Pathian thu chhuak reng reng thiltithei lovin a awm lovang

Pathian thu chhuak reng reng thiltithei lovin a awm lovang

Lk. 1:26-38

a) Engkimtithei Pathian leh a thu a inzawm tlat

b) Marin Isua a hring dawn tih Vantirhkohvin a puang.

c) Marin Pathian thu chhuak a ringhlel lo.

Introduction:  Zanin a kan chang thlan hi Krismas dawn apiang a sawi chhiar hlawh tak a ni a, tin, Mari thusawi, ‘Ngai teh, Lalpa bawihnu ka ni, I thu ang chuan ka chungah thleng rawh se.’ tih te phei hi chu vawi tam kan ngaithla tawh awm e.

Naupang pual: Mipakhat hian ti hian a thil tawn a sawi a, “Tum khat chu Christmas hmang tur a kan khua a ka haw hi, kal kawng petrol pump bulah ka bike hi a nung theilo tlat mai a, a tlai tawh si a engtia tih chi nge ni ang tih ka ngaihtuah mek lai chuan Sumo pakhat hian pump ah petrol a rawn la a. Ka va pan hnaih chuan Driver bakah nu pakhat leh afate niawm tak pathum hi anlo thu a, chunu chu tap zo hlim tih hriattak hian a mit alo val deuh kal a. Ka rilru ah engemawni a rawn lang zawk a, chu nu va pan hnaih pah chuan, “Buaina intawk emni?Tanpui theihna che u ka nei em?” ka va ti a…Chu nu chuan, inthlahrung takin, a bul a mi chu afate annih thu te, Sumo fare pawh anneih loh thu te, a pasalin a hnawhchhuah rum rum avang a  zanriah pawh eilo a anu, tar tawh tak, hmeithai, awmna khua pan rawi mai annih thu min hrilh a. Chuthu ka hriat chuan eng khaw sawi set set  lovin ka wallet ka phawrh a, ka pawisa neih zawng zawng chu  chu nu hnenah va pek pahin, “Kha hei hi la la, in mamawh inlei dawn nia, kalkawngah hotel a la awm chuan I fate nen chaw ei ngei ngei bawk ang che u,” tiin ka chah a. Chutah, chu nu chuan mittui parawl kuang hian, “Ka pu, Vantirhkoh antih hi ini em?” a rawn tia, kei chuan, “Ekhai, tun hunah te chuan Vantirhkoh ho chu an buai lutuk a, chuvangin, Pathian hian keini ang mi naran mai mai hi vantirhkohte hna thawkturin min ti ani” tiin ka chhang ta a. Ka bike awmna lamah ka let leh a, kan kick leh chu tha em em mai hian a rawn nung a, chutah tak chuan, Pathian in a hun takah, a duhna hmunah, ka bike chu alo thi ani tih ka hrechhuak ta ani” ati.

            Tun tumah ‘Pathian thuchhuak reng reng thiltithei lovin a awm lovang’ tih hi Isua Piantur thu hrilhlawkna nen kan ngaihtuahho dawn a ni. Mari chungchang sawi hi chuan a laizawnnu Elizabeti chung a thil thleng hi a sawi tel veloh theih loh a, thil in zawm tlat a nih vang a ni. Kum 2000  chuang liam ta a Nazareth khua a thil thleng hi I ngaithla nawn leh phawt teh ang u.

            Khatihlai khan Judai ram bial awptu chu Heroda ania, Judate kha Rom hnuai ah zalen ang reng takin  an awm a, Temple inthawina hlan pawh duh thalin an ti thei ani. Chung hunlai chuan Puithiam pakhat Zakaria a awm a, Puithiam chhungkua hrang hrang te khan hun bi inchhawkin Jerusalem a Inthawina hlan kha an kalpui a. zakaria hun alo thleng a, chutian rimtui a hallai chuan Vantirhkoh Gabriel-a a rawn inlar thut mai a, Baptistu Johan apian tur thu a rawn hrilh a ni. Gabriel-a chuan a thlun phelh ang zar zar in Johana hming turte, a awmdan tur leh anihna tur zawng zawng a rawn sawi nghal par par a…chuta Zakaria chhanletna chu ‘Chu chu engtin nge ka hriatchian theih ang?’ tih ani. Zakaria khan a awilo a, a awilo phal bawk silo niawm tak ani, chuvangin, chhinchhiahna a dil ta ni, mahse, a chhinchhiahna khawilamah, a tawng theihloh phah ta anih kha. An nupa kha an tar tawh em a, alo awi chiahlo anih paw’n a mawhlo e. Hei Bible ah hian tar tak tak hnu  leh upat viau hnu, beisei tawh loh hnu a fa nei hi kan hmu nual a, Abrahama leh Sari atangin Isaka,  Elkana leh Hanna-I atangin Samuel ate kan hmu a…hei tunah Zakaria leh Elizabet-I atangin Johana.  Miropui tak tak an la ni zui bawk nen Upat viau hnu a fa neih hi a Pathian thu zawk emawnile aw tih mai pawh awl tak a ni……mahse, kan veng Thalai thenkhatte tan chuan entawn ve chiloh mai thei a ni. Senior feeeee hnu a fa neih chauh te kha in lo tum ve ange, kei tiamlovin.

