Pathian thu hril tura Koh kan ni (Bible Sunday pual)

                                                     Pathian thu hril tura Koh kan ni

Marka 16:15, I Kor. 9:16, Hebrai 4: 12-14

            Pathian Kohna chungchangah hian thil pawimawh tak tak pathum a awm. ‘Kohna’ ‘kotu’ ‘koh chhan’ te hi lak hran theih loh, kan chian tlan ngai em em si a ni. Naupang thenkhat te hi han tir ila, an kal vut a, mahse a hnu lawk ah “Eng ka lei tur kha?” rawn ti leh thin an awm. In naute ah khan an awm ve mai thei. Kona an hria, a kotu pawh an hre bawk, mahse koh chhan an hre chiang lo thin a ni.

            Mizoram Chief Minister hian min ko ta se rang tak leh zah takin kan chhang nghal ngei ang a, tih tur min hrilh a nih phei chuan a tha thei ang bera tih puitlin kan tum zui ngei ang. Mahse, kan ngaihsan lem loh, kan chung en bik lem lo ten min kovin tihtur min hrilh ta se “ve mai maia” kan ti mai thei. Naupang te pawh an hmelhriat ngai loh te kohna ai chuan an nu leh pa te kohna chu an bengkhawn zawk thin.

Zanin hian Kohna, Kotu, leh Koh chhan hi hrechiang vek ila ka duh hle mai. Ringtu kan nih chuan Pathian in min ko vek a, min koh chhan chu Chanchin tha hril hi a ni. Mahse, Chanchin tha kan hril dan tur erawh a in ang vek lo. Thenkhat chu hun puma thawka kal chhuak tur te in a ko a, thenkhat erawh mahni hnathawhna hmunah, kan awmna hmun atanga chanchin tha lo hril tura koh kan awm bawk.

1) Pathian thuin thil a ti thei: Hebrai Bung 4:12 ah khan “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hial in a chhun thei a, thinglunga ngaihtuah leh tumte hi a hre nghal thei a ni”. tih thu kan hmu a. Pathian thu hi thuziak satliah a ni ngawt lova, ti nungtu Thlarau Thianghlim vanga thu nung a ni. Tisa leh thlarau chhandamna thlen thei khawpa thil tithei a ni.

            Pathian thu bakah hian thu tha tak tak leh thu dik enge maw zat hi a awm a, mahse, a nung in thil a ti ve theilo. Rilru erawh a hneh ve thei mai thei a, a ngaihnawm viau thei bawk. Mahse, Pathian thu, kan Bible erawh hi chuan taksa leh rilru a thlak danglam hlak thei mai nilovin thlarau chhandamna thlengin min kawhhmuh thei a ni.

            Chutihrualin, Bible-a thu in ziak hi Thlarau Thianghlim in hna a thawh loh chuan thuziak satliah ve mai ah a chang thei tih erawh kan hriat tul khawp mai, Chuvangin, Bible kan chhiar dawn hian Pathian thu thil tihtheihna phawk chhuak zo ngei turin in hlan hmasa thin ang u.

            Sap ho hian Exorcism an tia, mizo tawng chuan ramhuai hnawh chhuah lam a ni mai awm e. Tum hnih ka tawng ve tawh a, a boruak erawh a in ang lo khawp mai. A tumkhatna ah chuan ramhuai pai nia an hriat kha Bible an chhiar luih tir a, a tlu nghal tawp mai, tichuan, a ramhuai pai kha an hnawh chhuak zui ta a. Pakhat ka hriat erawh chu a laiah an muttir a, a awm ah Bible in keu sa an dah a, an tawngtai rual ta a. An tawngtai rual lai khan Bible kha a la a, a tana tawngtai tute kha a chhiar khum zuah zuah thung a. Dr.Hrekima hnena an refer hnu ah chuan a dam ta in ka hria.

 Bible hi magic bu emaw ti kan awm fo thin. A nilo…Bible kan kawl vanga ngaitha, Zinna ah Bible ken vanga ngaih ngam ve em em, chhiar ngai lem lo a awm theih! Lukham bula Bible dah vanga mut tui ta em em pawh kan awm ang… heng zawng zawng hi Pathian thu thil tihtheihna lam a ni lo, kan rilru mai a ni. Pathian thu hian thil a ti thei kan tih hian nunpui tur lam a kawk zawk a ni. Mut pui ringawt emaw chhiar mang lova magic bu anga kawl ringawt chi a nilo. Pathian Thu thil tih theihna hmu thei turin kan chhiar ang a, kan nunpui ang. Chutah chiah chuan Pathian thu thil tih theihna hi a lang chauh ang. Bible chhiar chhuah te hi a tha lutuk, chhiar ngai lem lo te ai chuan thlarau lamah hlawkna kan nei ngei ang. Chutihrualin, Pathian thu anga nun hman erawh Bible thu chah laipui a ni si.

