THLARAU RAH

THLARAU RAH

John. 15:16; Gal 5:22f

Hmani lawkah Rev. Chuauthuama’n Vanglaini chanchinbu ah Mafa-a chungchang a rawn ziak a, tawngkam ngaihno bei em em lo te pawh a hmang tel a ni mahna, Pu Chuaua demna ri a tam hle a. Social media (Fb/watsapp) lamah kan ri luih luih anih kha. Pu Chuaua leh Pu Mafaa lamtang ang deuh zawng khan inhnialna a kal chho a, tawngkam pawh kan duhtuilo, tawng chhe tak tak hmang a comment pe te, post siam te pawh an awm nuk a ni. He issue ah kherlo pawh hian Social media a kan Politician te chungchang kan sawi duhdan te, mi chanchin hrim hrim kan sawi dan en hian “Mizo Kristiante thil thlir dan hi ava diklo em!! An chhiatna lai, diklohna lai kan kher char char a, mi thil tha tih fak kan hreh ngawih ngawih niin alang” A nawlpui a lakin ‘pessimist’ antih ‘a thim lam zawng a thil thlir tlat, a chhe lam zawng tlat hi kan ni fur awm e.

Social media lam a kan chetdan mai nilo, Kohhran leh khawtlang a kan rawngbawl dan te, KTP a rawngbawlna kan kalpui dan te pawh hi chik takin en ila Tirhkoh Paula’n a sawi ‘thlarau rah’ antihte kha kan tlachham awm hle mai ka ti thin.

LalIsuan engtin nge a sawi?: Chanchintha Johana ziak 15:16 ah khan engtin nge atih kha ‘Nangnin mi thlanglo, keiman ka thlang zawk che u a, va rah tur leh in rah awm reng turin ka ruat bawk a che u; tichuan, ka hminga Pa hnena in dil apiang a pe dawn che u nia” ati. Chiang taka LalIsua sawi chu ‘rah chhuah rawh u, chu rah chu awm reng rawh se, rah reng rawh u, rah hun bi nei suh u’ atihna ani.

            Hei kan hre theuh anga, Thei hian rah hun bi anei thin. Theihai te pawh ei tur a awm renglo, serthlum rah te pawh kan hmu kumtluanlo. Chutiang bawkin, thlai te pawh in hunbi anei a, Zawngtah te hi kumtluan a ziah tur awm se la chuan lawm fe fe kan tam ngawt ang tiru? Mahse, ani silo. Mihringte pawh hunbi siamsak kan ni a, thawh hun, ei hun, mut hun te…. Mahse, heta kan sawi erawh hi chu ‘hunbi piah lam’ ani. LalIsua khan hunbi awmlo a nei reng tur a min duh chu ‘Thlarau rah’ hi a ni.

Thlarau rah chu enge:

            LalIsua hian hengte hi Thlarau rah chu ani ti a hawrawppui a sawi anei lemlo a, mahse, a rawngbawlna leh zirtirna en erawh chuan chiang tak in kan hmu si a ni. Galatia mite hnena Tirhkoh Paula’n lehkha athawn ah khan chiangtakin a rawn sawi ta kauh kauh a, ‘Hmangaihna, hlimna, remna, dawhtheihna, ngilneihna, thatna, rinawmna, thuhnuairawlhna, insumtheihna’. Heng ho hi a ni LalIsua ngeiin ‘nei reng rawh u, neih lohlai nei suh u’ atihni.

            Dawrah kan mamawh zawng kan lei dawnin engtin nge kan tih thin kha? “innei em?” kan ti thin. A chhan chu aneih leh neihloh kan hriatchian loh vang a ni. Mahse, annei ngei ani tih kan hriat chian sa chuan “Dal kg khat ka duh” emaw “Sikhar ka lei duh” kan ti mai thin, annei tih kan hriat chian em vang a ni.

            Hetiang bawk hian ani heng Thlarau rah te hi “inei em?’ tih ngai lova nei reng tur ngaih kan ni. Theihai hi Theihai kung atang arawn chhuak ani a, Serthlum hi Serthlum kung atang akan hmuh ani, thil dang atang akan dawn anilo. Chutiang bawkin, Thlarau rah te hi Nangmah atang achhuak tur a ni. Midang atangin a nilo. Keimah hi ani rah chhuahtu tur chu. Heng Hmangaihna, hlimna, remna, dawhtheihna, ngilneihna, thatna, rinawmna, thuhnuairawlhna, insumtheihna te hi keimahni atang a chhuak tur ani. Theihai chu Theihai kung ah arah ang chiah hian heng thlarau rahte hi keimahni ah a awm tur ani, a chiang em?

Thlarau rah chu tute tan nge?

            Anih leh thlarau rah chi hrang hrang a sawi kha tu te tan nge? ‘Nei rawh u’ atih te chu ‘keimahni hi kan ni tiru? Mahse, tute tan a nei tur nge kan nih? Tuten nge a rah lo ang? Midang tan a ni. Keimahni atangin thlarau rah te midangin an lo ang.

Engtin nge Thlarau rah kan neih reng theih ang?

