Engkim hi Pathian ta a ni a, a hlu a sin

                                             Engkim hi Pathian ta a ni a, a hlu a sin

2 Samuela 12:20-23; 1 chronicle 29: 11-14

Thil reng reng hian neitu a nei thin a, Mimal, chhungkua, pawl, khawtlang leh Ram (sawrkar) emaw ta a ni vek mai. Sawrkar mal ta anih loh pawh in khawvelin an in tawm tlan tal a la ni thin. Naupang inkhual telem tak ngial pawhin ‘hei chu eima ta’ an tih thin hi maw! Kan Pathian thu chuan Engkim mai hi Pathian ta a ni tih thu min hrilh a, hei hi Davida nun leh a khawthlirna atangin kan zirho dawn a ni.

Tunge Davida?:

 Davida hi Israel khawte tak te Bethlehem ah 1000 BC vel khan a piang a, Juda hnam an ni. Bethlehem hi Jerusalem atangin 10Km vel ani awm e. Heng hun lai hian Lal an nei tawh a, chu chu an Lal hmasa ber Saula kha a ni. Kum 30 anih in Israel lal pahnihna a rawn ni a, Kum 7 leh a chanve vel ro a rel a ni. Davida hun lai hi Israel ram rawn dinchhuah tak tak leh Ropui vanglai a ni a, an ram pawh a hausa hle bawk.

Davida hi Pathian in ‘Ka rilru ang pu mi’ a tih khawpa fel a ni a, mahse, mi famkim erawh ani bik lo. Bethsebi lakah a uire a, a pasal Uria a tihlum tir bawk. Mahse, A sualna a hria a, inchhirin Pathian hnenah a let leh a ni.  A tleirawl chhuah tirh atanga Pathian a hriat chian em avangin a ring ngam a, chu hriatchianna atang chuan engkim mai hi Pathian ta a ni tih a chiang a, chu chuan a khawvel thlir dan pawh a kaihruai hle a ni.

            Keini Kristian te pawh hi Pathian kan rin dan leh hriat dan hian kan thil thlir dan pawh a kaihruai thui khawp mai.

1. Mihring nunna hi Pathian ta a ni: Bethsebi nen an fa hmasa ber, uire-na vanga an fa kha Zawlnei Nathana khan a dam chhuah loh tur thu a hrilhlawk a, chuvangin, naupang a dam loh khan Davida khan theihtawp in Pathian hnenah a nunna zuah turin  a dil a. Mahse, Pathian chuan naupang nunna alak sak tho. He dinhmun atang hian Davida khawthlir dan leh Pathian a hriat dan alang chiang khawp mai.

            Naupang dam leh theih nan chawngheiin tihtak zetin Pathian a kar a nih kha. Nunna petu leh la theitu a ni tih a hriat vang a ni. Naupang a boral a, khati khawpa Pathian kar nasa chuan a sun nasat viau in a rinawm a, Pathian a rinna pawh a derthawn phah hial mai thei. Mahse, engtin nge a awm kha? A in sil fai a, a lu a khuih mam a, chaw a ei a, tichuan, Lalpa In ah a kal a, Pathian chibai a buk a ni. Davida’n Pathian a hriatna kha a thuk a sin. Nunna zawng zawng neitu a nihna te, a thu ang zela  he khawvel hi kal a nih thu te kha a chiang lutuk. Chu chuan thihna a thlir dan pawh a ti danglam a, a fa thihna chungchangah pawh “A hnenah keimah hi ka kal ang a; nimahsela, ani zawng ka hnenah a lo kir leh tawh lo vang” a ti.

2) Sum leh pai, lei rohlu kan tih zawng zawng hi Pathian ta a ni:

            Davida lal lai hian Israel ram kha an hausa hle a, an lal ram a zau a, insumdawn tawnna an kalpui nasa bawk nen, Lal ram ropui tak a din a ni. Temple sak kha a chak em em a, mahse, Pathian in ‘thisen a chhuah nasat’ avangin a phal lo, a fapa Solomona sak turin a ti a. Chuvangin, temple sakna atana mamawh lo lak khawm kha Davida hian a tum ta a ni.

