nih chuan Kristian inngaihtlawmna chu Mahni aia Pathian leh midang dah pawimawhna, mi dang rawngbawl sakna, mahni inphat nun alo ni tawh ang. Mi inngaitlawm chu Krista rinchhanna ah a awm avangin Chapo thei a nilo a, chhhuan tur a duh anih paw’n Kraws bak chhuan tur a hrelo.

3. Mihring rilru put hmang: C.S. Lewis chuan “Khawvel pian tirh a ta ram zawng zawng leh chhungkaw tin deuh thaw a buaina leh harsatna thlen tu chu Chapona (Mahni in duhsakna, indah lenna) hi ani” ati. Kan Pathian thu kalpui dan hei hian a hril thui khawp mai, mahse, kan sawi hma in khawvel ram zau zawk thlir hmasa teh ang.

            a) Politics ah: Rual u zawk te chuan Cold war antih vanglai kha kan hre pha fur ang a. USSR leh America an in ep a, lam tang an zawng a, Nuclear indona te pawh a chhuah phah thelh thelh kha. Khawvel awptu zawk nih an duh vang a ni. “Keini hi chak ber ila, ram dang hi awp ila, kan thuhnuai ah awm se,” tih kha an tum a ni. Khawvel sawrkar chak ho Foreign policy (Ram dang laka an hmalakna) atang hian politics lama mihring rilru put hmang a chiang viau awm e. Middle east buaina kan hria a, Syria tualchhung buaina ah ram dang leh ram dang an in bei a, Iraq te pawh kha US in chhuanlam chhete hmangin a lak hmak mai kha. Tunah Iran nen buaina annei chho leh ta. Chutih rualin Russia pawh abang biklo, Turkey leh Syria ram buaina ah te thuk takin a in rawlh bawk. Heng ram ropuite hian engvangin nge sum leh pai tam tak seng a, mihring nunna hlu tak thap a helai ram hi an veh veh le? Khawvel ah remna leh muanna siam an duh vang a nih kan ring em? A nilo, Oil vang a ni. Remna leh muanna awm tur a an duh tak tak a nih chuan an tan a hlawkna awm let miahlo tur, ram rethei, Oil nei velo Africa ramah te khuan ram buai tak tak a tam a sin. Hei hi a ni Politics tak a khawvelin Mahni tanghma a haina chu. “Kan ramin hlawkna kan hmuh chuan enge pawi? Kan hlawkpui dawn phawt anih chuan midangin lo tuar mahse a pawi hleinem” tih hi an rilru put hmang a ni.

            Mizoram pawh hi kan bang biklo, kan party hlawkna tur anih a, keimahni hamthatna tur  anih chuan ram, khua leh veng te pawh hian lo tuar deuh mah se pawi kan tilo tlang chu a nih hi. Sawi tur ava tam em! Party workers leh Politics boruak hap pha chin tam zawk hi chuan Block leh Unit level hi kan thlen theih chin chu a ni hrih a. Engvangin nge Politics hi ka luh chilh? Engvangin nge party ah ka hming ka ziah luh? Heng zawhna pahnih te hi “ram leh hnam hmasawn nan” ti a kan chhang theilo a nih chuan “keimahni tan, keima mimal hlawkna atan” tih hi kan chhanna ani anga, a chung a kan sawi ram ropuite policy tenawm tak te nen khian ‘ek saman’!

b) Pathian thu kalpui danah: Mi tam tak hian mizo kristian nawlpui ten Pathian thu kan kalpui dan te, eng ang Pathian thu hi nge kan tuipui tih te hi kan chhut ngai em? Piantharna chungchang kan chawilar tak em em atang a kan thlarau nun, anilo zawng a kuai hertu pakhat chu ‘Chhandamna hmasial’ hi a ni. Kan Pathian thu kalpui dan tam tak hi chik tak a en chuan ‘theology hmasial,’ mimal chhandamna chauh buaipui thin kan ni tlangpui. ‘Keimah leh Pathian inkar a fel chuan a tawk’ tiin keimahni kan in teh ngar ngar a, a changin kan in teh tling a, kan hlim deuh a, a changin kan tlinglo a, kan mangang leh a. Kohhran a ro deuhin “midang’ kan mawhpuh a, Kohhran hnawnna hnar a tan chu khawi lamah ani ringawt.

