Mipa lu chu Krista a ni

                                                             Mipa lu chu Krista a ni

11 Kor.11:1-3

Tun tumah hian tisa leh thlarau lama pa mawhphurhna chungchang kan ngaihtuah ho ang a, chutihrualin, mipa kan nih hrim hrim vanga kan mawhphurhna pawh kan sawi tel tho ang.

            Khawvel ram leh hnam zawng zawng deuh thaw hi mipa lalna (Patriarchal society) kan tih a ni a, Mizo te pawh kan pi leh put e hun atang daih tawh in Mipa dah chung nunna, lalna hmun a ni thin. “hmeichhia leh chakai in sakhua an nei lo” tih te, “hmeichhe thu thu ni suh, chakai sa sa ni suh” tih te pawh an tawngkam a nih thin kha.

            Mizo te ang bawk in Juda hnam pawh khu Mipa lalna, rorelna hmun a ni a. Chhiar pui an neih reng reng khan hmeichhia leh naupang an chhiar tel ve ngai lo. Tin, mipui zat an sawi pawhin an chhiar tel ngai lo. Lal Isua’n mipui sangnga a hrai tum pawh in Sangnga an tih zingah hian hmeichhia leh naupang an tel lo a, chutih a nih chuan mi sangnga aia tam fe an ni tihna a ni. Tin, Thlahtu chhuina ah pawh hian mipa lam deuh char char hi a hrut a, kan Bible pawh hian mipa hi a dah chungnung hle a ni.

            Spiderman film kha kan en ve tawh mai thei a, Spiderman-a patea khan Spiderman-a hnenah, “Theihna a san pauh leh mawhphurhna a sang” tih thu a hrilh a, hetiang chiah hian Bible pawhin a dah san, taksa awm phungah pawh chak zawk, rilru hman thu ah pawh rorel thiam zawka a siam mipa te mawhphurhna hi a sang a ni.

 

Kan mawhphurhna san zia hi Tisa leh Thlarau lamin tawi te in kan sawi ang:

 

1) Tisa lamah: Engvang nge mipa hi chak zawka siam kan nih? Chakna hian mawhphurhna a keng tel a ni. A awmzia chu tisa thilah pawh hmeichhia te hum tu tur, chhungkua enkawl tu tur kan ni. Sa leh ral lakah pawh chak lo zawk naupang leh hmeichhia te humhim tura chakna leh theihna pek kan ni.

            He mawhphurhna hi kan hlen a ngai a, siam kan nih chhan pakhat a ni. Eden huana suala an tluk khan Adama khan thiamchan tum takin “Awmpui tura min pek khan ei turin min pe a ni” tiin chhuanlam a siam a, mahse, Pathian in a pawm lo. Mipa mawhphurhna a hlen lo a ni.

            Hei zirtirtu kan ni a, fate zirna chungchanga min rawn be tam ber leh rawn ngaihven tu tam zawk chu Nuho an ni. Pa thenkhat phei chuan an fate pawl zat pawh zuk hre lo a mawle! Zana an lehkha zir men puitu, buaipui tam ber tu hi nu ho bawk an ni. “I pa in enge zanah a tih thin?” kan tih hian “a leng chhuak thin a” an ti. Chhungkua hi i uap ang u, hei hi kan mawhpurhna a ni.

Mizo chhungkua tam takin mipa kan enkawl dan te hi a dik lo, hei hi hmeichhia aia mipa an thih tam zawkna chhan te hi a ni hial lo maw an ti thin. Hmeichhia chu in chhunga che tur, in enkawl tu tur, eirawngbawl, thlengsil, in suk Inchhung sekrek engkim mai thawk tura ngaih an ni. Fapa ten mu chunga TV an mai mai lain hmeichhia chuan thingpui lum, eirawngbawl a tih a ngai. Mipa chu leng chhuak rei deuh pawh nise hriatthiamna a awm a, hmeichhia erawh han leng chhuak rei deuh se, “Hmeichhia te te” kan tia, ‘awmdan phung hre lo’ kan ti thin. Hei hian mipa te tan sual tihna kawngka a hawng zau bik niin a lang.

            Chuvangin, mipa te hian kan mawhphurhna kan chian a ngai. Chhungkua enkawl tih hian sum leh pai thawh chhuah chauh a nilo, tisa taka puitling an nih theih nan chhungkua kan uap tam a ngai a ni.

2) Thlarau lamah: Thlarau lam nunah pawh mipa hian hma kan hruai a ngai. Hmeichhe lu chu mipa, mipa lu chu Krista tih hian a sawi fiah chiang khawp mai. Mipa te hian Lu ah Krista kan hman a ngai, Krista kan zawm a ngai. Nu ber sualna ai chuan Pa ber sualna hi chhungkua tan a pawi thui zawk a niang, Deut. 5:9-10 ah khan eng tin nge kan hmuh kha, “Kei Lalpa I Pathian thikthuchhia, pate khawlohna vanga fate hrem thin, mi haw tute chu chhuan thumna leh chhuan lina thlenga hrem thin leh, mi hmangaiha ka thupekte pawmtu sang tam takte chunga khawngaihna lan tir thin ka nih hi”

            Biak In ah mipa thutna a awl duai thin te, nuho thutna a khat hmur thung si te hi a vei awm a sin. Hawh u, thlarau lam nunah pawh hian chhungkaw hma hruaitu I ni teh ang u. Fate damlo pawh an lu chunga kut nghata Pathian hnena thlen ngam lo, tawngtai ngam lo pa hi enge maw zat an awm a sin.

            Kan mawhphurhna san zia hi ngaihtuah thar ila, Tisa leh thlarau lama Chhungkua aiawha Pathian dawr thei tur khawp in tan I la ang u.