“Midang te hmangaih/Pathian ram I hlat lo ve”

                                             “Midang te hmangaih/Pathian ram I hlat lo ve”

Marka 12: 28-34

 

He thu hi lehkhaziaktute zinga pakhat leh Lal Isua inbiaknaa Isua tlipna a ni a, Matthaia leh Luka pawh hian an tarlang ve tho a, mahse, he thu tlipna erawh a lang ve lo.

1) Lehkhaziaktute: Lehkhaziaktute te hi a saptawng chuan Secretary kan tih ang hi an ni a, Thuthlung hlui hunah pawh rorelna chungchang thil pawimawh te vawng thaa, ziak chhawng tute an ni. Pawl anga awm chhovin Dan hrilhfiahna kawngah phei chuan puithiamte leh Levia chite ai an awh chho hial.Judate ziak loh dan chi hrang hrang hrilhfiahtu leh humhalh kawngah fir taka kalpui tute an ni.

            Lehkhaziaktu dinhmuna ding tur hian in rochun lam aiin a zira zir chhuah, an thiamna leh theihna vang chauha he dinhmun thleng thei an ni, miten zah takin “Rabbi’ tiin an ko thin. Bible hrilhfiah leh dan bu ziah chhawn te hi an hna ber a ni chungin an eizawnna erawh a ni hran lo, eizawnna dang an nei thung. An hna in a zir bawk a, Isua hun lai pawh hian Isua ep tu langsang tak te zing ami an ni nghe nghe.

2) Pathian ram: Thuthlung Hlui lamah Pathian ram tih tawngkam tak hi hmuh tur a awm lo a, Thuthlung tharah erawh Vanram tih tawngkam nen hman pawlh a ni nasa hle. Pathian ram chu Pathian lalna leh rorelna hmun tih a ni mai a, Mahse, Lal Isua zirtirna atanga en chuan Pathian duhzawng tihna hmun apiang hi Pathian ram chu a ni mai, hei hian he lei leh Van a kawk v eve thei awm e. Chu Pathian duhzawng tihna hmun chu mimal nunah emaw Chhungkua ah emaw, Kohhran leh Khawtlang ah emaw ram pumah a thleng thei vek a ni.

3) Lehkhaziaktu leh Lal Isua: Marka bung 12:28 hma lam chang 18 ah hian Sadukai-ho leh Lal Isua in chhanna kan hmu a, hei hi Lehkhaziaktu hian alo ngaithla ve kar a nih hmel, a rawn in rawlh ve ta a. “Thupek zawng zawngah enge ropui ber?” tiin Isua a rawn zawt a, he ta Isua chhanna leh a chhan belhna hi a pawimawh khawp mai.

            Isuan thupek ropui ber a tih chu Judate ngaih pawimawh em em mai, Juda tawh phawt chuan an thiam bel hlarh “ Lalpa I Pathian chu I thinlung zawng zawngin, I thlarau zawng zawngin, I rilru zawng zawngin, I chakna zawng zawngin I hmangaih tur a ni” tih thu in a chhang a. He chhanna ah hi chuan thil danglam teh vak a awm lo, Judate te Shema an tih, zing leh tlaia an tawngtai thuchham thin a ni.Mahse, Isua a duhtawk mai lo, a dawttu a sawi nghal ang a, heng thupek pahnih aia pawimawh hi a awm loh thu a sawi bawk. “Nangmah I in hmangaih angin I vengte pawh I hmangaih tur a ni”. Isuan thupek pawimawh ber leh a dawttu a tih kha huang khatah a dah a, Pathian hmangaih tu chuan a veng te, a thenawm te pawh a hmangaih tur a ni a tihna a ni.

            Isua chhanna ah Lehkhaziaktu hi a lungawi hle mai, lehkhaziaktu dang te leh Farisai dang te ang lo takin Isua thusawi pawm tak chungin, “chutiang zawng zawng chu pumhal thilpek leh inthawina zawng zawng aiin a tha zawk em em a ni” a ti a, Isuan a rilru put hmang dikzia a hmuhin, “Pathian ram I hlat lo ve” a ti ta a ni.

