KRAWSAH TUIHALIN A AU

                                                         KRAWSAH TUIHALIN A AU

Sam 69:21; Johana 19:28-30

Kraws chungchang: Krawsa inkhenbeh hi Phoiniki mite tih chhuah niin an sawi thin a, chu chu hnam dang te pawh in ching chhunzawm in Rom sawrkar khan misual nia a ngaihte hrem nan a hmang thin. Krawsa khenbeh hi Judaten misual an hrem dan erawh ani ve chiah lo thung.

            Herod Liana thih hnu khan Suria ram Governor Varus-a chuan Juda mi 2000 vel zet a kheng bet an ti a, khatih lai khan Isua hi kum 11 vel a ni mai thei. Chuvangin, Isua pawh khan Krawsa khenbeh awmzia te kha a hrechiang viau in a rinawm. Kraws hi chi hrang hrang a awm a, chung zinga lar zual pathum chu T anga siam te, X anga siam te leh kan hriat lar ber a chung lam tlem lawr awm ang te hi a ni.

A hunlai boruak leh Kraws: Isua hunlai khawvel hi Rom leh Grik finna san lai leh an khawvel a tuam lai a  ni a. Heng hunlaia mawina leh duhawmna an tehna chu midang aia chak zawk nihna ah te, thiltithei zawk nihna ah te, midang thuhnuai theitu nihna ah te leh hausakna ah te hian a ni. Mi chunga leng thei nihna kha nun duhawm, an nih chak leh tum a ni thin. Thil hlutna an tehna chu midang te aia thunei, chak zawk, ropui zawk tihna anih chu. Hniam zawk, chak lo zawk leh rethei zawkah nihna ah hlutna a hmu lem lo. Dik tak chuan Rom sawrkar in mi hmuh theih tura misual a khengbet te kha Sawrkar chak zia leh thiltihtheih zia lan tirna angah an ngai. Kawng sira sawrkar fakna Hoarding/Sign board an tar ang a nih chu.

            Khang hun laia mipui 40% vel chu sal an ni,a bak chu mi nawlpui, sipai, Lal leh mithiam kan tihte an ni leh mai a, mi hnuaihnung zawk te va chhan chhuah emaw va chawi san chiam tumna a awm lutuk lem lo. Tin, kan sawi tawh angin misual an hremna na ber chu Krawsa khenbeh kha a ni a, zawi muanga na tuar chunga tihhlum an duh vang a ni. A hunlai khawvel tehna ah Kraws kha chak lohna, tlawmna entirna a ni a, mahse, kha tehna kha hnehna anih zawk thu hi Lal Isua kaltlang khan tarlan a ni ta zawk a. A hunlai ngaihtuah chuan kha kha thu atthlak, pawm har tak, chaklohna entirna kha chakna entirna, hmuhsitawm kha chhuanawm alo ni zawk anih chu!

            Hei vang hi a ni mai thei Tirhkoh Paula pawhin Kraws hlut zia leh chhuanawm zia theihtawpa a sawi ni! Rom sawrkarin Kristianna kha an ram sakhuaa a pawm hnu ah pawh Kraws hi ualau takin an la leklam thei lo, a hnu kum sangbi sawm hnu ah chauh a nawlpui khan kraws hi tlawmna leh hnehchhiahna entirna nilovin tlawm zawk leh chaklo zawk te tan hnehna tarlanna leh hmangaihna vawrtawp chhinchiahna a tan an pawm thei chauh a ni. A hunlaia an ngaihhlut thlak danglamtu chu he Lal Isua an khehbehna Kraws kha a ni.

 

1) Lal Isua chu keimahni vangin Krawsah a tuihal: Krawsa Lal Isua tawrhna hi ral thlir a awl khawp mai. Mihring nihphungah hian mahni inngaih pawimawhna hi a lian em em a, ‘ka ngaihdan, ka hmuh dan, ka hriatthiam dan, ka pawm dan’ chu tehnana hmangin midang chunga thil thleng chu kan chunga thil thleng angin kan ngai pawimawh tawk lo fo thin. Mi pakhat pawh hian a tia lawm, “Midang thih tur thu hi chu ka awih a, ka la thih ve tur thu hi chu ka awih tak tak thei thei lo” Nula ho te hian an kawmthlang pitar thi aiin an hmaia arngeng awm hi pawi anti zawk an ti thin. Mi chunga chhiatna leh tawrhna thleng te hi “ava pawi ve” kan ti liam puat a, kan nun min nghawng ve tak tak loh vangin kan theihnghilh zui fo. He thlirna tarmit atang hian Kraws kan thlir a, Lal Isua tuarna va tawm pui ve tak takna nun hi neih a harsa thin.

