Theodicy

Pathian Hmangaihna :Tuarna karah:

Text : 1 John 4:9-10. Psalm 73:1-4 ; John 16: 33

                    Mihring nun tluang purh mai, harsatna leh vanduaina enge maw tal pawh la tawk miahlo hi kan awm angem le? Kan awm hauhlo ang le..han chhut vang vang ila engemaw hunlai kha chuan kanlo in dawm kun ve tlawk tlawk tawh ani lawmi? Tunah pawh hian midangte hriatpui silo a rilru hah em em, vanduai inti ngawih ngawih pawh kanlo awm mai thei e…eng pawh nise chu vanduai kan intihna tarmit atang chuan Pathian hmangaihna kan thlirho dawn ani.

Ahmasa ber in Tuarna/Vanduaina kan tih hi enge maw nile?         Sawifiah tum vak angai hranlo ti ru. Mitinin kan intawm tlan thil, hausa leh rethei pawhin a kan tawrh tlan thil ani tlat. Mimal nuna vanduai intih changte, chhungkua anga vanduaina tawh tum te kan nei thin, a tawi zawngin Vanduaina chu thil hrehawm tak, kan taksa leh rilru tina tu hi ani mai awm e.

          Kristian kan ni a, Ringtu, Pathian engkimtithei betu kan ni. Mahse he vanduaina kan tih hian min kal kahlen bik miahlo, han ngaihtuah mai chuan keini ringtu te hi chu Lalisua nen kan intawh a chinah chuan hlim leh lawm taka hun hmang a, malsawmna tam tak pawh ringlo te aia dawng tam deuh bik awm tak kan ni a, hrisel te pawh hrisel awm bik tak kan ni. Mahse ani miah silo…a vanduai thei hlei hlei emaw tih tur hian harsatna leh mangangna te hi a hlawp hlawpin mimal nunah leh chhungkua, khawtlangte ah alo thleng thin ani lawmi?

          Harsatna te, mangangna te, vanduaina ten kan chungah thla an zar tawh hi chuan “ngati nge kei kher?’ “ngatinge keini chhungkher?” ti a inzawh ruai ruai mai hi thil awl tak ani. Pathian lam ngaihsak vak awm a langlo te hi an vannei em em a, an hausak thur thur laiin Amah ring tlattu te khawsak a harsa leh thung si….Pathian rorel dan hi hriatthiam ahar thin ani lawmi? Sam 73 ah pawh “ Ka rap pelh telh telh a, ka ke pen pawh a tleu lek lek ani” tih kan hmu ani.  

Chuti anih chuan Pathian hian Kan tuarna te hi ahre lo emni le? Bible han keu ila, Engkim chunga thuneitu leh engkim ti thei Pathian anih thu kan hmu a, LalIsua ngeiin Chawngzawng pakhat pawh Pathian hriatpui lohin leiah an tlak loh thu min hrilh a, kan samzai nen lam pawh a chhiar vek kan ni. Sam ziaktu pawn 139 na ah khan “ min hriat zia hi amak lutuk a, ka tan hriat phak rual anilo” ati thlawt mai ani.

Awle, chuti anih chuan he khawvel a thil thleng hi Pathian hian hriat loh aneilo ni awm tak ani…mahse ngati nge vanduaina te kan la tawh fo thin le. Hmangaih Pathian ani si..” kan ti a, Zawhna ava tam em ti ru.

·       Engati nge nausen duhawm tak kha natna khirh takin atlak buak tlat le?

·       Engati nge Chhungkaw chawmtu ber kha Pathian in a boral aphal?

·       Engati nge midang pawh antam nen kei kher hian Natna ka tawh bik?

Tuarna kar atangin Pathian hmangaihna chu enge nita ang le?