            He lai a Zakaria chungchang ka sawi duhna chhan chu…Mari hian Gabriela hnen atang tho in thu a dawng a, ani pawn awi harsa a ti a ni. Mahse Vantirhkoh hnen a a zawhna chu ‘engtin nge ni ang…pasal nei lai ka ni bawk silo a?’ tih ani. Chutah tak chuan Gabriela hian Pathian thiltihtheihna hmang a thil thleng tur anih thu a hrilh ta a ni. Chhinchhiahna a dil ve hranlo, a thlen theih dan tur zawk kha a zawt mai ani.

1) Engkimtithei Pathian leh a thu a inzawm tlat:

            Isaia 55:11 ‘Ka kaa thuchhuak pawh hlawhchham a kir leh rual a ni lo ve, ka duhzawng a ti zel ang, ka tirhnaah a hlawhtling ngei bawk ang’ tiin Pathian leh athu in zawmzia, thiltihtheihna a thuam anih zia kan hmu a. Ani taka, Pathian leh Athu hi a inzawm tlat a, a thu chhuak avang a amah pawh hi hria kan ni. Pathian inpuanna, Ama thu ngei kan hriat avang hian Pathian chu enge a nih, enge a duh zawng leh duhloh zawngte, a thil tum leh ruahmanna te kan hre thei ani.

            Thuthlunghlui hun lai khan Zawlnei te khan Pathian thu an tlangau pui a, chuta anthusawi tihchiannan chuan ‘Lalpa’n a ti” tih thu in bul an tan loh leh thu tlip nan an hmang thin. An thusawi, Pathian thu ngei chu Bible kan en chuan a thlen dik zia kan hmu zar zar reng a ni. Israelte saltan tur thu te, Kanaan ram anluah turte, Jerusalem chhiattur thute, Saltan tur thu te, Saltang chhuah tur thu leh Lal Isua piantur thu ngei pawh a takin a thleng chho vek. Pathian thuchhuah hi a hlawhtling ngei ngei a, ngaihbel mai mai emaw zeldin chawp ngial a bel chawp theih turin a thleng ve ngailo…chiang takin a ni athlen thin ni.

            Tunlai hunah enge Pathian thu kan tih chu nita ang? Bible hi a ni…hei hi Pathian thu, thiltihtheihna a thuam, thleng dik em em leh la thleng dik zel tur chu a ni. Chuvang chuan ania, ‘Rinna leh thiltih tehna diklo theilo’ kan tih thin ni. Tunlai kan khawvel chungchangte hi sawi zau a chakawm thin…Jerusalem hi hnam tin ruihna no ala nih tur thu a sawi lawk te hi ava thleng dik zel em? Khawvel ram tam zawk leh UNO ngei pawhin, Jerusalem khu tu ram khawpui bik mah nilo a, Palestine leh Israel te in rem theih nan a rawt a, Juda, Kristian, leh Muslim te khawpui pawimawh anih zel se an duh ani. Mahse Israel chuan kum 1950 daih tawh khan an ram khawpui ah an puang tawh a, tu ram mahin an pawmpuilo. Mahse tun hnaiah langsar takin Donald Trump-a, US President chuan Israel khawpui atan Jerusalem a pawmthu a rawn puang ta…a bul vel a Muslim ram te an lawmlo nasa ani. Pathian in alo sawi lawk miau avangin Jerusalem chungchang khu an la buai tulh tulh dawn a nih hmel…heti khawp a inremna kawng an zawng nasa chungin an inremlo tulh tulh chu ani si a.

