Thil tha tia inchawk tho tur kan ni

                                 Thil tha tia inchawk tho tur kan ni (Hebrai 10:23-25)

Mizote hi huho nun ngaina tak kan ni a. Mahnia kan tih peih loh pawh a huho chuan phur takin kan ti thei mai zel. Pathian min siam phungah hian mahni chauha khawsa tura duan kan ni lo reng a, awmkhawm  tur (social animal) a duan hi kan ni hrim hrim. Chuvang chuan tisa leh thlarau lama kan mimal nunah theuh hian midang te hi an pawimawh em em a ni. Hmanlai mizo nun kha a kristian tih chang ka nei thin. A huhova thil tih kha a tam em em, an nitin hnathawhah nise ‘lawm’ an nei a, hnatlang a awm a, ramchhuah nise a huho ten ram an chhuak a, sangha tlangvuak te pawh an neih thin kha mawle. Huhova thil tih hlawkna leh that zawk zia an hre chiang a, chu chuan an khawtlang nun kha enge maw chenah a khai ruala, chak lo zawk te khan a chak leh thiam zawk te zar an zo fo thin a ni.

Pathian min siam phungah mihringte hi hmel, rilru put hmang, nungchang leh theih zawngah in ang chiah chiah pakhat mah kan awm lo a, hei hi a chhan a awm ngei ang? Mihring chu khawsa ho tur leh in pui tawn tura siam kan nih vang niin alang. Pathian in Evi a siam dawn khan engtin nge a tih kha “A kawppui awm mi” tih a ni. Adama ang chiah chiah kha siam ta se Adama khan a kawppui thei kher lovang, engkima a mah ang chiah chiah kha a mamawh ani tlat lo. Mahse, hmeichhia, chakna leh chaklohna in ang lo, theih zawng leh thiam zawng, tui zawng thlenga in anglo a siam ta a ni.

Chuvangin, kan in anlohna te, kan danglamna te hi kan intanpui theihna atana thil pawimawh em em a lo ni zawk si. Thenkhat chak lohna kha a then chakna, thenkhat tlin lohna kha a then tlinna, thenkhat theih lohna kha a then theihna lo ni te hian nunhona ah a lo tangkai lutuk zawk ani. Hei hi Kohhran hote pawh hian kan hmuh fuh a, kan hriatthiam a ngai. Hei hi kan hman tangkai thiam anih ngat chuan Kohhran mai nilo khawtlang leh ram pumah kan nunphung sawi danglam theitu a ni.

1) Kohhran khata lawi hote hi in chawk tho tawn tur kan ni: Kohhran khata lawite hi in en ila, tumah in ang kan awm lo. Kan rilru put hmang leh nunphung mai nilo, tisa leh thlarau lamah pawh kan dinhmun leh thlen chin a hrang. Hei hi Chunglam in Mimal nilovin huho hnen ah Kohhran a din chhan pawh a ni ngei ang. Mahni chauh chuan tlakchham kan ngah, in mamawh tawn vek kan nihna hi tisa mai nilo Thlarau lamah pawh hian a chiang ania.

            In tiharh tawn tur, a tul anga in tanpui kan ni. Midang tlin lohna leh chak lohna kha kan chakna lai tak a ni thei. Chu kan chakna lai chu a chaklo zawk te sawisel nan hmang mai lovin in a dawm kang tu ah, a chawk tho tu ah kan tang thei a ni. Pathian in talent hrang hrang min pe, chu talent min pek chu a in ang vek lo, mahse, midang ten malsawmna an chan theih nan kha kan talent theuh kha kan hman chhuah a ngai, chu chu min pek chhan pawh a ni. Talent phum bo tu, tipung ve lo kha a talent lak sak ani a, pawn khawthim ah dah a nih kha.

            He Kohhran ah hian mize hrang hrang nei, chakna leh chak lohna in ang lo kan ni kan tih tawh kha. Kan chakna ah midang an chak lovang, kan chak lohna ah midang an chak ve thung ang. In awi nung tur kan ni, intih harh tawn tur kan ni, in chawk tho tawn tur kan ni.  A then chu thuhril thiam tak, a then lam chi, a then zai lam tui em em, a then tawngtai mi te kan ni ang. Kan theihna leh tuina, Chunglamin min pek kha Kohhrana kan lawi puite chawh harhna tur a ni.  

