Pathian hmangaihna

                                                              Pathian Hmangaihna

Johana 3:16,17; 21:15-17; Marka 12:30

Pathian hmangaihna chungchang kan ngaithla fo a, hmangaihna hrim hrim phei chu kan dai baw nual tawh mai thei, sawifiah ka tum lo, mahse, Pathian hmangaihna kalphung erawh ngun taka ngaihtuah tul ka ti fo thin.

Pathian Hmangaihna: Genesis atanga Thupuan thleng hian Pathian hmangaihna avanga  chhandamna hnathawh thu kan hmu tluan parh a, Pathian hmangaihna hi in ngaihtuah ve veng veng ngai em? A mak in a ril ka ti thin.

Genesis ah Pathian in mihring Adama leh Evi a siam a, a siam chhan chu ‘len dunpui’ atan a ni. Tlai tin an leng dun thin a nih a rinawm. Pathian khan hmangaih tur a duh a, len dun pui tur a mamawh a  ni. Mahse, mihring hmasa te khan Sualah an tluksan a, a hmangaihna ata an bikbo san ta a. Tichuan, Pathianin lendun pui theih tur midang a siam leh ta mai em? Siam lo. Thilsiam dang te kha lendun pui turin a thlang leh zawk si em? Thlang chuang lo. Pathian hmangaihna chuan A mah nena an len dun theih nan Hmangaihna in um zui reng zawk a, mihring dang emaw thil dang emaw len dun pui tur/ hmangaih tur a zawn tak daih thu kan hmu lo.

Israel chanchin te pawh han en ila, Aigupta sal atanga an chhuah leh theih nan Pathian in thil mak leh ropui tak tak a tihsak a, a hmuh tir bawk. Tuipui sen pawh ropui rapthlak taka vuak chah a nih kha! Ram neilo Israel-te kha ram a pe a, mal a sawm a, hnam ropui takah a din nghe nghe. Mahse, hnam dang Pathian an biak san a, Pathian pawi an khawih leh thin. Khang zawng zawngah khan Pathian chuan lendun pui leh turin Chhandamna kawng a sial a, a thlah thlam ngailo. Hnam dang a thlan tak thu kan hmu lo.

Laptop ka neih hmasak ber kha kum 2010 vel a nia, ka hmang rim tlauh tlauh bawk a, kum 2016 chho ah chuan a chhe ta fo mai a. A chhiat fo avangin siam that theih tawh lovah ngaiin ka hluihlawn a, tunah phei chuan a awmna pawh ka hre tawh lo. Laptop thar ka nei leh a, ka lei fuh lo nge ni problem neuh neuh ka nei chho a, a siam thiam te ka pan ta fo mai. A siam thiam thenkhat in ‘a siam chi tawh lo ang’ an tih pawh in a that dan ka zawng a, hmun hrang hrangah ka kal kual pui a, hluihlawn ve mai lovin a siam tha theitu nia ka ngaih te ka en kual tir nasa, a tawp ah chuan hman tlak in alo tha leh ta a ni.

Pathian hmangaihna chuan mihringte chu len dun pui hleihtheih loh khawpa sual leh chhe tawh ni mah ila, min hluihlawn ve mai lo. Siam that ngai fo mihring kan ni chung pawh in, laptop thar min lei san lo. Kan thatna turin A hmangaihna chuan min tuam reng zawk alo ni.

John 3:16 te hi ava tha tak em! “Pathian in khawvel a hmangaih em em a, Tichuan, a fapa mal neih chhun a pe a” a ti. ‘A hmangaih’ a ti satliah lo, ‘Hmangaih em em a’ a ti kher. Chu hmangaihna chu atakin kan hmu a, a fapa Isua Krista/Pathian ngei chu Amah kan len dun pui theih lohna hmun he khawvelah a rawn chhuk thla ngat a ni. Eden huan thuamhnaw hlip thla a mihringa a rawn piang te hi Hmangaihna vang a ni a tih loh theih loh. Tluk hmaa Adama leh Evi awmdan angin Kros ah pawh a rawn awm ngam ngat a nih kha! Ava ril em!