            Kumin ah Puitling lamin ‘Thupuan’ kan zir a, Lei thar leh Van thar awm tur thu te, a hmasa an ral tur thu te kan hmu a ni. Tin, hun tawp lamah chuan ram leh ram indo tur thu te leh thil dang tam tak pawh kan hmu bawk. Kan khawvel politics boruak en hi chuan a ralmuanglo ani. North Korea buaina te, NATO leh Russia in ep na zawng zawng te…atam mai, khawvel hi a ralmuang tawhlo tak zet a, Nuclear ralthuam lam annei tawh ten an siam hlauhawm tulh tulh a, ala neilo ten neih ve dan an zawng a, engtikah emaw chuan keimahni ngei hian kan khawvel hi kan la tichhe mai thei ani. Indopui pahnihna hnu lam a, ralthuam lam a tlan tha duh tawhlo, thil dang a tan la nasa thin zawk Japan meuh pawn ralthuam lamah sum tam zawk an dah tawh tur thu te tun hnaiah kan hmu a. Kan khawvel hian chhiat lam a pan mek zawk chu a ni. Mahse, heng zawng zawng hi Pathian thu in alo puan lawk vek zawk chu a ni, ‘Ka ka a thuchhuak chu hlawhchham a kir rual anilove..’ ati miau mai si a.

 b) Marin Isua a hring dawn tih Vantirhkohvin a puang:

Isua piantur thu ah pawh hian Vantirhkoh Gabriel-a chuan Pathian thuchhuak Mari hnenah a rawn thlen a. Vantirhkohte hi chihrang hrang an awm a, kan Bible hmanlai ah hi chuan Serafim, Churub, tih te, Vantirhkoh chungnung Mikael-a leh Gabriel-a te hi ahming hmerh a kan hriat chu anni mai a, mahse Judate chanchin leh lehkhabu dang dangah chuan Vantirhkohte hi chi hrang hrang an awm a ni awm e. Khang bakah khan Rafael, Uriel tih te, tin, rindan pakhatah chuan mihringte hi vengtu vantirhkoh nei vek angin an sawi thin bawk.

            ‘Zankhat chu nula pakhat hi athiante inah birthday lawmin a leng a, zan tlai tawh takah khan amah chauh a haw a, an in awmna kha a piah deuh hlek avangin short cut, in awm mang lohna lamah chuan a kal ta a…chutah, a kal tumna lam mipakhat lo ding hi ava hmu ta phut mai ani. A hlau ang reng khawp mai a, han letleh dawn se ni theiin a hre bawk silo, chupa chuan a rawn um pha thuai dawn tho in a ring a…chutah, Pathian hnenah atawngtai ta a, a tawngtai zo chu maktak mai in thlamuanna riau kha a nei a, ngawirengin chu pa chu ava kal pel ta a ni. Atuk zing News ah chuan a hma zan a kalna kawngah hmeichhe pakhat pawngsual anih thu a zuk hmu taphut mai a, a hun an en chian chuan kha kawng a kalh pelh hma deuh mai a thilthleng kha alo ni leh nghal. Rang takin Police station ah a kal, a hma zan a a thil hmuh chu ava hrilh ta a ni. Chutah Police te chuan an mirinhlelh an man te chu an en tir diat diat a, chu nula chuan ahma zan a a hmuh pa chu a va thur chhuak ta nalh a, chupa pawh chu a inpuangzui ve nghal ta a ni. Chutah nula chuan zawhna a zawt ta a, “Nizan khan kha kawng kha keimah chauhin ka rawn paltlang a, engvang a himdam a min chhuah tir nge inih?” Chupa chuan,” mipa pahnih I rawn kalpui a, ka lo khawih ve ngamlo che ani.”

            Vantirhkoh lam chu duhtawk ila, Gabriel-a khan Zakaria hnen a sawi ang tho in Isua a pai tur thu Mari hnenah khan a hrilh a, Mari tan chuan a mak duh khawp ang. Helai a kan sawi zau duh lawk chu, Zakaria kha Temple ah, tunlai a kan Biak In angah hian Pathian thu Gabriel-a kaltlang in a dawng a, Mari erawh chuan, a inziak kilkello nangin, an inchhungah Pathian thu a dawng ve thung a ni. Kan Pathian thu dawn beiseina hmun hi khawilai nge ni thin le? Pathian chu khawikip a awm, Engkimtithei ani tih kan rin si chuan Biak In ah chauh hian emni a awm a kan rin? He lai hmunah chauh hian emni min hmu a kan rin? He hmunah chauh hian emni Pathian Thu hriat kan tum le?