            Thlarau rah hi kan neih theihloh tur nita se la LalIsua hian ‘va rah rawh u’ atilo ang. Neih reng theihloh tur nit a bawk sela ‘in rah chu awm reng rawh se’ ati bawk lo ang. Mahse, kan neih theih, kan neih tur, kan neih reng tur anih avangin ‘ rah rawh u, rah reng ula, atang rah tal awm reng rawh se’ ati a ni. Engtin nge kan neih theih ang le? Mahni inphat a, Krista rilru kan put a ngai a ni. ‘Mahni’ indah pawimawhna hian thlarau rah min neih tir theilo a, ‘midang’ ten keimahni ah ‘rah’ lawh tur an hmulo thin a ni.

 “Ka’ tih hi a lian em em a, ‘Krista rilru’ kan pu theilo a, chuvangin, keimahni ah Thlarau rah lawh tur a awm theilo, ‘Keima tan’ anih vek avangin midangin ‘eitur, lawh tur’ anhmu zolo ani. Kan Bible hian ‘Mahni indah pawimawhna neih map lova awm tur hi chuan min ti lemlo a, kan hlut zia min hrilh fo a, mahse, Mahni tanghma hai tak a rawngbawl emaw chu rilru put erawh chu a dem hle thung a ni, a chhan chu ‘Mahni’ a len viau tawh chuan ‘rah’ lawh tur hi midangte tan a awmlo a ni. Tawite te in en ila:

1) Israel te ah: Pathian in Abrahama a kohchhuah tum a, a thusawi tawp lamah khan mal a sawm tur thu a sawi hnu ah “Khawvel a hnam tin reng I zarah annihlawh ang” ati. Israelte chanchin kan en chuan hnam dang nen a indo tam viau mahse Pathian thil tum erawh chu ‘Khawvel entu, rah chhuahtu tur’ ni tur a dinchhuah a ni. Mahse, kha kha Israelte khan an hai a, malsawmna an dawn leh Pathian Kohna kha anmahni hnam bil tan a pumbilh an tum tlat avangin Lal Isua meuh pawh anlo hai phah ta a ni. Pathian in Ninevi khua a Jona a tirh te khan a hreh ngawih ngawih zia kha…Jentail khawpui Ninevi kha kangral vek mahse pawi a tilo reng reng.

Nikum Puitling Sunday School ah Juda lalte chanchin kan zir, an zing a pahnih khat tihloh chu a hun tawp lamah Pathian duh loh zawng anti vek. A thiltih a langsar tak chu Chapona, mahni in dah pawimawhna, Pathian aia Mahni indahsanna kha a ni. Hei hi a ni Lucifer-a meuh pawh a tlukna kha.

2) Lal Isua ah: Lal Isuan rawng a bawl phat atanga a rawn tihlan ber chu ‘Midangte tan a nun’ kha a ni. An zeldin dan pakhat phei chu Setana’n lung chhang a chantir tur a athlem khan, kha a thiltihtheihna kha amah eitur bik atan hmang lovin mipui sangnga hraina atan a khek zawk ani anti.

            Lal Isua zirtirna ah khan ‘Mahni’ lam a langsar tawhlo a, ‘midangte tan’ tih kha a thupui ber a ni. Engtin nge Krista rilru an sawi kha? “Ani chu Pathian anpui ni mah sela, Pathian tluka awm chu tum tlat turah a ngai lo va, mahni intitlawmin bawihah a insiam a….”

3) Tirhkoh Paula zirtirna ah: Tirhkoh Paula hi theologian ropui tak, Lal Isua zirtirna rawn sawi zau a, ching leh zual a rawn chhuitu a ni bawk a, ani pawh hian “Mahni ta pawh inni tawh hleinem, mana lei inni tawh zawk a sin” tiin chiang takin min hrilh a ni.

            Tirhkoh Paula hian ‘Mahni indah pawimawhna’ hi mihring rilru lam atang a rawn chhuak a ni tih a hrechiang viau niin a lang a, he rilru pu chung chuan Pathian duhdan leh A lawm zawng pawh a hriat theih loh ati hial a ni. A lehkhathawn a sawi tam em em pawh ‘Krista a khenbeh anih thu te, Krista bawih anih thu te ani. Rom khua a amite hnen a a sawiah pawh khan, “Tunlai khawvel awm dan hi tawm suh u” atia, a duh tawk mailo “In nunphung chu tihdanglam  ni vek rawh se” ati satliahlo, a tih danglam bul tanna lai tur hrilh in “ in rilru tihthar a awmin” a ti kher a ni. Chu rilru chu tih thar anih loh a, ‘Pathian aia Mahni’ a chungnun chhung chuan Pathian duh zawng, tha leh lawm tlak leh that famkim chu hriatthiam ngaihna a awmlo a ni a ti.

Conclusion: Chuvangin, ‘Mahni indah pawimawhna (individualism) hi dahbo ila, Rawngbawlna chu ‘Midangte tan a inpek, mahni in phatna nun’ ani tih ihre thar in, keimahni ah theuh hian Thlarau rah kan sawi hrang hrang te kha rah chhuah tir ang u. Amen.