“Isu, Davida fapa, mi khawngaih rawh”

                                                     “Isu, Davida fapa, mi khawngaih rawh”

Marka 10:46-52

He thu hi Mitdel Bartimaia chanchin atangin kan zirho dawn a ni.

Jeriko: Marka hi chuan Bartimaia leh Isua hi Jeriko khaw bula in tawng angin a sawi a, Jeriko chhuahsana Jerusalem a panna kawngah niin alang. Isua leh a zirtirte, mipui tam tak hian Jerusalem an pan thu kan hmu a. Kalhlen Kut a hnaih tawh vangin Jerusalama kut hman tum khualzin an nih ve a rinawm.

            Jeriko hi khaw upa tawh tak, Jerusalem atanga 15km vel a hla, sumdawnna hmun pui leh khaw pawimawh tak, chhiahkhawnna hmunpui a ni bawk. Zakaia kha Jeriko khua mi leh sa a nih nghe nghe kha. Tin, Bartimaia lo awmna kawng hi khawpui pawimawh pahnih Jeriko leh Jerusalem pawhtu a nih vangin a lun hle ang tih a rinawm a, chuvangin, kutdawh chi hrang hrang pawh an tam em em a ni.

Bartimaia: Bartimaia hi Isua tihdam zingah chuan a hming hriat hlawh zui mi tlemte zing ami a ni. Kum 12 chhung thiput tawh dam leh te kha a hming kan hre lo a, piantirh ata mitdel a tihdam pawh a hming kan hre chuang lo.

            Bartimaia tih hi a hming tak a ni lo a, ‘Bar’ tih awmzia chu ‘fapa’ tihna a ni a, chuvangin, Bartimaia tih pawh hi ‘Timaia fapa’ tihna a ni. Heng hunlai hian hming in ang a tamin an khaw chhuahna emaw an pa hming tela in koh hi an chin dan pakhat a ni a. Isua tih hming pawh hi hming common a nih vangin Nazareth Isua (Nazareth khuaa Isua) tih a ni kher thin. Engpawhnise, a hming tak hre lo pawh ni ila apa hminga koh leh hriat zui a ni hrim hrim hi a chhinchhiah tlak tak a ni. Mizo zingah pawh ‘Zikpuii pa’ tihte, ‘El Shamma-I pa’ ‘Lodrick-a pa’ tihte kan awm hi.

1) Bartimaia’n Lal Isua a au: Bartimaia chu tuk dang ang bawkin mite khawngaihna dilin Jeriko leh Jerusalem inkar kawngpui sirah a thu a, a mitdel vangin kutdawh kha a ei hmuhna ve ber a ni. Chutihlai chuan chulai vela kalte titi atang chuan Lal Isua a kal ve a ni tih a hre ta tlat mai. Kum dangah pawh Kalhlen kut dawn te chuan chu kawngpui chu a lun leh zual thin ngei ang, mahse, tun tum chu Lal Isua a kal mek a ni tih a hre tlat. A hriat veleh “Isu, Davida fapa mi khawngaih rawh” ti in a au vak a. Heta a au hi au satliah a ni lo, Lal Isuan a hriat ngei theih nan mipui zi nuai nuai leh bengchheng em em karah Isua a au a ni.

            Bartimaia hian Isua hming leh a thiltih a hre tawh thin a nih hmel a, a hre satliah mai nilovin Isua Nihna diktak hi a pawm tihna a ni. Nazaret Isua tia au mai lovin “Davida fapa” a ti. Hei hian Isua kha Messia, an nghahfak leh an beisei em em a ni tih Bartimaia khan a pawm tihna. Diktak chuan Isua zirtir leh zuitute ngei pawh khan Isua Messia nihna kha rin harsa tih deuh chang an nei fo niin alang. Mahse, Bartimaia erawh chuan “Davida fapa” tiin a au a ni.

2) Bartimaia’n a aia ring zawkin a au leh: Bartimaia khan Isua a au va, mahse, a aw hre pha ho khan an lo khap a, au bengchheng lo turin an lo ti a ni. Mahse, Bartimaia erawh chuan a aia ring leh zualin a au leh, theihtawpa au a ni bawk a, mipui thawm ri nuai nuai karah pawh Isuan a hre ta tlat. Isua kawng kallai a ding chawt a, “Han ko teh u’ tiin theihtawpa a mah au tu Bartimaia chu alo nghak ta a ni.