            Amosa 3: 7 ah chuan ‘A rawngbawltu zawlneite hnena a thiltum hrilh lovin Lalpa Pathian chuan engmah ati ngailo’ tih kan hmu a, Pathian hian thil engemaw atih dawn in warning a pe lawk thin. Sawrkar hian dan a siam a, a kenkawh dawn reng rengin mipuite a hriattir lawk hmasa thin, No Tolerance Week te antia, Aizawl lamah pawh Garrage neih vek tur anti…an puang lawk dum dum a. Tin, kan khua ah te ngei pawh YMA te’n ‘Buaina siam chu an chungah action lak ani ang’ titen emaw an puanglawk thin. Hei India ram danah hian sawrkar emaw in dan a siam a, a puangchhuak anih chuan “ke hrelo reng reng’ ti a chhuanlam siam hi Court lamin a pawm miahlo ani. ‘Dan hriatlohna hi chhuanlam a tlinglo’ tih a ni.

Kan Pathian pawh hian thil atih dawn chuan a hriattir hmasa thin a, mihring lamin ‘Chutiang ka hrelo reng reng’ti a chhuanlam kan lo siam ve hi Pathian hian a pawm bik lo ang. Sawi tawh ang khan Thuthlinghlui lamah chuan Zawlneite hmangin, Thuthlungtharah chuan Kohhran leh Amite hmangin Pathian in thu a puang thin, Mahse heng zawng zawng hi Bible hmang a en rem tur a ni. “Lalpa, ka lo hrelo reng reng alawm’ ti a Mihausa in Lazara chungchang a sawi ang mai kha kan nih chuan thiam kan chang chuang hauhlo ang. Tunlai ah mi tam takin “Lalpa’n a ti” tiin thupuan chhuah annei thin, a dik leh dikloh chu Pathian Thupuan chhuah awmsa, kan Bible hmang hian kan lo teh tur ani. Tin, mimal tinte pawh hian Bible hi Pathian in kan hnen a athupuanna ani tih ihre thar ang u.

c) Marin Pathian thu chhuak a ringhlel lo:

Zakaria anglo takin mari hian Pathian thuchhuak a ringhlello. A chung a thillo thleng tur kha a hrechiang em em a,pasal nei hawt silo in nau an pai dawn ania. A pasal hual Josefa pawh khan a then phah hial in a ring. Mahse, Gabriela’n ‘Pathian thuchhuak reng rengin tih theih loh a nei lovang’ tih a hrilh hnu kha chuan “ Ngaiteh, Lalpa bawihnu ka ni, ithu ang zelin ka chungah thleng rawh se’ tiin a “amen’ hmak mai ani. Enge lo thleng zui zel dawn tiin ama lam a thil lo awm tur kha a ngaihtuah lawk vak vak lo a, a hisap hmasa vaklo…a “Amen” tawp mai a ni. Engvangin nge Mari hian Chhinchhiahnate emaw phut let te te lova a chung a thillo thleng tur kha a pawm tawp theih mai le?

            1) Pakhatna ah chuan Amah a inhriatchian vang a ni. Mari khan Pathian bawih, Pathian thuhnuai a awm, mihring, Pathian siam ve mai ani tih a inhrechiang khawp mai. Pathian thu kha hnial thei emaw lo awilo ve ringawt thei anilo tih a in hrechiang a ni. Amah leh Pathian thu kha bukna hmun khatah a dah chhin a, engmahlo mai anih zia a inhmu chiang em a ni.

           

            2) Pahnihna ah chuan Engkimtithei Pathian a hriatchian vang ani. Mari khan Pathian thiltihtheihzia a hrechiang a, a thu puan chhuah chu a hlen ngei bawk ang tih a ring satliah mailo, a ring bur ani. A chungah engpawh thleng se, Chungnungbera thiltihtheihna chuan a hliahkhuh tlat dawn ani tih a hre chiang a ni.

            Pathian thuchhuak reng reng thiltitheilo in a awmlo ang tih ring nghettu apiang hian Pathian ropui zia an hmu thin. Chumi ring ngam a, diltu a piangte tawngtaina chu chhanin a awm bawk thin. Pathian hi kan mihring chei a, kan tiatpui chei thin a, hei vang hian a thiltihtheihna hi kan ring zolo thin a ni. Keimahni hi fing ve tawk, tha ve tawk, chak ve tawk niin kan in ngai thin a, Pathian puihna hi a hming chauhin kan dil thin ve thin bawk ani.

            Hawh u, he Krismas lo thleng tur hian Kum 2000 liam ta a Mari’n Pathian a rin ngamna kha min hriatchhuah tir leh se, Pathian thu hi thiltih neilovin a kir leh ngailo a, a hlawhchham thianglo a, A duhzawng chu ati ngei ngei a ni tih hi ihre thar ila, chu Pathian thu thiltihtheihna chu kan zavai a chungah, atha zawngin thleng rawh se. Amen.