            He Temple sakna tura an hmanrua mamawh – Thing, lung, thir, dar, rangkhachak, lunghlu chi hrang hrang te chu an thawhkhawm ta a. Davida thawh ringawt pawh hi a tam tham a sin:- Ophir rangkachak talent sangthum, Tangkaraw thianghlim talent sangsarih. Tin, midang te pawh in an thawhkhawm ve bawk a – Rangkachak talent sangnga, darik singkhat, tangkarua talent singkhat, dar talent singkhat leh sangriat, thir talent nuai khat te ani hlawm. Heng hunlaia an talent khat rih zawng hi 30 Kg ang vel a nih a, a tam tham hle tihna a nih chu!

            Mahse, heng thil an thawh khawm chungchanga Lal davida thusawi chu “Aw Lalpa, kan Pathian, I hming chawimawi tura I in sak nan chak kan lo chhuahte hi pawh hi I hnen atanga lo kal, I ta vek a ni” a ti (1 Chro. 29:16). Davida hian heng kan sum leh pai, kan ta kan tih ve thin te neitu tak tak hi a va hre chiang em!

 

3)  Engkim hi Pathian ta a ni a, a hlu a sin: Engkim hi Pathian ta a ni kan tih rualin a neitu a zir hian thil hi a in hlut hleih khawp mai a, Kum 1986 world cup a Maradona’n a kut hmanga a tih goal ‘hand of god’ an phuah sak tuma a Jersey hak kha Rs 82,50,87,165 in an hralh nia. Keini hak hlui chu nise a thlawna an la duh anih pawh pawnchhia ah bak an ti kher lo mai thei.

            Davida thlirna atang hian han thlir ve chhin teh. Nang leh kei hi Pathian ta kan ni, sual vangin Pathian ta kan nihna hi kan hre lo fo thin. Kan hlu a sin, ruihhlo leh thil thalo hmanga hralh mai mai phalloh nunna nei kan ni. Kan nunna hi Lalpa ta a nih vangin kan nun dan lo pel he thin emaw lo dik tawk chiah loh pawh nise a neitu Pathian hi a ngai reng. Chuvangin, kan hlutna kan hloh chuang lo. Maradona jersey ang kha a teammate, midangte pawh in an ha ve, quality ngai tho kha a ni. Mahse, a neitu leh hatu vangin a hlu mai zawk a ni. Keini pawh hi Pathian ta, kan nunna hi chung lam ta anih vangin a hlu a ni. Kan hmihring pui te hi hmusit emaw rilru chhia pua en thei kan nilo, Pathian in a duh taka a siam, a ta te an ni a sin.

            Setana hian kan tlin lohna te, kan thilsual tih tawh te, kan fel loh zia te hi min hrilh mawlh mawlh a, mahni inkiltawih a, Kohhrana tel ve phak lo, tha ve thei tawh lo ang ten thu min fah thin. Tin, midang te sualna, tlin lohna leh felloh na zawng zawng te pawh min hrilh ru mawlh mawlh thin. Mahse, Pathian erawh chuan A ta kan nih thu te, kan hlut zia leh midang hlut zia min hrilh ve thung a ni.

            Tin, he khawvela ‘ka ta/ kan ta’ kan tih ve thin kan sum leh pai, in leh lo, kan chhungkua te thleng hian kum hlun a awm lo. Chung lam ta vek a ni. A rorelna hnuaia kun vek kan ni. Pathian lakah ui tur kan neilo.

Tin, Pathian ta kan nih ang chiah hian kan thil neih zawng zawng hi a ta a ni bawk. Chuvangin, Kan thil neih hi a hlu a sin, kan nupui/pasal te, kan tu leh fate, kan chhungkua theuh te an hlu a sin.

            Tun tum ah hian Engkim hi Pathian ta anihna hre thar ila, kan nunna leh kan neih zawng zawng hi a ta a nih vang hian a hlu a ni tih hi hre nawn fo ang u.