Pathian hun pek belh chhunga cheng kan ni

                                             Pathian hun pek belh chhunga cheng kan ni

Isaia 38:5 & 15-20

George Chamber-a hi rail ah kuli hna thawk a ni a, nikhat ah darkar 12 a thawk a. Khawvar atanga khawthim thleng thakin a thawk a, thawkrim hle mahse a hmelah hrehawm tihmel a lang lo va, a hlim thei reng. Miten mak an ti hle a, a chhan an zawh chuan heti hian a chhang a, “Kum hnih kal ta khan Damdawi In ah ka awm a, Doctor in darker 24 chhung chauh nunna chance ka neih thu a sawi a. Ka tawng thei lo a, chau takin thih hun nghakin ka mu hlawm tawp mai a ni. Mahse, mak tak maiin ka lo dam chhuak leh ta a, kum 52 hnu ah ka piang tha leh ani ringawt. Pathian in hun min pek belh chhunga cheng ka ni tih ka hre chiang a. Chuvangin, ka tan chuan hun hi a hlu a, a tangkai leh tha thei ang bera hman ka tum a, ni thar lo chhuak zel te hi ka tan chuan thil mak danglam a ni vek tawh”

 Mi zawng zawng tan hun ruat a awm:

'Engkim tân hian hun ruat a awm a, Vân hnuaia thiltih zawng zawng tân hun remchâng a awm” THUHRILTU 3:1 tih thu kan hmu a, Mihring mai nilo thilsiam zawng zawng tan hian hun ruat a awm a ni. Tuna kan kum zat ang hi kan ni reng thei dawn lo a, upat hun kan nei ang a, thih hun kan la nei ang. Chutiang zelin thenkhat an lo piang ve thung ang a, “Ka ta” emaw kan tih thin kha “an ta” alo ni ve thung tawh ang. Hun in ang pek vek kan ni a, nikhat ah darkar 24 kan nei, nei belh bik an awm lo. He hun kan hman dan a zir hian kan nakin hun a hril thin. “Hun ka nei lo” kan tih thin te hi a nihna dik takah chuan keimahni zawkin hun kan hman dan zawk kan sawina a ni. Hun hi chu a kal ngaiin a kal reng ang, chu hun ah chuan kan cheng mai zawk a lo ni.

            Lal Solomon-a hian a lo hmuchiang khawp mai. Engkim tan hian hun a awm a, kan hun bi ah kan piang a, kan nung a, kan che a, kan hun a liam hunah midang an ni ve leh thung a. Hun neitu kan ni lo a, hun ruat chhunga che ve mai kan ni. Chu hun duangtu leh neitu chu Pathian a ni.

 Hezekia chu hun pek belh a ni: Lal Hezekia hi Judai Lal 13-na a ni a, kum 29 chhung a lal a ni. A hun lai hian Israel lalram kan tih kha a awm tawh lo a, Asuria sawrkar erawh rawn lian zelin Judai ram pawh rawn lak tumin a inpuahchah a ni. Hezekia hi lal tha tak, Pathian tih mi tak niin Judai ram siam that hna a thawk nasa hle a, a pa hunlaia milem biakna te ti boralin Baal an biakna hmanrua Aseri te a kit bawk a. Sakhuana leh ram ruhrel hmasawnna ah theihtawp a chhuah a ni.

            Mahse, Hezekia chu natakin a damlo ta a, 2 chr.32:25 “Lalpa thiltihsak avang chuan lawm nachang a hre lo a, a chapo avangin chuan Judai ram leh Jerusalem chuan an tuar ta” Tichuan, Zawlnei Isaia kaltlangin Pathian in, “I chhungkaw thu rel fel rawh, I thi dawn si a, I dam chhuak dawn lo ve” tih thu ava hrilh a, Hezekia chu in chhir vanga tap chungin Pathian khawngaihna a dil a, Pathian in kum 35 in a dam hun chhung a pawh sei sak ta a ni.

            Pathian hun pek belh chhunga cheng Hezekia tawngtaina atang te, Zawlnei Nathana’n Lal Davida sualna a hrilh hnua a hla phuah atang te, Tirhkoh Paula pianthar hnua a thuchah atang te in Pathian kan pawlho ang a. He hun pek belh chhunga kan awmdan tur tawi te te in kan sawi dawn a ni.

