MAHNI MAHNILOHNA (Against Individualism)

MAHNI MAHNILOHNA

I Cor 6:19-20; Rom 12: 1,2; John 15: 12,13

            Thianza ho in thlalak kan en a, mahni kan in zawng hmasa ber thin. Selfie khawvel a cheng kan nih miau a vangin, thalai leh tleirawlte thlalak tam ber ah pawh ‘Cameraman’ kha alang lian ber ah a tan tak hi!!! Kan thiante emaw midang, thlalak a lang ve se kan tih chu a background a tan kan hmang a, a chhan chu ‘keimah’ kha apawimawh ber ka nih vang a ni. Ka hnung a awm ka thiante kha lang tha viau pawh nise, keimah ber ka lan chhiat miau chuan ‘la tha leh ang, a diklo’ kan tia, kan lak nawn pui sek thin ani lawmi?

            Tunlai sport bike rawn chhuak thar ho te hi kan lo chik ngai em? Thalai leh tleirawl te bike duh zawng chu leh nalh tih zawng hian passenger neih a support lo, midang tel ve a rem lo. Kan in phurh tir lui hram duh a nih pawn mawng er tau a chuan a ngai a, kan chuang bungbu vu mai a nih hi. Kan nu leh pa, rual u zawk te hunlai a bike rawn chhuak reng reng te kha chu a seat zawl, kham phei de daw, thut ngil auh theih kha ania, khang hun lai a kan leklam ber Scooter te pawh a seat a zawl mai a nilo, Bajaj company siam thenkhat te phei kha chu a driver leh passenger thutna a hrangin a awm thlap mawle! Heng zawng zawng hi Company lamin an hmuh chhuah thar thut a nilo, a seat hnung pawng emaw, ‘ing euh deuh a thut theihin siam teh ang’ tiin kan 2wheeler pian hmang hi an rawn thlak danglam reng2 lo, tunlai mite rilru, duhzawng leh suk thlek milin an rawn duang chhuak mai a ni. A chhan chu ‘keimah’ kha ka in dah pawimawh ber a ni tih an hriat vang a ni.

            He rilru puthmang, ‘Mahni in dah pawimawh berna, in pathianna, a center ah mahni indahna (Individualism) hi thil thar a ni lemlo a, mihring nun a bet ve pakhat mai ani, mahse, he rilru hian nasa takin Kohhran ah bu a khuar a, kan hriat hauh lovin kan Pathian thu pawmdan leh kalpui dan thleng nghawng a nei ta…Kohhran huang pawn lamah phei chuan nasa tak a ni ringawt tawh! Tun tumah hian ‘Mahni mahnilohna’ tih thupui a hmang kan chhui zui dawn a ni.

1. Mahni indah chungnunna: Mihring hian mahni tawk a indah chungnunna kan nei vek a, sawisel aiin fak kan lawm a, min sawiseltu awm se min sawiselna thu aiin min sawiseltu kan en a, min sawiselna thu leh keimahni kha buk lung pakhat a khai dun mai tur kan nih laiin min sawiseltu zawk kan khai a, “a ni pawh enge a nih bik?!’ kan ti ta tun tun thin.

            Mahni in dah chungnunna ah chuan keimahni hi a laiah (center ah) kan awm a, a tehtu ah kan tang a, kan duhdan leh ngaihdan a ni em? Tiin tehna hrui kan pawt kual thin. Entir nan; Inkhawm ka peih loh viau chuan keimah lam en hmasalo in midangah ka en a, zaihruaitu, inkhawm hruaitu, thusawitu leh inkhawm thinte ka teh kual a, ka inkhawm peih loh chhan chhuanlam ka zawng thin. Ka inkhawm peihloh chhan zawngtu kha keimah ka nih miau avangin midang kha ka inkhawm peihloh chhan anni thin. Chutiang zelin, inkhawmna a ka zai tuiloh chhan te, ka lam that peih loh chhan te hi keimah lam ai chuan midangah a chhan ka zawng a, tehna ka lekkual thin. Hei hi a ni Mahni indah chungnungna chungchang chu!