2) Inkhawm, thilpek, hnatlang leh thil dangahte inchawk tho tawn tur kan ni: Heng Inkhawm, hnatlang leh Kohhran programme hrang hrang kan neih te hi Kohhran hmasawn nan te, Pathian ram zauh nan te leh Pathian ropuina tur anihna phen ah hian kan intih chak tawnna tur, tisa leh thlarau lama hma kan sawnna tur a ni. Inkhawm ho thin, hnatlang ho thin leh Kohhran programme-a in hmu khawm tam te chu kan innel a, kan inhrechiang em em bawk. Mahse, heng programme hrang hrang hian tisa leh thlarau ah hmasawnna min thlen siloh chuan hun khawhralna mai a ni.

            Kan inkhawm hian eng rilru nge kan put thin? Mimal nuna hlawkna neih tum in kan inkhawm thin em? Chutihrualin, midang te chawk tho tur, midang te tan tih rilru kan pu tel em? Zai chungchang hi khan sawi ila, theihtawpa kan zai hian zai ve hleitheilo te, lam mi te kan tanpui alo ni tel a sin. Zai a tui chuan tuten pawh hian nuam kan ti a, Inkhawm boruak a nuam. Chu mai anilo, Inkhawmnaa chanvo nei te thlengin a pui a sin. Tan dar rik hmaa zai boruak a that chuan engkim mai hi a dik chho vek zel, in lo chik ve emaw?

Tin, hnatlang te leh programme dang dang kan neih te hi kan intih chak tawnna vek a ni bawk. A huho a tih chuan phurna a siam a, chu chuan thlarau lamah pawh hma min sawn tir thin. Tisa leh thlarau lam hi a thenhran tak tak theih loh, tisa taka inpawhna leh innelna kan neih loh chuan thlarau lam ruai te hi kilho a har a sin. Chuvangin, Inkhawm, hnatlang leh Kohhran programme hrang hrang kan hman ah hian midang te tan a ni tih rilru pu in theihtawp i chhuah thin ang u.

3) A chak ber leh chak loh ber, a tui ber leh tui lo ber inkhai rual a tul: Kan sawi tawh ang khan Kohhrana lawi ho te hi tisa leh thlarau ah kan chim chin a in anglo. Hei hi kan hriat chian a ngai. Tisa lama fing leh fel, remhre tak, thothang tha em em mai te an awm rualin hetiang lama chuan tur neilo, ngaihdan pawh nei fum fe lo te kan ni ang. Tin, Thlarau lamah pawh kan chim chin leh thlen chin, kan in pek chen pawh a in anglo. Heng kan in an lohna hrethiam lova midang phut leh sawisel na atana kan hmang a nih chuan Pathian in Kohhran min din chhan hi kan thelh duai thei.

            Kohhran khata lawi chu in dawm kang tur, midang thatna leh hmasawnna tur a tana Koh khawm te kan ni. Zai ngaina lo, lam ngai lo, thuhril ngai pawimawh lem lo te pawh kan awm ang? Mahse, zai ngaina mi te, lam mi te leh thuhril thin ten khang ho kha sawisel mai lovin an chak lohna kan hriatthiam pui a, anmahni chawk tho tura tan kan lak a ngai tihna a ni.

            He Kohhran hi tisa leh thlarau lama mi chak te leh chak lo ber te, a tui leh tui lo ber ten inkhairual taka Pathian kan biak hona hmun a ni tur a ni. Tin, inthliarna a awm tur a nilo. Langsar bik awm a rem lova, ngaihthah bik awm a thianglo.

Conclusion: Tunlai khawvel ah mahni in haivur duhna a lian sawt khawp mai. ‘Mahni hlawhna’ tur a nih chuan tihhreh nei lo kan pung zel. Mahse, Pathian min siam chhan chu ‘kawppui nei tur leh kawp tu tur’ a tan a ni. Chumi awmzia chu nungho tur, khawsa ho tur, a tul anga in tanpui tawn turin a ni.

Ringtute awm nan Pathian in Kohhran min pe a, famkim lo leh midang mamawh thin kan nih vangin mal tlat nun ah chuan dam khawchhuah a har thin. Intiharh tawn a, in fuih tawn a, in hnem tawn tur kan ni. Augustine-a chuan Kohhran ah mi chi hrang hrang kan awm a, mi famkim lo awm khawm mahse famkimna hmun pan mek te kan ni a ni. Famkimna hmun khi mimala luh tum lo ila, a huhovin, in ti chak leh in chawk tho tawn chung zel in I lut ang u.