4) Lehkhaziaktu danglamna:

a) Sadukaiten Isua zawhna an zawt zo chiah Lehkhaziaktu in zawhna a rawn zawt ve kan tih tawh kha. Thupek ropui ber tih te chu Pathian lehkha thu zir leh dan ziak chhawngtu khan a hre chiang dawn lutuk. Mahse, hriat belh ngai tawh lo khawpa Pathian thu hria ah a in ngai lo a, engkim hria a in tilo a, chuvangin, hriat chian chakna nen Isua zawhna a zawt a ni. Mi fing, mi thiam, chapo silo a ni ngei ang.

b) He Lehkhaziaktu hi a danglam bik kan ti tawh kha. Midang te chuan Isua zawhna an zawh khan in tawngawhtir an tum a, a thusawi sual an chang a, amah hekna tur an zawng ru ran thin. A ni erawh chuan Isua chhanna kha ngun takin a ngaithla a, a pawm hmak bawk. Lehkhaziaktu ngaihdan ah chuan thupek ropui ber tia Isua sawi kha chu pawm mai a har lo, mahse, a ber leh a dawttu a rawn hmer kawp erawh kha chu a hriat ngai loh a ni mai thei. Mahse, a hnial lo, dik a ti a, Inthawina/halral thil hlan te aiin thenawm khawveng te, mahni mihringpui hmangaih pawimawh zawk zia a man chiang a, chu chu Pathian hmangaihna nen a in zawm tlat a nih thu ah pawh a in hlan thlap a nih kha.

c) He lehkhaziaktu hian a thiamna leh hriatna, Rawngbawltu pawimawh a nihna te a hmachhuah hauh lo, Isua lakah beiseina sang zawk nei chungin zawhna a zawt a ni.

5) Lal Isua chhanna atanga zirtur kan neih te: Lehkhaziaktu danglam bik kan hmu a, Lal Isua chhanna pawh a pawm hmiah tih kan hre tawh bawk. “Ka ngaihdan chuan” tiin Isua kha a hnial zui miah lo. Lal Isua chhanna atanga zir chhuah tur kan neih te:-

            a) Lal Isua khan Judate sakhaw thupui (shema) pel rawk khawp in Pathian thu a hrilhfiah a, chu chu Mihring in Pathian a hmangaihna hi mihringpuite hmangaihna tel lo chuan a famkim lo tih a ni. Thupek ropui ber kha a dawttu chiah thupek zawm siloh chuan a zawm theih bik loh tihna a nih chu.

            Pathian hmangaihna chungchang te kan sawi nasa, a khawngaihna phei chu mittui parawl kuangin kan ngaithla fo tawh mai thei. Tin, Pathian tan tiin theihtawp in Kohhran rawngbawlna peng hrang hrangah theihtawp kan lo chhuah tawh thin mai thei, hei hi Judate Shema kan tih chu a ni. Mahse, heng zawng zawng hi thleng famkim tur chuan thupek ropui ber dawttu “Mahni inhmangaih anga vengte hmangaih” hi kan hlamchhiah leh fo thin. Thenkhat te phei chuan kan sakhawmi nate, Pathian tana kan thahnem ngaihna te hi midang te chungtlak nan kan hmang thin em?

            b) Isua khan thenawm hrilhfiahna thar kha Samari mitha tehkhin thu atang khan a siam a, kan In bula awm te emaw kan hmelhriatte ni mai lovin kan hmuh phak apiang mihring hi kan thenawm, kan hmangaih tur te chu an ni.

6) A zawng zawnga Pathian leh mihringpui te hmangaih hi pumhal thilhlan leh inthawina aiin a tha zawk em em a ni: He thu hi Lehkhaziaktu thusawi a ni a, Lal Isuan ‘Hei aia thupek pawimawh zawk reng hi a awm lo” a tih atanga a inhmuh chhuahna thu a ni hmel.

            Kan hriat angin Judate khan Pathian an biakna ah khan ran thisen leh thau hmanga inthawina kha an kalpui a, chu chuan an sual a tleng fai niin an ngai thin. A tawi zawngin pumhal thilhlan leh inthawina tih hi Pathian biakna tih nen thuhmun reng a ni. Mahse, Pathian hian Inthawina aia ngaih pawimawh zawk leh tha tih zawk hi chu a nei a ni. Zawlnei hunlai atang tawh khan ‘Inthawina aiin thuawihna’ ‘In inkhawmpui lian te hi ka hne’ tih tawngkam kan hmu chamchi a, Thuthlung tharah pawh hei hi Lal Isua rawn bitum chat a ni reng a ni. Mahni mihringpuite hmangaih silo va Pathian biak hi awmze neilo a ni e a tihna ang a ni.

