Vanram
Vanram
Kol. 3:1&2; Filipi 3: 20; Rom 8:18
Mizo Kristian te hi vanram ngai tak hnam
kan nih hmel a, kan hla ah pawh hian Vanram ngaih hla a tam khawp mai. Kristian
kan nih tirh te kha chuan Vanram an ngai a, an sawi nasa a, hla ah pawh an
phuah chhuak nasa hle a nih kha. Mahse, tunlai Kristian te erawh Vanram
chanchin kan sawi khat ta deuh em? He lei chungchang hi kan sawi nasa mah mah
tawh zawk em? Tih chang ka nei thin. Hmanah chuan miten Kristian te chu he
khawvel thianghlim san tum, Vanram chauh ngaihtuah, he khawvel ngaihsak tak tak
lo min ti thin. Mahse, tunah erawh he khawvel hi kan ngaih sak mah mah tawh zawk
em?tih hi ngaihtuah tham tak a ni ta.
Hmanlai Judate pawm
dan: Bible ah hian Van tih hi vawi tam tak a
lang a, chutihrualin, ‘Vanram’ tih tak hi chu Thuthlung Thar tawngkam a ni.
Hmanlai Judate ngaihdan ah chuan van leh khawvel (universe) hi hmun thumah an
then a, van a chungnung ber a, a dawtah lei awmin lei hnuaiah tui thuk tak
awmin an ring a ni. Van kumkulh chungah khian tuipui awmin an ring bawk a,
kawngka tam tak awmin kawngka a in hawn chuan ruah angin tuipui tui a rawn sur
thin niin an ngai. Pathian awmna ni a an rin chu tuipui chungah daih chuan a
ni. Tin, lei hnuai tuipui thuk tak hnuai leh ah chuan ‘Sheol’ awmin an ring a,
tah chuan mithi thlarau zawng zawng hi an kal turah an ngai.
Hmanlai Judate khan
vanram emaw hremhmun emaw suangtuahna kha an nei pha meuh lo. He ngaihdan hi
chu saltan lai atanga Persian ho rindan an puak chhuah, Thuthlung Thara Lal
Isua rawn nemngheh a ni. Chanchin Tha bu ah pawh Matthaia hian a rawn hmang bik
deuh a, a chhan chu Matthaia hian Juda ten Pathian hming an lam hreh zia hre
rengin Pathian ram tih aiah Vanram tih tawngkam a rawn thlang zawk a ni.
Rev. Lalbiaktluanga
khan Thupuan hrilhfiahna bu a ziah ah khan vanram zau zawng tur heti hian a
sawi a, “A dung 2400 km, a vang 2400 km,
a san zawng 2400 km” a ti. Mel 1500 bial a nih thu sawiin khawvela mihring
zawng zawng pawh hi chhawng khatah ringawt pawh kan la thawl tur thu a sawi a, chhawng 1499 ala ruak a ti.
Tun tumah pawh hian
Vanram chungchang hi eng vanga sawi fo tur nge kan nih tih kan zirho dawn a ni.
1) Chunglama rilru
nghat tura tih kan ni: Vanram kan ngaihtuah
fo thinna chhan tur chu kan rilru nghahna tur a nih vang a ni. “Chung
lam thilah in rilru nghat tlat ula, lei lam thilah chuan nghat suh u”
(Kol.3:1-2) tih a nih kha. He khawvela kan chen lai chuan in leh lo te, sum leh
pai, silh leh fen te kan mamawh a, heng zawng zawng ah hian ngaihtuahna kan
seng tur pawh a ni. Mahse, kan rilru nghahna ber, kan ngaihtuah ber leh vei ber
a ni ang tih erawh a hlauhawm a ni.