Mizote hian Harhna lian tham tak tak tum 7 kan tawng tawh a, a tawp lam tum thum (1984, 1990, 2014) hian ‘Tlawmna, inngaihtlawmna’ tih hi thu kenah annei vek. Pathian hian tlawm tur in min duh tak em! Mizo Kristian te hi inngaihtlawmna nun nei turin min va ti nasa em ka ti thin. Mahse, inngaihtlawm hi kan harsat si a ni! Inngaihtlawmna hi han chhut chian tak tak phei chuan Hmangaihna te, remna te kan neih theihloh fo chhan hi alo ni thin zawk. Chuvangin, he inngaihtlawmna nen hian bul I tan tha leh ila, kan rawng bawlna pawh hian awmzia a nei nasa zawk ngei ang. Kohhran committee, KTP hruaitu, Kohhran Hmeichhia leh Pavalai lam te pawh, rawngbawlna kan kalpui danah hian eng ang rilru nge kan put tih ngaihtuah thar ila, keimahni nuam tih chen, peih chen, leh vei chen ah zel hian rawngbawlna hi kan kalpui em? ‘Keimahni’ lam hi kan dah lian thin em? Rawng kan bawl saka te aiin rawngbawltua hi kan in dah lian zawk thin em? Sawi tur ava tam a ni. Engpawhnise, Inngaihtlawmna ah chuan Mahni alian theilo a, Krista leh kan rawngbawl sak tur te zawk hian hmun an chang lian zawk thin.

4. Engtin nge Krista Rilru kan put theih ang?

            Hei hi a harsa lai tak a ni. Krista rilru pu tur kan nih thu hi chu kan hre zing viau in ka ring. Mahse, kan pu hleithei thinlo hi a buaithlakna lai a ni. Put chu tha kan ti, put pawh kan duh, mahse, put duh dan, put tum dan kan neih tlat thin avang hian kan pu fuh hleithei thinlo. A then hi chuan kan pu emaw kan ti a, mahse, Krista rilru lan chhuah tir hunah kan tilang leh hleihthei silo a, keimahni mihring lam rilru hi alo lian leh thin a, kan buai zo thin.

            a) ‘Pathian khawngaihna leh thatna a in nghah’: Tih theih leh theih loh chungchanga Isuan Petera a chhanna chu ‘Pathian nen chuan engkim tih theih a ni (Mat. 19:26)’ tih a ni. Chuvangin, he nun ropui tak hi keimahni mihring mihrinna chuan kan nei hlei thei silo a, Mahni hmasialna te, chapona te kan nei leh thuai mai thin si a, Thlarau Thianghlim hnathawh hi kan mamawh a, Pathian thatna ah kan innghah angai a ni. Anih chuan, Kristian inngaihtlawmna thuruk chu Pathian thatna rinchhan tur a ama hnena tluk luh hi a ni mai. Mahni tlinna emaw tlinlohna emaw hisap rilru hawisan a, Pathian thatna rinchhana kal anih ber mai chu.

            Rev. Lalsawma bawk khan atia lawm, “Pathian khawngaihna lam hawi si lova, mahni sualna hmuh chian tum hi chapona kawng zawhna a ni zawk”. A ni tak e, mahni inngaihtuahna rilruin kan khat a, tawngkam mawi tak tak pawh kan hmang a ni thei, inngaitlawm chu a ang ve viau ang; mahse, Pathian hnen a thlen siloh chuan a tlawm tak tak theilo a ni.

Pathian thatna leh A khawngaihna hmuchiang tak tak tute hi chu an in ngaitlawmlo theilo a, an rawngbawlna ah te khan an va tlawm chiang tak em! Pathian in Israel fate sualna avanga tihhlum vek a tum tum te khan Mosia kha ava tlawm chiang tak! “An sual hi I ngaidam thei thlawtlo anih chuan I mite hming ziakna bu ata ka hming kha thai bo mai ang che (Exo. 32:31,32)” tiin Pathian a dawr a sin. Keini chu ni ila, “Ani teh tak e, an sual emai, an luhlul bawk si, thuawi bawk silo, ti hlum phiar la, keimah atang chuan hnam thar han din law law teh” kan ti duh hial mai thei a ni.