3) Bartimaia chuan a puan a paih a, a zuangtho a, Isua a pan: Bartimaia hi ava phur teh lul em! Kutdawh ho hian an thawmhnaw hmawr tawng, an thawmhnaw hak chungah hian an ha leh thin a, chu chu miten thil pek an pek dawh nan an malchungah an phah mai thin, Mizoten ‘puan’ kan tih ang tak hi chu a nilo. Bartimaia hian Isuan a ko ani tih a hriat veleh a kutdawhna hmanrua a kawrhmawr tawng chu a paih la, a zuang tho nghal a, LalIsua a va pan a ni. LalIsua bulah chuan a kutdawhna hmanrua kha a mamawh dawn tawh lo tih a hrechiang a ni. Tin, Kutdawh mirethei, ei hmu tha lo, taksa pan cher chhe ve tak a nih a rinawm, thu ngawt ngawt thin a nih vangin a ke te pawh a mu chuah chuah mai thei. Mahse, khang zawng zawng theihnghilh khan a zuang tho a ni. A mah nghaktu a hrechiang a, tunge a pan tih a chiang em a ni.

4) LalIsuan a duh a zawt a, a duh a tih hlawhtlin sak: LalIsua bul a thlen chuan “Eng nge tihsak che ila i duh?” tiin alo zawt a, LalIsua thiltihtheih zia lo hre tawh, Messia a ni tih pawmtu, engkimtithei bula ding Bartimaia kha a in ngaihtuah buai lo, “Raboni, hmuh theih ka duh” tiin a chhang a. LalIsuan, “Kal rawh le, i rinna i dam phah a ni e” a tih hnu ah khua alo hmu thei ta a ni.

            Bartimaia hian a duh ava chiang em! Lehlin dangah chuan “Hmuh leh theih” tiin an dah a, chuvangin, Bartimaia hi piantirh a ta mitdel a nilo niin alang. Mahse, thil dang zawng aiin a duh ber chu Hmuh theih kha a ni. A mamawh ber a hria a, a duhah a chiang a, thil dang a dil kual duah lo “Hmuh theih” kha a ni tawp mai! Tin, LalIsua khan a thil dil kha a pe thei tih a chiang bawk a, nilosela chu a ni kutdawh khan “Englo a nia, thuhriltu lar i nia, miin sum tam tak an pek che ka ring a, chuvangin, ka in enkawl ve na tur sum leh pai min pe thei angem?” te pawh a ti mai thei.

5) Bartimaia ang hian LalIsua i au ang u: Bartimaia khan thawm ri nuai nuai karah LalIsua a tel ve  ani tih kha tutee maw tawngka atangin a hria niin alang, Mahse, khang thawm khan a tibuailo, ring takin a au a, a vawikhat auh naah LalIsuan a hre lo, chumai a nilo. Khaptu an lo la awm leh nghal. Mahse a aia ring leh zualin a au a nih kha.

Kan hringnun ah hian Pathian thu aia thawm lian zawk, Pathian aia ngaih pawimawh tur zawk, buaipui awm tak tak a tam. Mahse, heng thawm hian Pathian kan auhna dal suh se. Khaptu awm ang maia Pathian auh harsa tih chang kan nei ang, i au ang u. Pathian au eih tur hian kan la au ring tawk lo a ni lo maw? Kan thil buaipui bengchheng tak tak te vang hian Lal Isua hian kan auhna hi ala hre lo ani mai lo maw? Theihtawp in i au ang u.

            Bartimaia khan LalIsuan a nghak ani tih ahriatin a nuna thil pawimawh tak a paih a, phur leh thatho em em in LalIIsua a pan a sin. Keini hi enge kan nih ve le? Kan inkhawm kal tur te, kan zai te hi kan va phur lo tak. Kalsan neiin LalIsua kan pan ve em?

            LalIsua bulah khan Bartimaia khan a duh leh mamawh ber a thlen, a chak zawng, nuam tih zawng, nawmsakna tur, awh zawng kha a dillo. A mamawh kha a dil mai a ni. Keini hian Pathian hnenah enge kan dil ve thin? Kan mamawh nge kan nawmsakna ringawt tur? A ram leh a felna zawng hmasa rawh u, chung zawng zawng chu a pek belhchhah ang che u tih a nih kha.

            Tin, Bartimaia dam phahna kha LalIsua a rinna vang a ni. LalIsua kha Messia ani tih a ring a, amah a tidam thei a ni tih a ring bawk a, chuvangin, midang mitmei chu sawi loh, an khap beh tumna pawh engah mah ngailo in LalIsua a au a, khatiang khawp khan a ring a sin. LalIsua a che lo theilo a ni.

            Chuvangin, keini pawh hian theihtawpin Pathian au thin ila, kan rinna a chak lo a nih pawh chakna i dil ang u. Hmuhsit vang nilose Kutdawh aiin in changkang vek, lehkha inthiam zawk, in hmel pawh a tha zawk. Bartimaia pawh in LalIsua a au ding a, tihdamna a chang thei a nih chuan keini pawh hian kan chan theih lohna chhan tur a awm lo. Zanin kan mut hmunah pawh in ngaihtuah ila, enge ka mamawh, Pathian nena lengdun tur hian eng thawm in nge min la dal? Theihtawp in Pathian hi ka la au ve lo ani mai lo maw?