KTP vrs Gideon-a

KTP vrs Gideon-a

Date 8^th Oct 2018 (KTP Inkhawm zan sermon)

Gideon-a chanchin hi Bible bung dangah kan hmulo hle a, a hming awmzia hi “(Thing) kittu” tihna a ni. A mah hi Israel hnam zing a te tak, Manasea thlahte zing a mi a ni a, mi chapo lo tak a ni.  A hun lai hian Israel ten Lal an la neilo a, an bul vel a hnam dang, Philistia, Median ten an awp kual vel mai mai a ni.

            Gideon-a hi Roreltu Lian (Major Judge) antih te zing a mi a ni a, amah a vang hian Israel hnam ten kum 40 vel lai ralmuang takin an awm theih phah a. Gideon-a chanchin a tang hian Pathian hnathawh ropui tak kan hmu a, thil chhinchhiah tlak tak chu Pathian hian hna a thawh dawnin mihring thahnem tak a mamawh lemlo, Pathian hnathawh hi ‘haw haw’ a nawr chhuah chi a nilo tih a chiang viau awm e.

Gideon-a kaltlang a Pathian hnathawh dan:

            Israel ten thil sual an tih apiangin Pathian hremna kan hmu nghal zat zel a, tun tum ah pawh hian Pathian duh loh zawng antih avangin kum 7 chhung Midian-ho kutah an awm a. Midian ho hian an tiduhdah viau aniang, Israel fate chuan pukah te awm hmun an khuar hial a, an thlai leh buh, ranvulh te pawh median ho hian an chhuhsak fo thin a ni awm e. Gideon-a leh vantirhkoh an intawn tum pawh hian Uain sawrkhur ah Midian ho hmuh loh turin buh alo chil a ni. Pathian in median ho te lak a chhanchhuahna thu a hrilh hma a thil langsar tak pakhat lo lang chu ‘Israel te chu an rethei ta em em a, Pathian an au va’ tih a ni. Pathian hian a mah au tute chu ava chhang chiang thin em!!!

            Tichuan, Lalpa vantirhkoh leh Gideon-a chu an in tawng ta a, Vantirhkoh chuan Israel fate chhanchhuak tu tur a nih thu a hrilh a. Mahse, Gideon-a hian inngaitlawm takin Israel hnam zingah pawh hnam te tak, chhungkua ang pawh a pachhe ber annih thu in a chhang a. Hemi vangte pawh hi a ni mahna, Midian ho te, Amalek ho te leh thlaler a cheng ho te bei tur a akal hma paw’n tum hnih lai Pathian hi fiahna a dil a ni. Mumang lam a hriattirna a dawn angin Gideon-a chuan an khua a Baal biakna maicham te chu a tichhia a, an thingserh te pawh a sat thlu bawk a. Hei hian a Israel-te kha an mahni awp bettu Midian-ho (Baal betute) lakah an hel ta ani tih a entir a ni. He thu anlo hriat chuan Midian-ho te, Amalek-ho te, leh khalai thlaler a cheng ve hnam dangte kha Israel te bei turin anlo thawk chhuak a, Jezreel ruam ah an inkulh ta mup mup mai a. Heta inkulh te hi a ni Pathian in bei tur a Gideon-a a hrilh ni.

            Pathian thu ang zelin Gideon-a chuan Israel hnam hrang hrang te kha a chahkhawm a, Midian ho ep turin tanhmun an lo rem ve ta a. Mahse Pathian ‘tam’ ati tlat. “I mite hi an tam emai, in kut a Midian ho ka pek chuan, Israel te hian  min uankhum dah ange, anmahni hneh emaw an ti mai anga sin…” tiin a hrilh a, tichuan, mi 22000 an haw a, 10000 chauh an awm ta. Midian ho, sing tam rual, bei tur chuan an tlem ta khawp mai. Mahse, Pathian ala duhtawklo cheu! Gideon-a hnenah “mi ala tam lutuk fo..” ala ti. Tichuan, Gideon-a chuan mi 300 chauh a thlang chhuak ta a, Pathian paw’n ‘a tawk chauh’ ati ta aniang, a sawi belh talo.

            Pathian in a pek tawh annih miau avangin Gideon-a hoten Midian an zuk bei chu a awlsam khawp mai a, an kut lehlamin meichher an chhi a, lehlamin tawtawrawt an lek a, “Khandaih chu, Lalpa leh Gideon-a tan” ti a au vin tawtawrawt an ham a, an hneh fel der mai.