          Pathian hmangaihna hi athuk em em a, mihringte kan in hmangaihna atanga teh chuan hriatthiam pawh a harsa lek lek thin. Kan hmangaih tak ten hrehawm an tawrhte, vanduaina an chunga a thlen te, an tah te hi kan phal ngailo ani ti rawh u, lakkian sak kan tum thin. Mahse Pathian hmangaihna ah erawh chuan chutiang chu ani hauhlo.

          Bible in “ Pathianin khawvel a hmangaih em em a , tichuan, a fapa mal neih chhun a pe a..(John 3:16)” tih thu min hrih a, Pathianin khawvel a hmangaih em em a, tichuan Vanduainate, harsatnate, tuarna zawng zawngte ala bova’ atilo. Min hmangaihna chu LalIsua Krista ah a tilang zawk ani.

·       Pathian chuan a hmangaihna chu thiltihtheihna leh ropuina hmangin atilanglo a, Amah leh amah in ngaitlawmin, inbunruak vekin, mihringte tawrhna tawmpui turin alo kal ta zawk ani.

·       Pathian chuan ahmangaihna chu thil mak pui pui leh thil thleng danglam tak hmanga rawn puang chhuak lo in, Kraws hmangin arawn puang chhuak ta ani. Kan tuarna zawng zawngte, Vanduai kan intih thinna zawng zawng te kha amah ngeiin a takin arawn tuar ve ta zawk ani. Chu chu ani Pathian hmangaihna chu.

·       Kan Pathian hi hla taka a awm a, kan harsatna te, kan lungngaihnate leh kan tuarna te pawh chung lam atanga rawn thlir thintu emaw kan ti mai thei a, Mahse a hmangaihna avangin kan tisa ang pu chungin kan harsatna te hi ahmun atang ngei hian athlir mai pawh nilovin, a rawn tuar ve zawk alo ni.

Chuti anih chuan Vanduaina kan tih hi Pathian hmangaihna hnuai a thil thleng alo ni. Hla ah pawh ‘Keinin vanduaina a kan ruat, a hmangaihna lantirtu’ kan ti thin ani lawmi kha….chuti anih leh zel chuan engtin nge kan tih tak ang le?

1. Ahmasa berah chuan ‘Amen’ pe rawh.

          Kan duhtak te an boral tumte, harsatna namen lovina min tlak buak tum te hian ‘ Amen’ tih ahar thin. Mahse, Pathian thuneihna a thleng anih avangin ‘ithu nise’ ti a Ama hnena kan intuk luh mai kha a ngai ani.

2. Pathian hnena lawmthu sawi:

          Pathian hmangaihna vanga thil thleng anih avangin ‘ka thatna tur ani a, Lalpa lawmthu ka hrilh a che’ kan tih angai ani. Tirhkoh Paula chuan ‘engkimah lawmthu sawi ula’ ati a, kan hlim lai chauh a lawmthu sawi tur kan nilo ani.

3.  Tuarpuitu kan nei tih kan hriat chian angai ani. LalIsua khan tuarna hrang hrang, thihna thleng pawn alo tuar ve tawh a,

Hebrai(2:18) lehkhathawnah pawh ‘ amah ngei chu thlemna tuar chhuak tawh anih avangin thlemna tuar te pawh atanpui thei ani’ tih kan hmu ani.

A tawp berna atan chuan I mimal nunah emaw in chhungkua ah Vanduaina chi hrang hrang ilo tawk tawh maithei, tunah ngei pawh khan ilo tawk reng ani mai thei e…thihna vangte, Natna khirh tak vangte, sum leh pai lam a harsatna vangte, nupa inkar emaw nulat tlangvalna lam pawh ani mai thei.

          Tin, I fate sualna avangte, ei leh bar zawnna avangte, thil dang dang vangte pawhin ‘vanduai bik’ inti in, lungngai takin ilo awm thin em? Pathianin I chunga thil thleng zawng zawng kha ahre veka, Hmangaihna avangin a tahpui che a, mahse kha kha itana tha tur, thlarau lam a malsawmna idawnna tur leh Pathian imamawh zia hriattirtu tur che ani asin.,