Naupangte leh nu leh pate (Efesi 6:1-4)

                                                         Naupangte leh nu leh pate

Efesi 6:1-4

Tirhkoh Paula hian Efesi khua mite hnenah hian midangte nena awmho dan tur a hrilh a, bung 5:22-33 ah hian Nupa awmdan tur, bung 6: 1-4 ah hian naupang leh an nu leh pa emaw an chhungte, 6:5-9 ah chhiahhlawh/bawih leh a neitu an pute inkar a sawi thung.

Tun tumah hian naupang pual leh nu leh pa/ an chhungte pual in Efesi bung 6:1-4 hi kan zir ho dawn a ni.

6:1 “Naupangte u, Lalpa ah chuan in nu leh pa te thu zawm rawh u, chu chu thil dik tak a ni”

“Lalpa ah chuan’ tih hi Nu leh pa, kan chhungte thu kan awih chhan tur a ni. Tin, “thu zawm” a tih pawh hi “ngun taka ngaithla” tihna a ni tel bawk. Kan nu leh pa, kan chhungte annih vang mai nilovin Pathian vang zawk in an thu kan zawm ang. Nu leh pa, chhungte thuawih loh hi Pathian thu awih lohna a ni a, an tluang zui ngai lo.

6:2&3 “I nu leh pa chawimawi rawh tih hi thupek  zinga tiam tel nei hmasa ber a ni. I tan a tha ang a, lei ah i dam rei bawk ang tih a nih kha”

 “Nu leh pa chawimawi rawh” tih hi order/thupek a ni. Thupek reng reng chu zawm ngei ngei tur a ni. Pathian in Mosia hnenah an zawm ngei ngei tur thupek sawm a pe a, chung zing ah chuan lawmman tiam tel nei thupek pakhat a awm. Chu chu Nu leh Pa chawi mawi a ni. Thupek dang te chu kan zawm a nih pawh in lawmman kan hmuh nghal tur a sawi tel lo, Mahse, nu leh pa, kan chhungte kan chawimawi chuan lawmman kan dawng ang, chu chu ‘vanneihna leh damreina a ni” Juda ho hian Damreina hi malsawmna ah an chhiar a, chuvangin, nu leh pa chawimawi te chuan malsawmna an dawng dawn tihna anih chu.

            Nu leh pa chawimawi tih hian ‘a nu chu a fel lutuk’ tia mi bula sawi chiam lam a nilo. Miten “hei hi tu fa nge? Tute nge an chhungte? Naupang fel tak a nih hi a” an tih theih tura nu leh pa, chhungte leh zirtirtute thuawih hi nu leh pa chawimawi dan tha ber chu a ni.

6:4 “Tin, nangni pate u, in fate tithinur suh ula. Lalpa zirtirnaah leh thununnaah enkawl zawk rawh u”

Vawiina in khawm, tu leh fa nei zawng zawng te pawh hian tih tur kan nei ve a. “Pa te u” a tih hian mipa chauh a sawilo, chhungkuaa fa enkawltu zawng zawng a kawk.  ‘Ti thinur suh u’ tih hi ‘an thinrim hlau tak chungin enkawl hliau hliau rawh u’ tihna a nilo a. ‘In tu leh fate hi rilru na lutuka an awm loh nan rawng takin emaw tawngkam uchuak leh malsawm lo emaw duhsak bik neih emaw diklo takinan chungah thil ti suh u’ a tihna a ni.

A enkawl dan tur a sawi zui a

1) Lalpa zirtirna ah: Pathian thu in kan kaihruai ang. Biak In ah te rawn hruai ula, inkhawm pui rawh u. Pathian anna lam kawnga an lo thanlen theihna tura kaihhruai hi Nu leh pa, naupang enkawltute mawhphurhna a ni. In tu leh fate kha Pathian biak san suh u, Pathian beho zawk rawh u. Pathian thu nena inkaihhruaina chhungkuaa seilian naupang an ngaihtuahawm ngai lo.

2) Thununna a enkawl: Thunun (Discipline) kan tih hi hauh emaw vuak emaw hrem lam ani lo. Naupang chu mahni inthunun thei (Self-control), thil thalo laka in sum thei, an duh zawng leh chak zawng, nuam tih zawng in a thunun lohna tura zirtir leh kaihhruai hi a ni.

High School zirlai naupang pakhat chu a phone an lak sak a, naupang chhia ang maiin zuk nuara mawle. Tunlai naupang tam tak chu Social media in min enkawl sak a, a duh duh a entir a, naupang hmuh a tana him lo thlengin a hlui a. Phone an addict hnu a chhuhsak kan tum meuh chuan a har tawh thin.

Mizoram ah hian Pa ni ve si, Patling silo, nu ni si, nutling silo kan tam.“Naupang chu awm dan tha zirtir la, a upat hnuah pawh a thlah lo vang” (Prov.22:6) a kan hmuh angin an naupan lai ngei hian Social media nilovin keinin kan zirtir ang. ‘Thir chu a lin laiin den tur’ an ti. A daih tawh hnu ah chuan deng deng mah ila kan duhdan anga chhuah a har tawh.

Chuvangin, Naupang enkawltu zawng zawng ten vawiin atang hian rilru thar i pu ang u. An upat tawh hnua Gospel Campinga nawr liam leh ringawt ngai tawh lo turin an naupan lai hian i zirtir ang u.