Hun pek belh chhungah keini pawh kan cheng:

            Thlanmualah va kal ila, kan rualpui boral ta tam tak lungphun kan va hmu ang. Zualko thu post en ila, nausen atanga naupang, thalai atanga nu leh pa, pitar leh putar thih thu nitin Mizoramah pawh hmuh tur a awm ta. Tin, kan hun kal tawh chhui kir ila, “chutiang chu thleng palh ta se, ka thi tawh mai thei a ni” tih chang kan neih ka ring. Motor-a an accident-na hmun tam tak ka tlan pel a, zan khaw chhe hnuai ah thui tak tak ka tlan fo. “Kha kawng kualah khan lo tlan chak deuh hret ila chuan ka kual chhuak zolo ang a, kham ah khan ka lum ngei ngei ang a” tih chang hi ka nei thin.

            Chuvangin, eng vanga tun thlenga dama kan la awm bik? Pathian hun pek belh chhunga cheng tura thlan kan la nih vang chauh a ni. He hun pek belh (added time) hmangtu kan nih vangin hun min petu duh zawnga kan nun kan hman a ngai a ni.

1) Rom 12:2 ah khan “Tunlai khawvel awmdan ang hi tawm suh u, in nunphung chu, in rilru tih thara awm in tihdanglam ni vek rawh se” tiin Paula, Pathianin enga a chhun thluk, hun a pek belh hmang mek khan a sawi a ni.

            Sam 51 hi Zawlnei Nathana’n Davida sualna a hrilh hnua Davida’n Pathian a auhna hla a ni. “Aw Pathian, keimah ah hian thinlung thianghlim siam la, rilru thar nghet tak min pe ang che” a ti. Tin, Hezekia pawhin “Ka dam chhung zawng Lalpa inah Amah fak hla ka sa tawh ang” tiin hun pek belh chhunga a awm chiah khan rilru thar nen a in hlan nghal bawk.

            Enge rilru thar chu?

            Rilru thar chu rilru hlui, bawlhhlawh lo hi a ni mai. Khing mi pathum kan sawi te hian Pathian khawngaihna vang chauha tun dinhmun thleng thei anni tih kha an hrechiang ta a, chu chuan an khawvel thlir dan pawh a thlak ta vek a ni. Paula khan Kohhran a ti duhdah thin, Mahse, Pathian khawngaihna a hmuh fiah takah chuan rilru thar a lo nei a, a chapo tawh lova Kohhran tan theihtawp a chhuah ta zawk. Chutiang bawkin Davida khan Uria nupui kha ‘duh duh thing thei Lal ropui’ a nihna hma chhuanin a uire a, mahse, chutiang rilru a put tawh loh nan rilru thar a dil a ni. Lal Hezekia pawh kha lal fel tak a ni, mahse, a thil tih tam tak kha ama tih emaw tiin a chapo pui a, Pathian in a hrem ta a, mahse, Pathian khawngaihna a chan takah chuan rilru thar a pu ta.

            Rilru thar chu Pathian khawngaihna hriat chianna rilru hi a ni mai. Chu khawngaihna man chiangtu chuan rilru kawi sawi, chapona rilru, rilru tui ek a pu thei tawh lo. Engkim hi Pathian vang a ni tih hria in lawmthu a sawi a, hrehawmna ah lawmna a chhar a, manganna hmunah thlamuanna a nei thin.

            Kan zirlai naupang pakhat chu an harsa ve khawp mai a, nikum fee leh kumin a fee ba zawng zawng kha Sing chuang fe a ni. Lehkha zir peih lutuk ala ni lo zui a, hauh hleihtheih chiah silova ninhlei ve chi leh zirna ngaihsak lo a ni. Mahse, tum khat chu mi pakhat a lo kal a, a fee ba zawng zawng chu a rawn pek sak vek a, a hming tarlan a duh lo. Tin, tu fee ba nge a pek sak tih pawh hre lovin kan kutah pawisa a rawn dah tawp a ni. Tichuan, naupang chu ka ko a, mi khawngaih vanga an fee ba zawng zawng pek tlak sak an nih thu te, theihtawpa lehkha zir tawh turin ka fuih a. Chu khawngaihna dawngtu chuan a khawngaihna dawn chu a hmu fuh in ka hria, theihtawp a chhuah zui ta a ni.

 2) Pathian hun pek belh a chan hnu khan Hezekia khan engtin nge a tih kha, “Lalpa, I tan ka nung ang a, Nangma tan chauh ka nung tawh ang” a ti. Lalpa tan nun, a tan chauha nun hi Pathian hun pek belh chhunga cheng te nun dan tur a ni. Nitin khawsakna ah mamawh kan nei a, nitin hna kan thawk thin. Mahse, heng zawng zawng ai hian Pathian kan dah lian thin em?