Tirhkoh Paula te khan a mihring lam thiamna leh theihna, Pathian tana a thahnemngaihna kha han chhuan ve hlak ava chak thin tak em! Pathian Khawngaihna leh thatna kha hmu chiang hle lo se la chuan, “Chapona sualah” a tlu lut ve hial mai thei a ni. Hebrai mi, Pathian thuthiam hmingthang Gamaliela zirtir chhuah, Rom mi nihna nei, khawvel finna leh thiamna lam a mi duailo, rawngbawlna lamah lah mi dangte ai ai a thahnem ngai leh tuar nasa zawk emaw tih hial theih tur a thawk rim khan Pathian khawngaihna leh thatna lam a thlir tlat a vangin “A chhuang apiangin Lalpa chu chhuang rawh se” ati. A awmzia chu, chapo vena tur I duh a, in chhuanna tur iduh a nih chuan nangma theihna leh thiamna, tlinna lam kha nilovin Pathian zawk hi I inchhuanna tur a ni. Pathian khawngaihna leh thatna dawngtu inih kha in chhuanpui zawk rawh atihna ani ber.

b) Rilru tih thar, rilru put hmang thlak danglam: Hei pawh hi a chung ami ang tho bawk a ni. Pathian khawngaihna avang hian Pathian hnen ah kan inhlan a ngai. Rom 12:1 thu hi bung 11:36 zawmna ani a, a chhan chu “Chuvangin,” ti a bul rawn tan anih vang a ni. Bung 11:36 ah Tirhkoh Paula thusawi chu “Thil zawng zawng zawng hi Pathian atanga lo awm, amah avang leh ama tana awm ani” ati, tichuan a sawi thla zel a, “He khawvel awmdan hi tawm suh u, in rilru tih thara awmin, lo danglam vek zawk tawh rawh u.” ati. He khawvel awmdan atih hi enge kan tih chuan “mahni hmasialna, chapona, Mahni in ngaih pawimawhna, inhaivur bikna” hi a ni. Politics lam ani emaw, kan khawtlang nun leh ei zawnna lam pawh nise, ‘Mahni tana chakai khawrh’ tih hi khawvelin min zirtir dan a ni thung si.

Tum khat chu Nu pahnih hian an fate school kal tur an thlah a, an piah lawkah chuan inhlawhfa pakhat hian kawng alo siam mek bawk a. Nu pakhat zawk chuan a fapa hnenah chuan, “School I kal that peih loh chuan saw pa ang sawn hna ila thawk ve mai ang” tiin a zilh a, chutihlaiin, nu pakhat vet hung chuan, “Mama, taima takin lehkha zir la, saw laia patling inhlawhfa chawp te saw ila tanpui dawn nia” tiin a zilh ve thung.

Inngaihtlawmna nun nei tur chuan he khawvel awmdan hi kan bansan a, kan rilru kan thlak angai a ni. Tirhkoh Paula hian ‘Chapona, mahni indah pawimawhna’ hi mihring rilru lam atang a rawn chhuak a ni tih a hrechiang viau niin a lang a, he rilru pu chung chuan Pathian duhdan leh A lawm zawng pawh a hriat theih loh ati hial a ni. A lehkhathawn a sawi tam em em pawh ‘Krista a khenbeh anih thu te, Krista bawih anih thu te ani. Rom khua a amite hnena a sawiah pawh khan, “Tunlai khawvel awm dan hi tawm suh u” atia, a duh tawk mailo “In nunphung chu tihdanglam  ni vek rawh se” ati, ala duh tawk mailo, a tih danglam bul tanna lai tur hrilh in “ in rilru tihthar a awmin” a ti kher a ni. Chu rilru chu tih thar anih loh a, ‘Pathian aia Mahni’ a chungnun chhung chuan Pathian duh zawng, tha leh lawm tlak leh that famkim chu hriatthiam ngaihna a awmlo a ni a ti.

Chuvangin, Inngaihtlawmna nun nei tur chuan Engkim hi Pathian vang leh Pathian tana lo awm zawk a ni tih hria a, ‘Keimah’ ngei pawh hi ‘Pathian vang leh A tan’ a nung mai tur ka ni tih inhriatna rilru kan put a ngai a ni.

Conclusion: Kan tlin lohna lam hlir kan sawi a, kan chhe ta viau emaw tih a awl khawp mai. Mahse Baal hma a thingthi ngailo, inngaihtlawmna nunpuitu hi mi tam tak in awm tih ka hria a, chuvang anih ka ring, Pathian hian kan chungah hremna ala lek loh ni. Engpawhnise, Rawngbawltu kan ni emaw nilo emaw, Kristian kan nih tawh phawt chuan ‘inngaitlawmna nun’ nen, LalIsua hnung hi I zui ang u. Amen.