I nun kha a hlu a sin!
I nun kha a hlu a sin!
Mapuia
Colney
Hei hi Rs
500 note ania, a duh zawng han ban phar teh u? (ka thlep a…) anih heti hian inla
duh tho em? (Lei ah ka dah a, ka rap a)
tunah chuan in duh tawhlo ang tiraw? Engvangin nge he Rs. 500 note ka hmeh
hrual hnu leh ka rah hrep hnu pawh in la duh cheu? Hlutna ala neih tlat vang a
ni. Engang paw’n chuar chhia in bal mahse Rs. 500 anihna kha a bo chuanglo, a
hlutna khan a kiam san chuanglo. Chuvangin, in la duh tlat reng a ni.
Rs, 500 note in hlutna anei ang chiah hian I NUN pawh khan hlutna
anei a sin. A hlut zia hria la.
Pathian pawh hian a ngaihlu a, a thlahthlam ngailo. “Pathian in khawvel a hmangaih em em a, chutichuan a fapa mal neih
chhun a pe a, tupawh a ring apiang an boralloh a, chatuana nunna anneih zawk
nan (John3:16)” Helaia khawvel atih hi Mihring a ni. “Tupawh a ring apiang”
a ti…kan chenna leilung hiana ring ve thei em? Theilo, nunna a neilo, anih
chuan tute nge ring thei chu – Mihring te hi kan ni. Pathianin a hmangaih em em
leh a rawn ngaihhlut chu Nangmah kha ani.
I hringnun kha lo chuar deuh mahse, hlutna anei. Ruihhlo avangin
lo bal deuh pawh nise, hlutna I nei. Lungngaihna leh beidawnna ten a hmeh zawr
hnep pawh nimahla I hlutna a bo chuanglo. Mi thenkhat nun beidawng, nun hlutna
nei tawh loh vanga mahni intihlum ka hriat hian pawi ka ti thin.
1. Engvangin nge hlutna kan neih?
Engvanga hlu nge ka nih?
Mihring tisa, ruhrel, thisen zam,
thluak leh taksa bung hrang hrang hnathawh dan felfai leh mak tak te hi a hlu
hrim hrim. Scientist te hian mihring ang maia hriatna nei leh che vel thei
intelligent Robot hi siam an tum reng, an bei mek bawk. Kum 2016 khan Hanson
Robotics, hongkong a awm chuan Sophia tih hming phuahin Robot an siam chhuak a,
alar khawp mai. Hmel lan dan chi hrang 50 a thiam a, interview te pawh anneih
pui nasa a ni. Mihring ang tura siam Robot ah chuan advance ber ani hial awm e.
Hanson Robotics a thawk David Chen chuan “Cheng tam tak man a ni” tih bak aman
zat a sawi theilo. Han ngaihtuah teh u, mihring tluk phaklo lutuk Robot pawh a
man sawi hleihtheih loh khawp a tam anih chuan mihring tluk deuh thaw siam
thiam ta se aman a va turu dawn em!!! Chuti anih chuan, I taksa ringawt pawh
kha aman zat chhut chhuah theih loh khawp a khawl ropui anih kha.
Chutihrualin, mi thenkhat chu mahni in ngaihlu takin, chapo takin
an hausakna leh an thiamna te an chhuang thin. Chu chu an hlutna emaw anti fo.
A nilo, sum leh pai chu sawiloh, thuamhnaw inbel tur nei miahlo Evi leh Adama
kha an hlu lutuk, Pathian paw’n tlai tin ride puia a sawm ngat zel te kha an
nia sin. (Tlai ni nem chuan huana Lalpa lo leng thawm chu an hria a,..Gen 3:8)
Engvang nge? “Pathian anpuia siam an nih vang a ni. Abak vak a awmlo, Pathian
anpuia siam kan ni a, keimahni ah hian Pathian anna a awm a , chu chu kan
hlutna a ni.
Kan taksa pianphung leh inrelbawl dan hrim hrim pawh khawvel thil
taka chhutin a hlut tawh tehlul nen, Pathian anpui a siam kan nihna nen phei hi
chuan a hlutna hi ngaihtuah phak piah lam a ni. A hlut zia hria a, a hlutna
anga tangkai taka hmang tur hi niawm tak kan ni a, mahse, mi tam tak chuan
‘Harsatna’ tih thumal hian kan nun hlu tak kan ti chhe thin, Ruihhlo vang a
harsatna in atih chhiat Nun hi a uiawm lutuk. Midangin kan nun hi a tih chhiat
hi I phal suh ang u.
2. Engtin nge harsatna karah nun
hlut zia kan hriat theih ang?
Harsatna kan tawh a in anglo ang
bawkin kan harsatna tawh dan pawh a dang thin. Mahse, keimahni tawka harsatna
nei vek, phurrit phur vek kan ni. Hei hi hringnun a ni, harsatna tawklo in a
awm theih loh, “Harsatna tawklo, rawngbawltu awm maw?” tih a nih kha. Kan nunah
harsatna alo thleng a, alo la thleng zel dawn… ruihhlo vang te, ngaihzawng vang
te, chhungkua vang te in… kan nun hi rit kan ti thin ani tiru? ‘ka tuar thei tawhlo, ka chhe vek tawh, beisei ka
nei tawhlo’ kan ti thin em? Kan status ah te hian hrehawm kan tih thu kan va
sawi nasa thin tak emmm? Kha harsatna kha a nasa tual tual niin kan hria a, rit
kan ti telh telh a, mi tam tak phei chu beidawngin an intihlum thin. Anih loh
paw’n kha harsatna lak atang khan tal chhuak thei tawhlo niin kan in hria a,
kan nun hi chhe vek tawh niin kan ngai a, atawpah chuan harsatna in min hneh
hlen zui mai thin.
