“Lalpa ah lawm rawh u”

“Lalpa ah lawm rawh u”

Hab.3:17; Phil.4:4;

Mihring tan hlim reng hi thil har tak a ni, nuih reng phei chu angaihna a awmlo leh zual...nui vur vur reng leh khi sung reng te hi chu ‘mi ang vaklo’ hmuh in kan hmu mai thin.

Nimin zing chu Serchhip ah kan kal a, kawng lakah hian bawngkai hi kan tawk phei duah duah mai a, chutih lai tak a ka rilru a awm chu ‘Hringnun hi khualbawng an rawn kaih duah duah ang mai hi kan ni, tupawh mai hian kan thihna lam tur kan pan duah duah a, nitin hian kan hnaih telh2 a ni. Bawng thenkhat chu kawnglakah an thi a, thenkhat chuan hliam an tawk a, an kal tha hleitheilo, mahse ke na chung chung paw’n a kaitute khan an kai thleng tho tho, kawnglak a anpenbo kha anphal hauhlo ani. Hringnun pawh hi kan duh emaw duhlo emaw a kal athulh chuanglo, thenkhat chu nuam titakin, hahdam takin kan kal a, thenkhat erawh chu hrehawm ti reng reng in, mahse la boral tur vek kan ni. Bawng thau tak pawh antalh a, cher tak pawh antalh tho a, chutiang bawkin kan hausa emaw rethei emaw mifing kan ni emaw nilo emaw engtik ah emaw chuan kan huntawp hi ala thleng ve ngei ngei dawn a, he tawpna lampan hian nitin ke kan chhep a ni, kan hringnun zin kawngah hi engtin nge kan chhiar chhoh ang?

Tu pawh mai hian harsatna kan tawk thin, mahni tawk a phurh kan nei theuh. A chang chuan keimahni thil tihsual avang a lungngaih leh mangan chang kan nei thin tirawh u, a chang erawh chuan kan thil tih vang leh sual vang nimiahlo ni a kan hriat ah pawh tawrh chang kan nei thin...Ringtu kan ni emaw Rawngbawltu kan ni emaw tupawh mai hian he hringnun zinkawngah hian harsatna, manganna leh lungngaihna hi kan tawk theuh a ni.

Chanchintha ziakah khan LalIsua’n engtin nge atih kha “Nangni thawkrim leh phurrit phur zawng zawng teh u, ka lo chawlh tir ang che u, ka nghawngkawl bat ula ka hnenah zir rawh u...ka phur pawh a zang a ni” ati...LalIsua’n engmah phurh neilova min awm tir a tumlo, kan nghawngkawl min thlaksak mai zawk hi atum ani. Tirhkoh Paula pawh khan Sual do nan Pathian ralthuam famkim a inthuam turin min ti, a chhan chu Sualte, thil thalo te, vanduainate, lungngaihna leh manganna, harsatna te hi abo dawnlo. Pathian hian Sual hi kan hmuhphak loh leh khawihphak loh ah dah atumlo a, keimahni zawk hi sual leh tawhlo tur a min siam hi atum zawk a ni. Eden huan ah khan Evi leh Adama te khawihphak rengah ‘phalloh’ thil a dah, chutiang bawkin kan khawih phak leh hmuhtheih ah hian kan damchhungin thil sual tih tur a awm anga, sual paw’n nasa takin min bei reng bawk ang, mahse ringtu chu ‘Chhandamna bang a inhung zawk tur a ni.

Kan lungngai thin a, kan duhdan ang leh remruatloh dan ang tak ten thil a kal thin a...vanduai bik riau niin kan ihria em? Theihtawp in Pathian rawng kan bawl a, ama tan kan nung a, thawhlawm leh tha kan thawh a, kan hun tam zawk Kohhran thil tihna ah kan hmang ral a, mahse vanduaina leh harsatna ten ringtute hi min kal kalhlen bik chuanglo, mimalah, chhungkua ah, khawtlangah harsatna chi hrang hrang ten min tlakbuak ve tho a, a chang phei chuan Kohhran ngaihsak vaklo te hi anhmui ngil zawk nihial in alang, chuvang chuan alawm Sam ziaktu pakhat paw’n “ka rap pelh telh telh a..” ati. Pathian lak a vui mai pawh hi thil awltak tur ani.

Bible in engtin nge atih?

“Lalpa ah chuan lawm rawh u” ati, harsatna te, manganna te leh lungngaihna ten min tlakbuak lai pawh a ‘Lawm turin, lawmthu sawi turin’ min ti a ni.

Mahse, ngatinge kan lawm loh leh thin, kan lungngaih a, kan vuivai leh thin le?

Kan lawmna leh hlimna hi innghahna diklo a a innghah thin vang a ni....In kan sak dawn chuan a foundation kan uluk thin, a foundation athat loh chuan engang pawhin sa nalh mahila atlo ngailo.

Chutiang bawkin kan lawmna te, kan hlimna te hi pawisa ah te, mihringah te, bungrua...thawmhnaw thleng pawhin, hetiang a kan nghat anih chuan lawm loh chang kan ngah ang. Christmas alo thleng leh dawn a, pawisa neihtam loh vang te, thawmhnaw duh ang neihloh vang te a kan lawmlo anih chuan kan lawmna in nghahna adiklo tihna ani.

Innghahna dik chu enge?

 Ringtu chuan a lawmna leh hlimna chu ‘PATHIAN’ ah a nghat tur a ni. A chhandamna ah te, a zahngaihna ahte, venhimna ah te, tih harhna ah te a innghat zawk tur a ni, chutiang a in nghat nun kan neih phawt chuan pawisa, bungrua, thawmhnaw leh he khawvel thil hian kan lawmna leh hlimna hi min laksak tawplo ang.

Bible hian ‘ Lalpa ah lawm rawh u’ a ti mawl tawp lova, engvang a lawm tur nge kan nih min hrilh tel ani.

1.      Van a kan hming ziak anih avang a lawm tur kan ni (John 20:20)

2.      Chanchintha hi hril anih avang a lawm tur kan ni (Phil.1:8)

3.      Pathianin ama tan a tuar tlak a min ruat avang a lawm tur kan ni (Act 5:41)

4.      Midangten nunkawng dik an zawh ve avang a lawm tur kan ni (2 John 4)

5.      Lawm fo tur a hrilh kan ni (1 thess 5:16)

Chuvangin engkimah hian lawmthu hril a, lawm mai tur kan ni, kan chungah eng ang pawh lo thleng se, engang dinhmunah pawh awm ila, Pathian ah kan lawmna leh hlimna a in nghah tlat chuan lawmthu sawina tur kan hmu zel ang...kan duhdan ang leh beisei angin he khawvel leh hringnun hi akal diak diak dawnlo,mahse Lalpa’n kan tan a tha tur hi keimahni aiin a hre zawk a Amah a innghat ringtu, Amah ring tlat a, A remruatna a piang ‘Amen’ pe thei zel tute hi mi nihlawh anni a, Pathian thuawih anni bawk, chung mite tan Vuina tur reng reng hi a awmlo ani.