            Keimah hi ka pawimawh ber a, ka duhdan leh pawmdan, ka ngaihdan kha ka tehna sang ber a nih avangin ka duhdan in thil engkim hi awm se ka ti thin a, a awmlo a nih chuan midang thiamloh a ni mai.

            He khawvel lai tak (center) hi khawilai nge kan hria em? Keimah hi a ni. Mahni indahsanna leh in ngaih chungnun berna chungchang hi ngun deuhin ngaihtuah ila, mihring rilru put hmang a ni. Kan zavai a kan neih a ni a, phat theih pawh a nilo. Engvangin nge mi thenkhat hi Rau kan tih, thusawi thiam kan tih a, zaithiam kan tih em em? Kan rilru in a tha a tih vang a ni, Keimah khan tha a tia, mawi a tia, a rin vang mai a ni. Engvangin nge thenkhat hi kan eiloh, kan huat a, kan ngei em em? Ka rilru in a pawmloh vang a ni. Kan hrethiam em? Engkim a tha leh a chhia, mawi leh nalh, duhzawng leh ngei zawng, tul leh tullo zawng zawng kha ‘keimah’ a tang a ka teh vang a ni. Heng zawng zawng lo awm theihna chhan chu ‘Keimah ah keimah hi a lian ber ka nih vang’ a ni.

            Sipaiho in fiamthu a an sawi thin chu, “Mitthi tawh an kaisang ngailo” anti. Fiamthu mah nise mihring rilru a phawk chhuak tha viau a sin, va thih chilh rap khan amah ah enge hlawkna a pek? Thih chilh lovin tlanchhe ta zawk se, amah ngei khan hlawh ala la anga, kaisanna chance ala nei zawk bawk ang.

            Kan hrethiam ang chu maw…Mahni indah chungnunna, in dah pawimawh berna hi kan hriat lem loh hian kan lo nei nasa viau thei a ni.

2. Kohhran leh a pawn lam a nghawng dan:

            Mahni indah pawimawhna hian mihring nun a luah thuk hle kan tih tawh kha…mihring rilru puthmang a ni zawk awm e. Chuvangin, thil thalo em em emaw, diklo em em a ni lemlo. Mahse, thil dang zawng zawng aia Mahni anih tawh chinah chuan ngaihtuah chian ngai tak a ni thung a. Mihringte hi duhthlanna nei a siam kan ni a, hei hi thilsiam dangte nen kan danglamna tak pawh a ni awm e. Sava pui chawmlai hian a note te eitur a pek chu tha takin an ei mai…Mahse, nausen hian duh zawng leh duh loh zawng a nei hma khawp a sin. Chhia leh tha hriatna fim tak a kan hman theih hma hauh hian duh zawng leh duh loh zawng kan nei daih tawh. Chumi awmzia chu ‘Mahni’ kan in ngaih pawimawhna hi kan hriatthiam hma daihin kan lo nei tawh tihna a nih chu.

            Awle, tawite te in tunlai khawvel a he thil in nasa tak a Kohhran leh a pawn lam a nuai dan chik zawkin bih ila:

            1) Kohhranah: Mizo Kristian te Pathian thu pawmdan a thil langsar leh kan buaipui ber “Piantharna’ chungchang hi kum 1960 hnu lam thleng, tun thleng a kan la buaipui a ni a, thenkhat chuan “Gospel camping te hi awmzia awm lo mahse a thlakna tur tha zawk kan hre  bawk silo” anti thin. Kan Pathian thu kalpui leh pawmdan kan thlak hma hi chu Camping aia tha hi kan la duang chhuak lovang. He piantharna in Pathian thu a kalpui dan chik tak a ngaihtuah chuan “Mimal chhandamna a dah pawimawh ber a ni”, a awmzia chu “Keimah’ kha ka pawimawh ber a nih chu. “keimah leh Pathian inkar a fel chuan a tawk’ tiin keimahni leh Pathian inkar chinfel tum reng reng in hun kan hmang ral a, ‘Rawngbawlna awmze dik tak chu midangte rawngbawlsak hi a ni’ tih hre mahila rawngbawlna kan kalpui danah hian Keimahni hi a lian berah kan awm lawi si!