            Judate ang chiah hian Inthawina/Pathian Biak programme hrim hrim hi chu kan kalpui tha thlawt a ni. Khawvel Kristian zingah Pathian be tura inkhawm programme ngah ber kan ni ang kan ti fo thin. Pathian be tura inkhawm hi a tha e, mahse a aia thupek pawimawh zawk hi kan hlamchhiah ang tih a hlauhawm thin. A pawimawh lo zawk kan dah hmasak tlat chuan Pathian Biakna dik tak nei lovin Biak In ah hian kan kal fo ang tih a hlauhawm a sin. Pavalai, Kohhran Hmeichhia, KTP rawngbawlna leh Kohhrana chanvo kan neih thawm te hi Thupek pawimawh zawk kan dah hmasak siloh chuan ‘bengchheng’ a chang thei a sin!

            Sam 15:1-3 ah khan enge kan hmuh kha. “ Aw Lalpa, I puan in ah tunge lo thleng ang a, I tlang thianghlimah chuan tunge lo cheng ang? Mi nun ngil, dik taka thil ti thin, thinlung taka thudik sawi thintu chu. Ani chuan mi a sawichhe ngai lo va, A thiante a rel ngai bawk hek lo” Pathian Puan In a cheng phalo tawk chiah chiah hian thahnemngai takin pumhal thil hlan te hi kan lo hlang ange, A tlang thianghlim lawn chhuak lo tawk vel hian Inthawina te hi kan kalpui ang tih a hlauhawm thin. Chuvangin, Thupek zawng zawnga pawimawh ber Pathian leh mihringpui te a zawng zawnga hmangaih hmasak I tum ang u.

6) Conclusion: Lehkhaziaktu leh Isua in biakna kan hria a, lehkhaziaktute dinhmun te, Pathian ram awmzia te, Lehkhaziaktu chhanna leh a entawn tlak thu te, Lal Isua chhanna atanga Kohhran hoten zir tur kan neih te pawh kan sawi chiang khawp mai. He thu hi kan Kohhran pawhin kan manawh ber niin ka hria a, “Inhmangaih tawnna ngawt lo chu tuma engmah ba suh u” tih ang khan hmangaihna hi midang I bat tir sup sup ila, inhmangaih tawn teh ang u.

            1 John 4:20 ah khan Miin, “Pathian ka hmangaih e,” tiin a unau haw si sela, amah chu dawthei a ni; a unau a hmuh tawh renga mah a hmangaih loh chuan, Pathian a hmuh ngai loh va chu engtin nge a hmangaih theih ang?” a ti. Pathian hmangaih tur chuan thupek pakhat kan zawm tel ngei ngei ngai a awm, chu chu kan mihring pui te hmangaih hi a ni.

            Veng pumpui hmangaih harsa kan ti rih a nih pawh in Kohhran chhungkua tal chu inhmangaih tum teh ang u. Midang te fel lohna te, tlin lohna te kan hmuh lian hma  viau chuan keimahni ah hmangaihna ala awm lo a ni fo thin, an fel lohna te midang bula sawi vak vak te hi a hmangaih loh thlak ka ti thin a, hmangaihna nena in dawm kang tur kan ni. Chuti a nih loh chuan Pathian ram kan hlat hle ah ka ngai.

            Midang ten min hmangaih hi phut lem lo ila, kan tlin lohna lai hre thei viau annih pawh in Tirhkoh Paula’n ‘hling’ a tih angah khan ngai ila, Pathian laka chak phah nan I hmang ang u. Keimahni lam kan dik phawt chuan Pathian in ro min rel sak mai zel a, min sawiselna dinhmun ah hian an ding ve zui duh chawk a nia.

            Pathian thupek zawmin A mah leh kan mihring puite hi hmangaih tum bur mai ila, Pathian ram kan hlat lovang, luh ve hun kan nei em em ang.