            Khawvel inrelbawlna lam sawi lawk ila. India ramah kan awm a, India khua leh tui nihna nei kan nih vangin Indian kan ni. Indian nihna chu National Identity an ti. Chutihrualin, Mizo ka nihna erawh Sub-national identity a ni thung. Sub a nih tawh reng reng chuan a te zawk a ni thin, Committtee ah pawh sub-committee tih a nih chuan Committee atanga a peng te sawina a ni thin.

Hetiang hi Philipi 3:20 ah khan enge kan hmuh kha “keini zawng Van khua leh tui kan ni si a..” a ti. Ringtu National identity chu Ringtu a nihna kha a ni, a bak te hi chu sub-national identity mai chauh a ni zawk. Chuvangin, Ringtu chuan a national identity Ringtu a nihna ah Hezekia ang khan “Lalpa tan chauh ka nung tawh ang” kan tih a ngai a ni. A aia dah leh leh ngaih pawimawh zawk neih a rem lo. Vanram kawngka min paltlang tir theitu chu Ringtu nihna national identity chauh a ni. A bak thil dang kan sum leh pai, rohlu, he khawvela nihna kan neih ve kan sub-national identity hi awmzia awm lo.

Chuvangin, tu tana nung tur nge kan nih? Khawi identity zawk nge dah hmasaka ngaih pawimawh zawk tur tih kan hrethiam awm e. Davida te, Hezekia te leh Paula te khan an sub-national identity nihna kha an lo hma chhuan thin a, Pathian pawi an khawih ta. Mahse, Pathian hun pek belh chhunga cheng an ni tih an hriat chian hnu chuan Van khua leh tui nihna zawk kha hma theh ah an nei ta zawk a ni.

 3) Hezekia khan Pathian tihdamna a chan a, a hun pek belh huam chhunga a chen chiah khan enge a sawi kha, “Ka tuarna avang hian ka dam chhungin ka kal dem dem tawh ang” a ti. Hollywood movie star Paul walker kha kan hria em? Kan hriat loh pawh in a film channa The fast & Furious, motor chak tak taka in um zuai zuaina film chu kan en tawh in a rinawm. Fil star lar tak a ni a, a hmel pawh a tha em em, mahse, a motor khalh kha alo tlan chak deuh a ni, a thianpa chuan 90 mph a ni a ti. Chutiang khawpa chak chuan a tlan a, motor a thunun zolo a, kawngsira thing ding a va su dawt mai, a boral phah ta a ni.

            Zawitea kal dem dem tih hi muangchanga kal ani ringawt lo a, fimkhur taka nun hman, inchhuih tlukna tur tam em emna hmuna kawng dik zawh hi a ni. Sam 119:105 hian zawitea kal dem dem dan chu a lo hre chiang khawp mai, “ I thu hi ka kea tan khawnvar a ni a, ka kawng atan eng a ni bawk” a lo ti. Engpawh ti dawn ila, Pathian duh dan a ni em? Pathian thu nen a in mil em? Ringtu tih atan a mawi em? tih ngaihtuah hmasa chunga ke kan pen a ngai ani. Ngaihtuah chiang hmasa lova thil kan tih hian kan inchhuih tlu thin a, anih loh pawhin Pathian laka ata kan bo leh thin.

            Tumkhat chu mi pakhat hian “thlawhna khalh chu ka thiam a lawm” tiin a thlawk chhuak ve ringawt mai a, hun enge maw chen nuam ti taka van sanga a leu hnu chuan tum a lo hun dawn ta, a tum dank ha alo la zir tel reng reng lo mai a, thlawhna chu a chetsual pui ta a ni an ti.

 Conclusion: Hmani lawkah Greatest Show on Earth an tih Football khel ropui tak tak kan en a, Inkhelh a piang khan hun pek belh an ni thin. A changing 10 minutes te, a ia rei deuh te. Added time ah chuan theihtawp an chhuah a, Coach thu leh hla an ngaichang nasa leh zual thin. Inthlahdah a thiang tawh lo a, tan mar pat a ngai. Hetiang chiah hian Pathian in a khawngaihna vangin hun pek belh chhungah min la chen tir a, hamrik tawp a rik hma zawng chu inthlahdah lovin, hrehawm deuh pawh nise theih tawp chhuaha National identity kan nihna Van khua leh Tui hloh lo tura kan beih a ngai a ni.