Lal Sutpui vuan (John 15:1-5; I Kor 6:19f)

 

1. Mizo Lal In:  Khawchhung hmun nuam lai takah hian Lal In, lian leh sei bik a awm thin a. Han en reng reng pawh hian In dang aiin a danglam fal nalh thin. A chhung leh pawn awmdan zawng zawng chu kan sawi vek seng dawn lo a. Lal kawngkapuia han luh hlawta thlang lam bang kil chu tuium hunna a ni a, a chhak lam chu Vanlung an ti. Vanlung leh inpui inkar pindan inchhung lam chiah chu Khumai an ti bawk, Khumai lu bul dawhthleng hmawr bulah chuan ban lian tak, tlung dotu a awm a, chu chu Lal Sutpui an tih chu a ni.

2. Lal Sutpui vawn: Mizo chanchin ah Lal Sutpui hi tlung dotu a ni satliah mai lova, pawimawh em em na a nei. Hman lai chuan khua leh khua in do thin an ni a, pasaltha, ral that thei te chu khawtlangin an ngaisangin an thlamuanpui em em thin. Mahse, ral nilovin Tualthah erawh thianglo burah an ngai a. Chumai a nilo, “thenawmte do aiin khawsarih do pawh a thlanawm zawk” an ti hial anih chuan ral nilova tual thah chu pawi nasa lutuk khawihna a ni.

            Mihring cheng ho inhmuhthiam loh chang te kan neilo theilo a, kut inthlak palh mai te pawh thil awm thei a ni. Miin a tum loh leh thinrim insum zolo in tual lo that palh ta se, a thi chhungte khan phuba lak an tum ve chawk thin. Hetiang thil hi a thleng thei anih tih hria in kan pi leh pute khan tihdan phung tha deuh mai an nei a, chu chu Lal Sutpui vawn tih thu kan sawi tur hi a ni. Miin tual a that palh emaw tilui pawh nise a thaha chhungte laka him a duh chuan tlanbo emaw Lal Sutpui vawn a ni mai. Tlanbo pawh nise a dam chhungin a biru zak zak tawh mai thei, lungmuang taka dam ala duh ve si a nih chuan Lal Sutpui a vuan ang. Tichuan, a thah chhungte khan an khawih thiang tawh lo, an khawih vaih chuan Lal laka pawikhawih an ni tawh zawk ang!

            Mahse, Lal Sutpui vawn hi a thlawn ngawt lo, man pek ve a ngai. Lal Sutpui vuan tu chu thihna lakah him tawh mahse, a damchhungin Lal Bawih a ni tawh ang. An chunga thuneih tu leh rawng an bawl sak tur chu Lal a ni tawh ang, a dam nan a zalenna a hlan ve thung a ngai a ni.

3. Lal Sut pui I vuan tawh em?

            Ringtu tan "Lal Sut pui I vuan tawh em?" Kan tih hian "Lal Isua hnenah I hun pum I hlan tawh em?" Kan tihna a ni a, mahni theuh in zawt ila. Lal Isua hnena nun hlan tawh tu chuan  'duhthlanna zalen' kan tih kha Lal Isua hnenah a hlan tel tihna a ni. Kan zalenna kha keimahni ah in nghat tawh lovin Lal Isua duh zawngin kan duhthlanna a kaihhruai tawh zawk tihna a  nih chu. Mahni nuam tih zawng, duh zawng leh chak zawng zalen taka tih a thiang tawh lo a, a thil tih tur teh nan a hmang thei tawh lo bawk. “Lal Isua duh zawng a ni em?” tih kha teh khawngah a hmang tawh zawk ang.