            Mi thenkhat in an sawidan phei chuan mimal chhandamna uar lutukna hian mahni chauh indah pawimawhna a hring a ni anti. Piantharna chungchang hi kan sawisel a nilo, atha lutuk, mahse a famkim lohna lian tak chu hei hian khawtlang nun siamtha turin mimal pianthar tir a tum a, entirnan zu zawrh chhan nuaibo tum aiin zu in thinte a vei a, kalphung  (System) diklo siamthat aiin mihring mimal nun diklo siamthat a dah pawimawh hmasa zawk thin. (Mother Teresa an sawiselna ani pakhat ani bawk).

            Hei, Khuangpu a ka tan ve tak zeuh zeuh ah chuan thil hriat chhuah pakhat ka nei a, ka sak nuam tih zawng leh duh zawng anih chuan khuang hi ka vaw tui a, theihtawp chhuah pawh a awl a, kei pawn ka sa tui viau zel…mahse, Ka sak chak vak loh, tuipui vak loh a nih tum chuan keimah ber kha ka tuilo a, ka tang lo a, midang tan pawh sak a har phah thin. A nih chuan tunge thiamlo? A hla vang kha emni? Nilo, keimah kha a ni, a center ah ka indah a, kha khan khuangpu ka nihna ang a ka rawngbawlna kha a lo phuar nasa viau mai tih ka hriat chhuah phah ta ani. Mahse, Khuang vuak ka thiam ta viau e ka tihna a ni miahlo a nia.

            Sawi tur a tam khawp mai, kan sawi senglo. Mahse, he pawmdan ‘mahni indah pawimawh berna’ hi kan man thiam a nih chuan Kohhran a kan rawngbawlna leh rilru put hmang hi thlir let ta ila, kan ngaihdan hi kan thlak hlawk in ka ring.

2) Tunlai khawvel ah: Selfie leh sport bike chungchang te kan sawi tawh a, “Mahni indah lenna’ boruak in min tuam nasat tawh zia hi a chiang tawh viau mai. Hmani lawkah MLA kan thlang zo chiah a, kan inthlan boruak te han thlir kir khan Zoram Politics te pawh “Mahni awmna Party chu a tha ber, Party dangah mi tha an awmlo’ tih rilru pu hi kan tam awm a sin. Kan Party a tlin theihna tur anih chuan midangin lo tuar deuh pawh nise, keimah berin ka hlawkpui dawn  anih chuan a pawina awmlo’ tih te hi mi tam tak rilru a ni ta.

He lam pang sawi chuan khawvel hmun dang hi a sawikai loh theihloh. Engvangin nge Syria te, khulai middle east antih, ram buai ah te khuan khawvel sawrkar lianho an in rawlh nasat em em, an sipai an tir lut a, mi ramah ram dang leh ram dang an indo a…Thil chik ho chuan eng dang vang a nilo ‘Oil’ tam vang a ni anti. An ram tan a hlawkna leh thatpuina a awmloh chuan sum tam tak sengin an in rawlh hauhlo ang. Africa ram a buai em em a, tualchhung indo na nen mi tam tak an thi a, an ram tundin leh nan leh siamthat nan khawvel ram hausa te hi zuk che tak tak miahlo a, a chhan chu ‘oil’ a awm ve tlatlo. Sawi tur a tam….

Kan Kohhran huang leh pawnlamah pawh hian he thil hian nasa takin kan rilru a hruai chho ta niin a lang a, ‘Keimah’ ka indah pawimawh ber tawh chuan a tuartu chu midang anni ngei ngei thin.