Hei tunah
hian thil pakhat ka keng a, a ritlo a, ka zo nelh nelh khawp mai. Mahse, heti
hian keng reng ta ila, darkar khat hnu ah enge lo thleng ang? A tir a zang ka
tih em em kha alo rit em em tawh dawn a ni. Ka thil ken hi a a rit telh telh
tihna ani em? Nilo ! ka thil ken hi ka ken tirh a a rih zawng ang tho kha ala
ni, mahse, engvangin nge rit ka tih tak em em si? Thil dang vak a nilo, ken dan
ngai renga ka ken mai vang zawk a ni. He tiang ang hi kan harsatna tawh dan ani
tlangpui a, chuti anih chuan engvangin nge ban kham chung chungin ka ken?Engvang
nge ka dah thlak mai loh, ka paih bo mailoh? Ka dah thla thei hrihlo anih paw’n
engvang nge heti zawng a ka ken dan ka sawn mai loh? Heti zawng te hian ken dan
han thlak kual ila, anih loh paw’n ak tha daih ila…ban kham ngawih ngawih chu
ka pumpelh mai tur a ni si a.
Engtin nge Lal Isuan a tih, “Nangni thawkrim leh phurrit phur zawng zawng
te u, ka hnenah lo kal ula, keiman ka lo chawlh tir ang che u…engmah phurh a
ngailo, tikhan hahdam takin awm ula, engmah phur tawh suh u….a tilo, ka
nghawngkawl hi bat rawh u’ ati. Pathian hian harsatna tawk theilo a min
siam a tumlo, kan hringnun zin kawng hi National Highway, four lane hlira min
thlak sak a tumlo, kan CM zahawm angin a pawnglai min nem per sak a tumlo. A
chang chuan fur laia Sialhau kal ang kan ni anga, kawng laka han tan phat phat
tum te, midangin min nem chhuahpui atul hial chang te pawh a awm ang, mahse
enge pawi? Berh lei luai leh hah hnep pawn awm ila, sialhau khua kan thlen
theih phawt chuan kan tum kan hlen tihna ani mai lawmi? Khua kan luh hnu ah kan
in silfai anga, kan awm hahdam leh anga, nuamsa leh fai taka thleng te nen khan
kan in ang leh reng, sialhau khua thleng theuh theuh!
Harsatna kan tawh hi Pathianin a phal, mahse, harsatna dawnsawn
dan tur erawh min zirtir a ni, nghawngkawl thar min pek a tum a, phurh dan chi
danga phur turin min ti mai zawk a ni. Harsatna ti harsa-tu chu I harsatna kha
anilo, nangmah zawk kha ani. Kan hrethiam em?
Tum
khat chu Puithiam pahnih hi an zin dun a, lui pakhat an thlen chuan nula pakhat
hi an hmu a, lui a daikai ngam loh avangin nula chuan tanpuitu alo nghak chawt
mai ani. Chutah, puithiam pakhat chuan eng khaw sawi set set lovin a paw lawk
a, lui kam leh lam chu a kaipui ta mai a, a thianpa erawh chuan ngawi rengin a
rawn zui a…tichuan, an zin kawng chu an chhunzawm dun leh ta a. Mahse, a khat
tawk hian a thianpa zawk chuan, “Puithiam te chuan nula kan khawih thianglo a
sin mawle” hi a rawn tileh thin a, atawp ah chuan Puithiam pakhat chuan,
“Thianpa, ka nula puak kha kei chuan luikam lehlam ka dah daih tawh a, nang
zawk hian tun thlengin i la paw zawk a nih hi” ati a.
Tin, kan harsatna tawh ai hian kan Pathian hi a lian zawk. Thlipui
leh tui fawn in a len phar lawp lawp Lawnga chuang te khan an harsatna tawh kha
an hmu lian em em a, thihpui tham niin an hria a, an mangang a ni. Mahse, an
aia lian zawk LalIsua a rawn dinchhuah meuh kha chuan thlipui leh tuifawn te
pawh an awm hle hle anih kha.
Conclusion: I nun ah
khan harsatna lian tak I hmachhawn mek ani mai thei, anih loh paw’n ila
hmachhawn dawn chauh ani mahna,…harsatna cho vang nilovin hei hi hringnun ani
tih pawm la ka duh a ni. Harsatna eng anga lian pawh tawk mahla, I Pathian biak
kha alian zawk, eng anga nasa pawh nimahse, I nun kha a hlu zawk. Hringnun hi a
fair-lo tih chang inei ve thin em? Harsatna tawk nasa bik, vanduai bik niin I
in hre thin em? Chutiang mi nia I inhria anih chuan heti zawng hian lo
ngaihtuah ve the:- Pathian hian I chak zia a hria a, I theihna a hmu a, midang
te aia nasa Harsatna phur thei niin a ngai che tihna a nih chu…a ringtawk che
ani. Kha harsatna kha Hringnun hlut zia rawn remind tu che ani a, I in ngaihlu
lutuk tur vengtu pawh a ni. I paltlang anih phawt chuan khatiang harsatna tawk
ve te tan Pathian aiawh a anmahni pui thei tu, Qualified Christian ini tihna ani
Comments
Post a Comment