AMEN

AMEN

            ‘Amen’ tih tawngkam hi ‘AMAN’ tih atang a lo kal ani a, ‘Ni rawh se/chutiang chu a ni e/ a dik e/nghet takin ka pawm e/chutiang tak chuan ka chungah thleng rawh se’ tihna ani. Engpawhnise, a tawi zawngin ‘Ring/pawm/innghat’ tihna anih chu.

            Israel te’n an hman danah chuan miin thutiam anneih lai te, malsawmna an sawi laite, an chhia anlawh laite, an tawngtai leh Pathian chawimawina thu an chham laite in alo nemngheh nan ‘Amen’ an ti thin.

            Thuthlunghlui ah Pathian hming atan ‘Amen’ tih hi vawikhat hman a ni a (Isaia 65:16), Mizo Bible hian RSV a zui avangin ‘thutak Pathian’ tiin a dah a, lehlintharah chuan ‘Pathian Rinawm’ tiin a dah thung.

            Thuthlungthar ah hian hmanna chi dang pahnih kan hmu a:-

-          Isua nihna (title) atan (Thu.3:14)

-          Isua’n thu a sawiin a thusawi chu atih tak zia lantir nan ‘amen’ emaw ‘amen, amen’ tih a hmang thin. Mizo Bible ah erawh chuan ‘tih tak meuhvin’ tiin a dah a, lehlintharah erawh chuan ‘thudik tak ka hrilh a che u’ ati.

Jakob-a hringnun a tangin ‘Amen’ tih thu hi zir chhuah I tum the ang:-

1) Jakob-a chungchangah Pathian thutiam a awm (Gen.25:23ff)

# Jakob-a khan Pathian thutiam a chang a, mahse a nun kawng ava bumboh si em…

o   Esauva nen buaina annei a, fatir nihna fin kherek tak hmangin a leisak a. Apa malsawmna bumna hmangin a dawn khalh bawk a, chuvangin a tlan chhe hial.

# Pathian in Bethel-ah a thutiam a hrilh nawn leh a, mahse, ‘amen’ ti mailovin Pathian thutiam fiah nan ama’n thutiam anei veleh kher (helai hi chhiar chiang)

# Labana nen buaina namenlo annei a, bumin a awm.

# In lamah a haw a, a U Esauva’n alo hmuak a, a hlauh avangin thilpek a pe hmasa hial.

            Jakob-a hian Pathian thutiam a hria a, a pian hma a tiam tawh a ni. Chu thutiamtu chu Pathian (Amen Pathian) anih miau avangin Jakob-a chuan ‘Amen’ ti a, Pathian thutiam chu ring tak chung a nghak mai tur a ni. Mahse, ‘a ngaihdan/duhdan’ angin a che a, alak a Pathian thutiam awm chu a remhriatna hmangin (Mihring takin) tihhlawhtlin atum ta zawk a, buaina leh harsatna hrang hrang atawh phah ta zawk a ni. A malsawmna dawnna tur kawng a kual phah ta zawk a ni.

2) Jabok lui kai ah Pathian ngeiin a rawn chingfel ta:-

            A u Esauva a hlauh avangin amah chauhin Jabok lui kaiah a riak a, buaina atawk leh ta. Mahse, he buaina erawh hi chu a danglam ta. Pathian ngeiin, hmanraw dang hmang tawh lovin, Jokob-a a rawn buan a, Amah ngeiin zirtirna a rawn pe ta.

3) Amen Pathian leh Amen Jakob-a:-

            Jakob-a pian dawn a Pathian thutiam, Bethel hmun a a rawn sawi nawn leh ngat, kha Jakob-a khan a ngai pawimawh tawklo a, dawt leh bumna hmangin Pathian thutiam hlawhtlin tir a tum a. Chutihrualin, Pathian chuan a thutiam kha ‘Amen’ ti mai turin a duh a nih kha.

            Pathian chuan dawhthei takin Jakob-a a nghak a, Amen Pathian anihna ati lang tluan parh a sin. Jakob-a chhanchhuah a tumdan te kha tuitla chhanchhuah tum ang deuh a nia, tuitla pawh hi han chhan dawn ila, anlo in hai buan buan chuan chhan an har a, chhan tumtu te tan pawh chetsual a awlphah thin. Mahse, amah chhan tumtute alo vawn chat erawh chuan awlsam takin chhanchhuah anni thin.

            Jakob-a pawh hian Pathian vuan mai lovin (Amen pe mai lovin) a ma remhriat dan leh thiamdanin Pathian malsawmna dawn a, A thutiam tih hlawhtlin a tum a. Pathian in chhanchhuah tumin ban thin mahse alo hai-hnawk leh thin. Mahse, Jabok luiral ah erawh a zirlai a pass ta. Pathian a vuan a, Ama hnenah ngei chu malsawmna chu a dil thei ta a ni, chutah tak chuan Jakob-a (bumtu) ni thin khan hming thar ‘Israel-a’ tih pek ani ta ani. Pathian khan a khel ruh tih pelh kha atir atang reng a atum reng anih hmelloh, mahse, Jakoba’n ‘amen’ a pek theihna tur anih chuan ati hreh lemlo.

            Pathian hian malsawmna kan dawn theih nan thutiam a nei a, mahse chu thutiam chu keimahni remhriatna leh tum danin dawn kan lo tum thin, chu chuan harsatna min thlen a, Pathian lakah meuh pawh vuivai chak rum rum chang kan nei thin ang. Mahse, ‘Amen’ lo pek mai hi malsawmna kan dawnna hnar chu a ni. Kumin hian enge thleng dawn kan hrelo, kan chungah engpawh a thleng anga, hrehawm ti a rum vawng vawng chang kan nei ang…mahse, Pathian thutiam a awm a, ati hlawhtling turin a chak tawk bawk a ‘Amen’ lo pek mai hi a duhdan chu a ni, chu hmunah chuan Hnehna I chang zel ang a, malsawmna in a zui bawk ang che. Phillipi lehkhathawn 4:11-13 ah khan Tirhkoh Paula Amen nun ropui lutuk kan hmuh kha…kha nun kha ani Pathian in neise min tih ni.

            Lawmlo chung paw’n ‘Lalpa ka lawm e’ ti rawh. Harsa ti tak chung paw’n ‘Amen’ ti rawh, Pathian hi a thutiam ti hlawhtling turin a chak tawk a ni.