A tawp nan chuan kan Pathian thu in engtin nge  atih?:

Kan Bible hian ‘Mahni indah pawimawhna neih map lova awm tur hi chuan min ti lemlo a niang, kan hlut zia min hrilh fo a, mahse, Mahni tanghma hai tak a rawngbawl emaw chu rilru put erawh chu a dem hle thung a ni. Tawite te in en ila:

1) Israel te ah: Pathian in Abrahama a kohchhuah tum a, a thusawi tawp lamah khan mal a sawm tur thu a sawi hnu ah “Khawvel a hnam tin reng I zarah annihlawh ang” ati. Israelte chanchin kan en chuan hnam dang nen a indo tam viau mahse Pathian thil tum erawh chu ‘Khawvel entu’ ni tur a dinchhuah a ni. Mahse, kha kha Israelte khan an hai a, malsawmna an dawn leh Pathian Kohna kha anmahni hnam bil tan a pumbilh an tum tlat avangin Lal Isua meuh pawh anlo hai phah ta a ni. Pathian in Ninevi khua a Jona a tirh te khan a hreh ngawih ngawih zia kha…Jentail khawpui Ninevi kha kangral vek mahse pawi a tilo reng reng.

Kumin ah Juda lalte chanchin kan zir, an zing a pahnih khat tihloh chu a hun tawp lamah Pathian duh loh zawng anti vek. A thiltih a langsar tak chu Chapona, mahni in dah pawimawhna, Pathian aia Mahni indahsanna kha a ni. Hei hi a ni Lucifer-a meuh pawh a tlukna kha.

2) Lal Isua ah: Lal Isuan rawng a bawl phat atanga a rawn tihlan ber chu ‘Midangte tan a nun’ kha a ni. An zeldin dan pakhat phei chu Setana’n lung chhang a chantir tur a athlem khan, kha a thiltihtheihna kha amah eitur bik atan hmang lovin mipui sangnga hraina atan a khek zawk ani anti.

            A zirtirte pawh a chah ngawih ngawih chu inhmangaih tawn rawh u tih kha a ni. Inhmangaih tawnna sang ber pawh ‘midang tan a nun pek’ anih thu a hrilh a, chu chu a mah ngei pawh a hlen a ni. Lal Isua zirtirna ah khan ‘Mahni’ lam a langsar tawhlo a, ‘midangte tan’ tih kha a thupui ber a ni. Engtin nge Krista rilru an sawi kha? “Ani chu Pathian anpui ni mah sela, Pathian tluka awm chu tum tlat turah a ngai lo va, mahni intitlawmin bawihah a insiam a….”

3) Tirhkoh Paula zirtirna ah: Tirhkoh Paula hi theologian ropui tak, Lal Isua zirtirna rawn sawi zau a, ching leh zual a rawn chhuitu a ni bawk a, ani ngei pawh hian “Mahni ta pawh inni tawh hleinem, mana lei inni tawh zawk a sin” tiin chiang takin min hrilh a ni.

            Tirhkoh Paula hian ‘Mahni indah pawimawhna’ hi mihring rilru lam atang a rawn chhuak a ni tih a hrechiang viau niin a lang a, he rilru pu chung chuan Pathian duhdan leh A lawm zawng pawh a hriat theih loh ati hial a ni. A lehkhathawn a sawi tam em em pawh ‘Krista a khenbeh anih thu te, Krista bawih anih thu te ani. Rom khua a amite hnen a a sawiah pawh khan, “Tunlai khawvel awm dan hi tawm suh u” atia, a duh tawk mailo “In nunphung chu tihdanglam  ni vek rawh se” ati satliahlo, a tih danglam bul tanna lai tur hrilh in “ in rilru tihthar a awmin” a ti kher a ni. Chu rilru chu tih thar anih loh a, ‘Pathian aia Mahni’ a chungnun chhung chuan Pathian duh zawng, tha leh lawm tlak leh that famkim chu hriatthiam ngaihna a awmlo a ni a ti.

            Conclusion: Engpawhnise, tunlai khawvel awmdan kan hria a, mahni tanghma hai, mahni indah pawimawh, mahni hlawkna um hi kan pung telh telh a, Kohhran huang leh pawn lamah pawh he thil hian nasa takin kan rilru put hmang a hruai mek. Keimahni aia midang dah pawimawh vek chu a harsa a ni mai thei e, kan Lal Isua ngeiin a sawi, thupek ropui ber dawttu, a ropui ber nen pawh a in tluk tho “Nangmah I in hmangaih angin I vengte I hmangaih tur a ni’ tih hi kum 2019 ah hi chuan kan Pathian thu kalpui dan nise, Pathian thu hi Mahni mahnilohna a ni si a. Amen.