Tin, he khawvela rilru
nghah tlat hi chu a hrehawm, rilru a hah duh. Taksa pawhin a tuara, thlarau lam
dinhmun a chhiat phah thin. An sawi thin, Pa pakhat hian Cycle khalh a zir a, a
thiam thei reng reng lo mai a, thui pawh a tlan hma in a tlu leh thin. Mi
pakhat hi alo kal a, “Ka pu, Cycle khalh i zir khan hnuai lam i en a, i kalna
kawng chauh i bih ngur ngur vang khan i khalh thui thei lo a nih kha. Saw ti
lai khua saw en la, hnuai lam bih reng lovin han khalh la, i thiam mai ang” a
lo ti a, chupa sawi ang chuan a piaha khua lo lang chu thlir chungin Cycle chu
a khalh tan leh ta a, tluang takin a tlan par par tawh mai a ni anti.
He khawvel bih reng
chungin hringnun kan hmang a, kan tlu leh thin. Kan bei a dawng a, kan hlim lo
fo thin. Mahse, Van lam en ila, chunglam ah rilru i nghat ang u, Vanram hi i
ngaihtuah thin ang u. Hei hi kan lawmna
tur leh chakna min petu tur chu a ni.
2) Van khua leh tui
kan ni (Filipi 3:20): Khawvel khawi ram pawh hian
an khua leh tui te chu an chhinchhiah thin a, India ramah pawh Aadhaar card,
voter’s ID te kan ti. India khua leh tui dik tak chauh in an neih theih a ni.
Tin, ram dangah zin chhuak dawn ila, khawi ram mi nge kan ni tih lanna neih a
ngai a, chu chu Passport an ti. Tin, an rama luh phalna Visa kan neih tel a
ngai bawk, (Ram tam tak hian ram thenkhat chu Visa tel lova an rama zin phalsak
ram tam tak an awm tho) Visa hian dam chen a nei tih erawh hre tel ila. Mahse,
Passport erawh neih ngei ngei ngai a ni thung. Ram dangah zin ta la, an ram i
thlen ah emaw i luh dawna an lo tih dan tur chu “Passport please” tih a ni.
Passport show tur i neih loh chuan eng ang mi pawh ni ila, “A theih loh” a ni
tawp.
Ringtute pawh hi Vanram
mi leh sa kan ni, Van khua leh tui nihna nei kan ni. He lei hi chu Visa neia
kan zinna hmun mai a ni. Nakinah kan Visa a expire (tawp) hunah Vanram Passport
nei te chu Vanramah kan kal dawn a ni. A chang chuan mahni mikhualna hmuna tlei
tak, mahni khua tak tak ngai lo hi kan ang thin ka ti. Kan khua tak tak zawk
Vanram chanchin te hi kan va sawi khat ve, kan va ngaihtuah ngai ta lo ve!
Thingtlang atangin mi
tam tak hnathawk in emaw zirna vang te in Aizawl ah kan awm thin. Kei pawh hi
kan khuaa awm loh vang vang chang ka nei fo tawh. Aizawla ka awm vang khan
Aizawl mi leh sa ka ni tihna a ni chuang lo. Rei tak lo awm tawh pawh ni ila Chhiahtlang
hi kan khua dik tak ka ni tho tho a, haw hun kan nei nge nge.
Ringtute pawh hi Vanram
Passport nei kan ni, vanram passport tel lovin vanram kan lut dawn lo, passport
nei te chiah an lut ang. Vanram kawtchhuah ah Passport min lo dil ang a, chu
passport ah chuan enge lo lang ang, Lal Isua thisen an hmu ang a, chu thisena
tlan leh lei chu kan ni tih hi Vanram kawngkhar veng tuten hria in min luh tir
mai dawn a ni. Chuvangin, kan khaw hlun, kan haw lehna tur Vanram hi i
ngaihtuah thin ang u, i sawi tam ang u.
3) Kan ropuina tur
hmun a ni (Rom 8:18): Tirhkoh Paula chuan “Tuna tuarna te hi nakina kan tan ropuina tih
lan tur nen chuan tehkhin tham ah ka ruat si lo” a ti. Vanram khi kan
ropuina hmun tur a ni. He leiah tuarna chi hrang hrang kan tawk thin, natna te,
retheihna te, hrehawmna chi hrang hrang te, thihna ten min then hrang fo thin.