            Mahse, heti zawng hian i thlir teh ang. He khawvela Lal Isua lo kal chhan kha keimahni vang liau liau a ni, kal chhan tur dang a nei lo. Kan  sual vanga chatuan hremhmuna awm tur ten chhandamna kan chan leh theih nan mahni intitlawm in, mihringah alo chang a, kan tuar ai tuarin kraws lerah tuihar dangchar in a awm a ni. Mihringte nangin mahni inngaih pawimawhna (Self centerness) nei ve se, he khawvelah lo kal chhan tur a nei miah lo. ISAIA 53:5 ah khan engtin nge a tih kha, “Nimahsela, ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta. A chiang em? kan Bawhchhiatnate, kan khawlohnate vangin a tuar a ni. Lal Isua tuarna chuan keimahni min nghawng a, kan aia tuar a ni tih kan hriatchian hunah Tirhkoh Paula ang khan “Kei erawh chuan kan Lalpa Isua Krista kraws lo chu ka chhuan loh tûrzia mai chu, chumi zârah chuan khawvêl hi ka tân khenbehin a awm ta, kei pawh khawvêl tân khenbehin ka awm a ni. (Gal.6:14) kan ti ve thei tawh ang.

 

2) Lal Isua tuarna chu thu awihna vang a ni: Kan sawi tawh, he khawvela Lal Isua lo kal chhan kha keimahni vang a ni a, chu chu a thuawih vang a ni. Gethsemani huana Isua a tawngtai khan engtin nge a tih kha, “ Ka pa, rem I tih zawng a nih chuan he no hi mi lak sawnsak ang rawh; nimahsela, keima thu nilovin nangma thu ni rawh se” a ti. Mihring mihrinna ah a tawrh tur kha a huphurh ve a sin. Phoiniki ten Krawsa khenbeh an hmuh chhuah chhan pawh rei tak na tuar phawt se an duh vang a ni anti. A tawrh tur kha a hre chiang a, mahse, ‘Keima thu nilovin nangma thu ni rawh se” a ti.

            Gethsemani huana an rawn man tum khan Petera’n lo chhan in Puithiam lalber bawih beng a sat thla a, Mahse, Lal Isuan lo khap, engtin nge a tih kha, “Vantirhkoh singsarih leh sanghnih aia tam zawk min rawn tirhsak nghal turin Pa ka ngen thei lovin min ring emni?” a ti. A duh chuan amah chhan turin a ko thla thei. 72000 hi Rom sawrkar a sipai pawl an sawina legion 12 an ni, legion khatah hian sipai 6000 vel an awm thin, Vantirhkoh 72000 aia tam thil tih theih zia tur chu a hriatthiam theih mai awm e. Thawnthua an sawi dan phei chuan khatia Gethsemani huana an man zan khan Vantirhkoh rual te chu thupek nghakin in ring takin an awm a, khawvel ti chhe vek thei tur khawpa chak an ni. An khenbeh lai phei chuan Vantirhkoh Michael-a phei chu a thinrim nasa. Mahse, Isua hnen atangin chhanchhuak tura thupek an hmu lo, Isua khan thuawih takin a tawrh tur kha a thlang ta zawk a, chung lam hnena a thu thlen pawh Vantirhkoh  koh thlak lam nilovin, “Ka pa, anni hi ngaidam rawh, an thiltih an hrelo a ni”

 

3) Lal Isua thuawihna chu chhandamna bulpui a ni:

            Engvangin nge Lal Isua khan thuawih taka thil a tih? A hmangaih mihring te chatuana boral tur ngai ngam lovin kan tuar ai a tuar a ni. Mi thenkhat chuan ‘Pathian a nia, a na tawrh te kha a tan chuan a nep deuh ang chu’ an ti thin, mahse, a nilo, mihring tak a ni, vuak a tawrh te, khenbeh a tawh te kha keini ang thova na hretheia tuar a ni. Mahse, khang zawng zawng ah khan Isaia 53:7 thu angin “ Ani chu hnehchhiah leh tihduhdahin a awm a, inngaitlawm takin a tuar zel a, a chhang let ve hauh lo;Beram talh tur an kaih laia a ngawi tlat leh, Beram a hmul meh laia a ngawi reng thin ang hian, a ni pawhin eng mah a sawi lo”.

            A Pathianna ang khan che ta se, Vantirhkoh ko thla in tharum nen hnehna chang ta se keini mihring tan chhandamna kawng a in hawng lovang. Mahse, Lal Isua thuawih vangin mi chak lo ber pawh a mah rin chhan tlata hringnun a zawh chuan chhandamna kawngka hawn sak a ni tawh a ni.

Conclusion: 1 KORINTH 1:18 “Kraws thu chu boral mêkte tân chuan thu âtthlâk a ni, keini chhandam mêkte tân erawh chuan Pathian thiltihtheihna a ni”  A hun laia sawrkar in a chak zia entirna chu krawsa mi a khenbeh thin kha a ni. Inhremna zawng zawnga na ber leh mualphothlak ber chu Krawsa khenbeh nih kha a ni. Mahse, Lal Isua Krista zarah tunah chuan Kraws chu hnehna entirna, Pathian thiltihtheih zia lanna, Hmangaihna vawrtawp puanchhuahna alo ni ta zawk.