“I mite hi an tam emai”

                                                             “I mite hi an tam emai”

Roreltute 6:15; 7:2; 2 Kor. 12:9; John 10:10

 

            He khawvel thil taka ngaihtuah chuan a tam hi chakna, ropuina leh thiltih theihna hmanrua pakhat a ni thin. Tunlai khawvelah ram hrang hrang sipai chakna an tehna pawh ralthuam an neih zat, sipai an neih zat atanga teh a ni. (US, Russia, China, India)

            KTP ah pawh tam kan chak thin a, hnatlan a ni emaw Inkhawm leh Activity dang pawh nise tam chu a nuam a, kan chakna hnar niin kan hre fo thin.

1. Gideon-a a tangin: Israel ten lal an neih hma khan roreltu mumal an awm lo a, Gideon-a hunlai pawh hian Midian ho in Israel fate kha kum sarih lai an awp a ni. Tichuan, an manganna te Pathian in a hriaa, anmahni chhanchhuak turin Gideon-a chu thlan a ni. “Manasea thlah zinga pachhe ber chhungkua, chutah pawh a naupang ber ka ni”

- Pathian in a chhuanlam a pawm lo.

- Gideon-a chuan manase, Zebulun, nafthali thlahte chu Midian do turin a pun a, mi 32000 an lo kal, Pathian an tam lutuk a ti. “Indo huphurh zawng a haw tir a, mi 10000 an la awm” Pathian in tam a la ti. Tui thala liak leh thingthi chunga tui in an then leh a, mi 300 chauh an ni ta. Midian, Amalek, leh Thlalera chengte, an tam zia chu “Khaupuang ang mai, an Sanghawngsei ringawt pawh tiau vut anga chhiar senloh” tih a ni.

- Pathian in mi 300 chauh a thlanna chhan chu “Anmahni hneh emaw” an tih palh a hlau a ni.

2. Mosia atangin: Aigupta lal ram ropui lutuka Israel fate zuk hruai chhuak a, tlanna sum leh pai pawh ken tir miah lova Pathian in a tirh kha Mosia a ni. Pathian rorel dan hi a mak fo. Khawi ram emaw hmangin Aigupta kha hneh hmasa se, chuta tang chuan Israel fate kha zalenna pek mai awm a nia. Mahse, Pathian thil tum thlenna turin mi pahnih/khat bak a ngai lo.

            Mosia khan chhuanlam a siam nasa hle –

“ Kal awm ka nilo, hruaichhuak thei tur pawh ka nilo”

 “I hming pawh ka hre silo, min lo zawt ta se, chhan dan tur pawh ka thiam nang. Ka thusawi an awih teuh lo”

“Ka thusawi an awih lo ang, ka hnena I inlar thu pawh sawi ila an awih chuang lo ang”

“Ka dang a awk a, tawngkam thiam pawh ka ni lo”

Mahse, Pathian in a chuanlam a hnawl vek a, a U Arona nen Isael fate an zuk hruai chhuak a nih kha.

3. Pathian in enge a duh?

            Tam lam a nilo, Zirtir 12 chiah thlang tu khan a duh chuan mi Sang chuang a thlang nghal thei a lawm. Pathian thiltihtheihna thlenna turin Number a pawimawh ber lo a, a kohva ten Pathian thu angin thil an ti zui em? tih hi a pawimawh lai a ni.

            Tam te kan chak thin, haw hawa han nawr ve te hi chakawm alawm. Mahse, chu chu Pathian remruat dan a nilo fo. Tirhkoh Paula khan harsatna ruk tak enge maw a nei a, Pathian hnenah laksak turin a dil thin. Mahse, Pathian chhanna chu “Ka khawngaihna I tan a tawk e, ka thiltihtheihna hi chak lohnaah a sin tihpuitlina a awm thin” a ti. He harsatna hi enge chiang takin sawi lo mahse ‘a inngaihhlut luattuk loh nana a chunga harsatna thleng’ a ni tih erawh a chiang khawp mai.

            Kum tharah rawngbawlna chanvo hrang hrang kan chelh leh ang, KTP pawh ala kal zel ang a, mahni in sit ru tak chungin hruaitu hna te kan chelh ang. Member te pawh in khawhar ru takin rawngbawlna tiin kan tel hram hram mai thei. Mahse, hei hi I hre reng ang u ‘Pathian hian tam leh tlem (quantity) hi a en lova, mi pahnih emaw a aia tam emaw ka hminga an inkhawmna ah chuan ka tel zel ang’ titu hian Nun Tak a duh a, quality zawk a en a ni’

Chuvangin, mi tlem te ten theihtawp chhuaha kan thiltih hi Pathian thiltih theihna hmanrua a tling tawk a, “Lalpa min tihsak a ni” kan ti thei zel ang.