Mahse, heng zawng zawng hi Vanram ah chuan a bo tawh ang. Thupuan bung 7 ah
khan eng tin nge a tih kha, “An rilṭâm
leh tawh ngai lo vang a, an tuihâl tawh hek lo vang, ni sa an tuar ngai tawh lo
vang a, khaw lumin a tihrehawm tawh hek lo vang. Lalthuthleng laia awm Beram No
chu anmahni vengtu a ni ang a, nunna tuikhurah te chuan a hruai ang. Pathian
chuan an mit ata mittui zawng zawng a hru fai ang
(Thu.7:16,17)
He khawvel kan khual zinna a nih
miau vangin sualna vang ten kan rum a, thihna vang te in kan tap thin. Harsatna
hrang hrang vangin hrehawm tih chang lah kan ngah. Harsatna tawkin thenawm
khawveng ten min hnemin min pui liam liam mahse tihtheih chin an nei si. Mahse,
Heng zawng zawng hi kan khua Vanram ah chuan a bo tawh ang, a awm ve tawh
lovang. Min vengtu chu Pathian a nih dawn vangin harsatna a awm tawh lo ang.
He kan taksa, hrisel lo tak, natna
in a tlakbuak fo thin, chak lo em em te hi tih danglam a ni tawh ang. Ropui leh
mak taka siam kan nihna kha a takin kan chang leh dawn a ni. I Kor.15:42ff ah
khan engtin nge Van taksa chu a awm dawn kha. “ Tawih thei kha phum a ni a, tawih thei lova kaihthawh a ni ang a,
hmuhsitawm tak kha phum a ni a, ropui taka kaihthawh a ni ang; chak lo tak kha
phum anu a, thiltithei taka kaihthawh a ni ang”
Vanram ah chuan taksa
danglam pu in, ropui tak leh thiltithei takin kan awm tawh dawn a ni.
“Hrehawmna’ tih thu mal hi kan hre tawh ngai lo ang a, kan cham hlenna tur hmun
a nih miau vangin chatuanin hlim takin kan awm tawh dawn a ni.
4) Vanram passport i
nei tawh em?
A tira kan sawi tawh angin Vanram chungchang hi titina ah pawh kan sawi
khat a, kan trilru ah hian a lian ta lo tihna a ni. Kei pawh hi School lamah ka
tui khawp mai a, School chungchang hi kan lo sawi leh thin mai pawh nilovin zan
khaw tairek thlengin ka sawipui theih, a chhan chu ka rilru ah a lian tihna
ani.
Fiamthu in ka sawi fo
thin chu kan Kohhran Inkhawm ka en hian Vanram ah chuan nu ho an tam ngawt ang
ka ti thin. A dik tak tak mai thei, Vanram passport neih leh neih loh hi check
theih ta se, kan kohhran nuho hi a nei tam ber an ni mai thei. A chhan chu he
leia kan awmdan te, khawsak dan te, rilru put hmang te hian Vanram passport kan
neih leh neih loh a hril tlat a ni. Lal Isuan “Keimah hi
kawng leh thutak leh nunna ka ni; keimaha
kal lo chu tu mah Pa hnênah an thleng ngai lo." Johana 14:6. A awmzia chu
Lal Isua nei lo tan Vanram a luh theih loh, Vanram passport a neih theih loh.
Hawh u, he khawvel kan khualzinna ah hian rilru nghat tlat lovin kan khaw hlun Vanram ah khian I nghat ang u. Kan khualzin hun chhung hi a reilo, rei tak kan cham thei lo. Chuvangin, kan cham chhung hian inngeih takin awm ila, midang er leh sawisel te hi hun a uiawm mai mai. Van khua leh tui kan nih chuan Vanram mite awmdan tur ang takin he lei ah hian I khawsa ang u. "Vana min an tih angin Lei amin ti rawh se" tih angin Van khua leh tui te nundan tura awm rengin he kan khualzinna khawvel ah hian i khawsa ang u. Amen.
Comments
Post a Comment