Hmangaihna chhan letna chu Hmangaihna vek in a ni: Kan hmangaih tak ten min hmangaih let veloh hian hrehawm kan ti thin. Kan duh loh dana an awm chuan kan rilru a na a, kan thin te pawh a rim thin. Hetiang chiah chuan Pathian in a hmangaih em em mihring te lakah hian beisei a nei a, len dun pui leh theih tura mihringin kan hmangaih let ve hi a phut a ni. Pathian kan hmangaih em?

John 21:15 thu a Isua leh Petera chungchang ah khan mi tam takin Petera kha nunhlui a let leh a, Sangha lo man leh angin an sawi thin, Petera kha an dem viau. Isuan “ Hengte ai hian kei mi hmangaih em?” atih te pawh kha chhuahchhalna ang dawn dawn in kan sawi thin. Mahse a nilo, Isuan Petera te len lo deng leh Sangha an man kha a dem reng reng lo, Tukthuan atan an sangha man te kha alo siam sak hial zawk. Mahse, Lal Isua erawh chuan “Heng sangha te ai hian kei mi hmangaih em? Heng te hi ti suh ka tilo che, mahse, thil dang zawng zawng aiin min hmangaih zawk em?” a ti mai zawk a ni.

Pathian hian keini aia hmangaih a nei lo, min hluihlawn lova, khawvel pawn lam planet dangah a fapa neih chhun Isua Krista a tirh thu kan hre lo. First choice kan ni. Chutiang hmangaihna, first choice nihna chu a ni kan Lal Isuan a phut! A sang ber leh thuk bera awm a duh mai zawk a ni.

 “Thil dang pawh kan hmangaih a ni thei, Mahse, Lal Isua kan hmangaihna hi Sang ber rawh se. Lalpa I pathian chu I thinlung zawng zawng in, I thlarau zawng zawng in, I rilru zawng zawngin I hmangaih tur a ni tih a nih kha”.

Tin, Pathian kan hmangaih let ve a, A lendun pui nih hi kan damna a ni. Pathian laka kan hran hun hun hi kan thih hun a ni mai.

 Pathian in sangha leh tui chhunga cheng chi a siam dawn khan Tui hnenah thu a sawi a, Thing leh hnim, ramsa chi hrang hrang a siam dawn khan Lei hnenah thu a sawi bawk. Anih leh mihring min siam dawn khan tu hnenah thu a sawi? Lei hmanga siam nimahila lei hnenah thu a sawi lo. Kan taksa 70% vel hi tui nimahsela tui hnenah thu a sawi chuang lo. “Kan anpuiin, keimahni ang takin mihring siam ila…”tiin Amah a in be thung.

Tui atangin Sangha hi la chhuak ila engtin nge a awm ang? A thi ang. Lei atangin thing hi a zung chawp in la chhuak ila, a thi ang. Chutiang chiah chuan Pathian hnena kan awm loh chuan ‘kan thi ang’ Mihring chu siam anih dan phungah Pathian zawm tlat tur, Pathian nena lengdun tura siam a ni

Tun dinhmunah a zawng zawnga hmangaih harsa kan la ti pawh a ni mai thei, Mahse, min hluihlawn ve ngailo tu Hmangaih Pathian chuan hmangaih ber ka duh vangin ‘Ka ngaina che’ tiin A mah ka au fan fan a, ka inkhawm ve hram hram thin a ni tih a hriat phawt chuan min pui em em ang. Pathian len dun pui ve thei tura Chhandamna kan chan theih nana A fapa meuh pawh ui lova min hmangaihtu chuan Pathian hmangaih duhna kan neih hi min tih hlawhtlin sak em em ang tih I ring tlat ang u.