RILRU TIHTHAR Rom 12:1,2 (Kum 2024 KTP member thar lawm sermon)

Tirhkoh Paula hian Rom khuaa Kohhran hi a la tlawh lo a, a tlawh hma in lehkha a thawn lawk a ni. Rom Kohhran member te hi Juda Kristian leh Juda nilo (Jentail) Kristian te an ni hlawm a, an in pawlh sawp nuk mai. Rom lehkhathawn hi Paula Pathian thu kalpui dan (theology) hriat chianna tha tak a ni a, Lehkhathawn chhiar hlawh tak a ni bawk.

            Bung 12 thu hi ‘Chuvangin’ tiin bul a tana, Bung 11 na thu sawi zawmna a ni tihna a nih chu. Bung 11-na ah hian Israel te chuan Isua an hai vangin paihthlak an ni a, mahse, jentailte hnenah chhandamna alo thlen phah tak thu te a sawi a. Israel, Pathian hnam thlan te paithlakna mah Jentail te tana chhandamna a nih si chuan Israel tun din lehna chu Jentail te tan pawh a ropui tur thu a sawi bawk. Mahse, Paula hian heng zawng zawng hi Pathian khawngaihna vang a nih thu a sawi a, chapo puia in sawi theihna chi a nilo tih a hria a, engkim hi Pathian atanga lo awm, amah avang leh ama tan a nih thu uar takin a sawi bawk.

            Tichuan Paula chuan Israel te tlukna te, Jentail te chhandamna chan tak thu te chu Khawngaihna vang liau liau a nih thu a sawi zawh hnu ah ‘Chuvangin,’ tiin keini Kristian te awmdan tur a sawi zui ta a ni.

1. Inthawina nung leh thianghlim, Pathian lawm tlak ni tura taksa in hlan:

            Israel te khan Pathian hnena inthawina an hlan in ran hmelhemna neilo an hmang thin a, ran piangsual emaw diklohna nei chu inthawina atan hman tlak loh a ni. He lai thu chang chawi hian Paula chuan Pathian biakna atan in taksa ngei kha hlan rawh u, Pathian rawngbawlnan in taksa kha in pe rawh u a tihna a ni. Aikal a lak theih loh, lakna chi pawh a nilo. Keimahni ngei hi Pathian in a rawngbawl turin min duh a, he taksa ngei hi a duh a ni.

            Hman lai chuan mitthi an awm in zu bel hi an pulut a, an in thin. Hmeithai nu pakhat hian ‘ka hman silo a, zu bel tal hi ka rawn thawh ve a nge’ a ti ziah mai a. Tumkhat chu lu a sun ve a, a thenawm te chuan ‘ kan hman silo a, zu bel tal hi kan rawn thawh e’ an ti ve tliar tliar a, lenpui tu tumah a neilo an ti.

            KTP-a kan rawngbawlna ah pawh hian Pathian in kan Taksa ngeia rawngbawlna kan thawh chhuah hi a duh a ni. Sum leh pai, thildang hmanga rawngbawlna pawh a tha e, mahse, keimahni ngei hi he rawngbawlna ah hian tel ila, chu chu Paula’n ‘In rawngbawl dan tur tak a ni e’ a tih chu a ni.

            A nih leh Inthawina nung chu enge ni ta ang? Juda ten ran kha an talh a, inthawi nan an hmang a, hman nawn theih a nilo. Mahse, Kristian te tana inthawina nung nih dan chu thatho taka rawngbawl tura in pek mai hi a ni. Hman nawn fo theih a nia, Pathian rawngbawlna ah chuan active takin kan in pe tur a ni a tihna a ni. Active tih hian KTP thiltih zawng zawngah kan tel vek tur a ni tihna a nilo, KTP-a kan rawngbawlna ah hian kan taksa leh rilru zawng zawng, theihtawp chhuahin, thahnem ngai takin kan ti tur a ni tihna a ni.

2. Tunlai khawvel awmdan tawm lohva nunphung danglam zawk neih:

            Paula hian sawi chhunzawm zelin Pathian rawngbawl tur chuan he khawvel awmdan ang hi tawm suh u a tih hian eng khawvel nge ni anga, chu khawvel awmdan chu enge ni ta ang? He laia Khawvel a tih hi a hunlai mite nundan/awmdan sawina a ni. Paula hunlai khawvel emaw tuna kan khawvel hun hman mek sawina a ni thei vek e. Tunlai khawvel awmdan hrechiangtu te vek kan nih ka ring a, Kristian thalai tan tel ve rem lo, awm ve rem lo tam tak kan hria ang. Huau huau zawng zawnga tel tum thalai kan ni em? Social media a kan in pholan duhdan te, status leh reels kan update dan te thleng hian ‘a tunlai, a changkang’ tiin khawvel awmdan ang hian kan awm zel em? Paula’n ‘khawvel awmdan ang hi tawm suh u’ a tih hian inla hrang ula, inthiarfihlim rawh u, hnaih pawh hnaih suh u a tihna a ni ber lo. ‘In nunphung chu, in rilru tihthara awmin, tihdanglam ni vek rawh se’a ti zawk.

            He khawvelah kan cheng a, khawvel lak ata kan inthiar fihlim theilo. Mahse, kan nunphung erawh a danglam bik thei a ni. Chu nunphung ti danglam tur chuan rilru thar kan put a ngai. Tunlai khawvelah KTP member te hi kan danglam talo lutuk hi in enfiah nan I hmang ang u.

            Hmani ah Br.KTP pakhat chuan ‘Danglam zan’ an hmang a, danglam thei ang berin an in chei a, a hlimawm phian in ka ring. An in cheina en khan an danglam a ni tih a hriat nghal mai, thil dang vak an show lo, an va lam ing euh chiam chuanglo, mahse, an thut mai mai pawh khan an danglam a ni. Chu chu danglam awmzia chu a ni, khawvel in ‘awmdan phung, nundan tur, tunlai dan’ a tih zawng zawng hi kan zawm ve a thianglo, chutihrualin intih danglam tum teh chiam a ngailo. Danglam duh vanga han inhmuam up pawh a ngai chuang lo. In cheinaa danglam tum lam pawh a ni lo. Rilru tihthar zawk hi kan danglamna tur chu a ni.

            Rilru tihthar chu enge? Mizo tawng chuan rilru hi ngaihtuahna ti pawhin a sawi theih mai ang. Mahse, helaia rilru tihthar erawh hi chu ngaihtuahna satliah mai a nilo. Kan thilthlir dan, pawmdan, dik leh diklo kan teh dan te, kan hriatthiam dan leh thil kan lo dawnsawn dan a ni daih. Rilru chhungril bera kan ngaihtuah vang vang chunga thuthlukna kan siam te pawh hi a ni tel thei vek a ni. Chu rilru tak mai chu Lal Isua ah tihthar a nih chuan nun phung a danglam ve nghal mai.

Conclusion: Kum 2024 kan chuangkai ta a, KTP kaltlanga kan rawngbawlna ah te, kan nitin eizawnna leh thiltih ah te hian rilru thar pu ila. He khawvel awm dan ang zawng zawng hi kan zawm ve a rem lo a ni tih hre thar ang u. Danglam ngam KTP member, rilru thar put tum KTP member ni turin in hlan ang u. Miten ‘hei chu KTP tlangval/ nula a ni maw?’ ‘hepa/nu chu KTP hruaitu a ni maw?’ an tih nalh nalh theih turin ataka kan chenna khawvel leh Social media ah te hian rilru thar I pu ang u.