2) Pathian thu puan darh hi ringtute mawhphurhna a ni: Chanchin Tha Marka ziak bung 16:15 ah Lal Isua khan in lar meuh in thupek a pe a, “Khawvel ram zawng zawng ah kal ula, thil siam tinreng hnenah chanchin tha hi hril rawh u” a ti. Ngenna a ni lo a, Thupek a ni, tih ngei ngei tur, kan zawm ngei tur a ni.

            Khawvel zawng zawng a tih hian khawi hmunah pawh tihna a ni mai, hmun hla leh hnai a huam vek. Khawvel zawng zawng hian kan in chhung, thenawm, khawtlang, nitina kan hnathawhna leh ram pawn lam pawh a huam vek. Thilsiam zawng zawng tih hian kan mihringpui te mai bakah nungcha, ramsa, ransa, thing leh mau, hnim thlengin a huam vek. Genesis ah khan Pathian Evil eh Adam ate kha thilsiam dang te chunga thuneihna a pe a ni. Mahse, kha thuneihna kha duh duh danah tih theihna nilovin duat taka enkawl tura thuneihna a ni. Khawi hmunah pawh, engkim chungah chanchin tha kan puan a ngai a nih chu.

            Pathian hian Chanchin Tha kan puan darhna hmun tur leh kan puan darh dan tur hi rem min ruatsak vek kan tih tawh kha. Thenkhat chu kal chhuak turin a ko a, a tam zawk erawh mahni hnathawhna leh awm hmuna hril turin min ko. Hei hi kan hrefiah lo fo thin. Nitina kan hnathawhna hmun hi Chanchin Tha kan hrilna tha ber a  ni. Rawngbawltu thatchhia, mi in hnung lama an sawi zui theih kan tam vang hian thenkhat chuan Kohhrana in hman te hi an tui loh phah fo a sin! Ringtu chuan taima taka a nitin hna a thawh hi Chanchin Tha a puandarh dan tha ber a ni tih hi kan hriat chian a hun tawh a ni.

3) Bible lehlin leh semdarh hmangin Pathian thu kan hril thei : Pathian thu thil tihtheih zia kan hre tawh a, chanchin tha hril vek tura kohna kan hre tawh bawk. Tunah chuan chu Kohna chu Bible Society kaltlang hian a tih hlawhtlin theih a ni.

            Bible Society din chhan chu hnam hrang hrang ten anmahni tawnga chhiar theih tur Bible an neih theih nana hmalak hi a ni. Alo pian chhuah dan te hi a ril a sin “Kum 1794 khan kum 10 a upa hmeichhe naupang Mary Jones chuan Welsh tawnga lehlin Bible a hmu fuh ve hlauh mai a, an zirtirtu Mr.Evans an Bible a chhiar chuan a rilru a khawih hle bawk a.  A hun lai khan Bible kha lehkhabu vang tak leh to tak a ni a, mi na zawng khan an nei lem lo. Tichuan, Mary chuan Bible neih ve ngei tumin kum 6 zet a in tuak a ni. Bible leina tur a neih veleh an khua atanga mel 25 a hla Bala khua ah Bible zuar Rev. Thomas Charles hnen atangin a va lei a, ke ngatin mahni chauh leh nghalin a kal a ni. Mary Jones thiltih chuan Rev. Thomas rilru a hneh hle a, a hun laia Bible sem chhuak tu “Religious Tract Soceity’ hnenah a hrilh vek a, mite thinlung ah hna thawk chhun zawmin kum 1804 khan Kohhran hrang hrang atanga mi thahnem ngai mi 300 zet kal khawm chuan The British and Foreign Bible Society’ an lo din ta a ni”

            Kan zavaiin missionary ah kan tang vek thei lo, lo tang thei pawh ni ila zalen takin ram hrang hrang ah chanchin tha kan puan a rem kher lo ang. Mahse, Bible erawh kan thawn lut thei a ni. Mizo te hian Mizo tawng ngeia chhiar tur Bible hi la nei lo ta ila kan buaithlak ngawt ang. A tawng thiam te zawh chawp a ngai ang a, mahnia Bible chhiar melh melh a har viau ang. Mahni hnam tawnga Bible la nei lo hi an la tam, Pathian thu thiltih theihna tak tak hre chiang ve tur pawh in an tawngin Bible an la nei miah lo a ni. Chung mite hnena chanchin tha kan hril ve theihna kawng awlsam ber chu Bible Society kaltlang hian a ni.