Pathian in hna athawh hian mi tam tak a mamawh kherlo

            Mihringte hian hna kan thawhna ah chuan tha tam tak kan mamawh a, thawktu an tam poh leh hna a sawt thin. Ram venhimna kawng a khawvel ram hrang hrang te chak leh chak loh tehna pakhat pawh sipai an ngah em? tih a ni thin. Mahse, awmlo ata awm a din theitu, ‘lo awm rawh se’ tih tawngkam ringawt hmang a hna pawh thawk theitu kan Pathian hi chuan thil ropui tak a tih nan hian mi tam tak hi a mamawh ve em em lo a ni. Khawvel a sermon hlawhtling ber leh Pathian hnen a inlamlet tamna ber thlentu hmanrua pawh kha mi pakhat ‘Jona’ ve mai chauh kha a ni. Chuvangin, Pathian rawngbawltute hi tlemte kan nih paw’n zam tur kan nilo e.

            Tunlai chu KTP lam a kan rawngbawlna ah mi kan tlem thei khawp mai a, fellowship, inkhawm leh thil dang dang ah pawh ‘kan tlem thu’ hi thil langsar berte zing a mi a ni. Mahse, hemi a vang a zam tur kan nilo, Gideon-a Pathian hi vawiin a kan biak Pathian, hna ropui tak thawk tur a mi tlemte mamawh tu kha a ni. Rawngbawlna ah hian tam chu a tha, duhthusam pawh a ni mah zawk mai thei. Mahse, Pathian hnathawhna turah erawh Number hian kawngro a su ve lo. Chuvangin, KTP active member te hi a number zawng a kan lo tlem a nih paw’n zamlo ang u. Mahse, Gideon-a ang hian Pathian duhdan in kan kal em? tih hi kan in enletna tur zawk a ni. Zanin ah hian kan rawngbawlna ki zawng zawng hi enlet ila, kan committee thurel te, KTP a kan thiltih zawng zawng hi….number ah buailo in Pathian thu angin kan kal em? Kha programme kan hman kha Pathian hriatpui a ni em? Pathian remruat niin kan hria em? Tiin I in zawt zawk ang u.

Tihtur kan nei

             Chuvangin zanin atang chuan kan rilru put hmang pawh kan thlak angai mai thei a ni. KTP ah tlemte in hman tur ka tihna anilo a nia, active member tlemte nih hi a tha zawk ka tihna phei chu a nilo leh zual. Zanin a rawn inkhawm, member pum huap ngaihtuah a tlemte te hian rilru thar kan hman angai a ni. Gideon-a khan mi tam tak a chahkhawm a, Pathian hming a thil ropui tak tih a tum. Mahse, Pathian in kha thil kha ti ta se, Amah Pathian thiltih nilovin, anmahni theihna vang, an tam hneh ve hrim hrim vangah an ngai ang tih kha a hlau si a ni.

            Member kan tam vanglai, hla zir pawh 60 chuang chuang kan nih lai, activity hrang hrang pawh kan tih mup mup lai kha chuan hruaitu nih pawh a nuam a, keimahni vang a rawn inhmang emaw tih te pawh awl tak tur a ni. Mahse, a nilo, an rilru a thawktu, phurna leh hun remchang petu Pathian vang chauh kha a ni. Tun a kan dinhmunah pawh hruaitute dem mai hi a awl viau ta ve ang, mahse, a ni chuanglo. Zanin a rawn inkhawm te zawng zawng hian mawhphurhna kan neih vang mai chauh a ni.

            Chuvangin, zanin atang chuan ngaihtuahna thar i seng ila, ‘keini mi tlemte te hian engtin nge Pathian hming a thil ropui tak kan tih ve theih ang? Gideon-a leh a hote, mi 300 lek in Midian- ho mi sing tel kha, meichher leh tawtawrawt mai mai hmang a, Pathian in a hneh tir a nih si chuan, Gideon-a angin Pathian duhdan ang zel a kan kal chuan, member tam tak, Pathian ngaihsak lemlo te hi kan la hneh ve ngei ang. Chutihrual erawh chuan, kan programme leh activity hrang hrang te hi, Gideon-a te ang khan ‘He programme/activity hi Lalpa tan’ tiin kan aupui ve thei em?

            A tawp ber ah chuan KTP programme a chanvo neitute reng reng hian, member te hma a kan va dinchhuah a, kan tihtur ang kan va tlak satliah ringawt hi a tawk talo…Pathian aw ngaichang ila, kan thiltih kha ‘Pathian tan’ ni tawh rawh se. Pathian ropuina atan a kan tih a nih phawt chuan, hmanrua tlawm tak pawh hmang ila, chunglam khian thil ropui tihnan a hmang tho tho ang.