4. Lal Isua zawm hi sual laka kan himna a ni: Hmanlaia Lal sutpui vuan tu khan vuan ta lo se engtin nge a awm zui ang? A thi ang tiru. Chutiang chiah chuan Lal Isua kan vawn loh emaw Lal Isua hnena atanga kan kal bo hian sual ah kan awm a, kan thi tihna a ni. Augustine-a chuan sual a sawifiah dan chikhat chu 'Pathian hlat san hi a ni mai' a tia, a dik thui viau awm e. Chuvangin, kan nun nan, sual laka kan him nan Lal Isua kan vawn hi a ngai a ni. Lal Isua ngei pawh hian a hrechiang khawp mai “ Keimah ah awm reng rawh u” tih te, “Keimah lovin engmah in ti thei silo” te pawh a tih kha. Pathian nena in zawm tlat tur kan ni tih hi kan chian a ngai a ni!

             Pathian in khawvel a siam khan eng tin nge a tih kha, thlai leh hnim, thing chi hrang hrang a siam dawn khan lei hnenah a thu a sawi a, a lo awm mai. Tuia cheng chi nungcha chi hrang hrang a siam dawn khan Tui hnenah thu a sawi a, tuia cheng chi an lo awm mai bawk. Mahse, mihring a siam dawn khan eng tin nge a tih ve thung? Lei a be lova, tui a be hek lo “Keimahni ang, kan anpuiin mihring siam ila” tiin amah leh amah kha a inbia a ni. Thing hi lei atangin pawt phawi teh, a thi ang. Chutiang bawkin sangha hi tui atangin la chhuak teh, reilote ah a thi ang. Chutiang bawkin Mihring te pawh Pathian laka kan hran chiah hian kan thi thin a ni.

 5) Lal Sutpui I vuan ang u: Lei a to chi te tobul kan hria a, tuia cheng chi te nunna hnar kan hre bawk. Chutiang zelin mihring chuan a tobul Pathian a hlat emaw Lal Isua a zawm loh chuan a thi thin. Jonathan Lianhna hlaphuah hian a sawi chiang khawp mai.

“ Ka nun tobul I ni, Lalpa I ta ka ni.

Hmalam hun thlir thiam lo, thlir thui theilo ta chu;

Engnge min hmuak tu’n kan hrethiam kan hre phak silo,

Ka tun hun leh hma hun pawh Lalpa nangin nei rawh”

                                        Tiin Pathian a zawm a, Lal Sutpui kha a vuan a ni

             Sual vanga Pathian laka mithi kan nih hma hian Lal Isua I vuan ang u. Tin, Hmanlai lalsut pui te aiin Lal Isua vawn hian thil ala ti thei cheu zawk a sin! Efesi 2:1 ah khan eng tin nge a tih kha “ Nangni pawh in bawhchhiat leh in sual te avanga thi in nih lai khan a ti nung che u a” a ti. Hman lai Lal Sutpui vawn chuan thihna laka inhumhimna a pe thei. Mahse, Lal Isua vawn erawh chuan sual lakah min hum mai nilovin sual vanga thi tawh te pawh min ti nung leh thei a ni!

            Kan hmalam hun kan hre lo, engnge lo thleng dawn kan hre lawk theilo. Sual hian min tihnat leh Pathian laka min tih thih hi a tum reng. A hmanrua hman tam zawk hi kan mihring pui te an ni leh nghal. Chuvangin, Lal Isua I vuan ang u. Sual vanga thi kan ni tawh chung pawhin Lal Isua kan vawn leh chuan kan nung leh thei zawk a ni!

 6) Conclusion:  A tawp nan Lal Isua vawn hi kan damna, kan himna, kan nun khawchhuakna ani kan tih kha! Chumai anilo, Lal sut pui vuan tute tina tu an awm chuan Lal pawisawi an ni, Lal an tina tihna a ni tawh kan tih ang chiah khan Lal Isua vuan tute hi miin min tina emaw sual in min hliam alo nih vaih chuan Pathian pawi khawih an ni tawh ang. Pathian in kan aiawh in phuba a la tawh ang. Chutiang khawpa security tha a nih chuan Lal Isua hi vawn loh phal chi a ni lo. Lal sut pui, Lal Isua hi I vuan tlat ang u.