Pathian Hnaih

 Pathian Hnaih

Sam 24:3 – 6; 73:27-28; Jakoba 4:7&8

            Tum khat chu Mipa naupang pakhat hian apa hnenah Pathian len zawng a zawt a. A pa chuan eng danga chhang ta lo chuan, “Bawiha, khi ta Thlawhtheihna thlawk mek khi eng tiat nge?” a ti a, “Heti tiat hi” tiin a fapa chuan a kut zungtang inkar zim te lai chu a pa a hmuh va va a. Tichuan, a pa chuan Thlawhtheihna tumhmun ah a hruai a, thlawhtheihna bul an thlen chuan. “Bawiha, thlawhtheihna chu eng tiat nge le?” tiin a zawt leh a, a fapa chuan lian a ti lutuk a, a pa pawh chu chhan ngaihna a hre ta lo a ni. A pa chuan. “Bawiha, Pathian hlata awm tan chuan Pathian chu te tak te angin an hmu ang a, mahse, a hnaiha  awm chuan Pathian len zia leh thiltihtheih zia an hmu ang” tiin a hrilhfiah ta a ni.

Pathian Hnaih: Pathian hnaih awmzia hi sawifiah duah ngailo in a chiang viau awm e. A tawngbul lamah pawh Hnaih awmzia chu ‘va kal hnai, hmachhawn, an thusawi hre pha tura va pan’ sawi na a ni a. Juda ho chuan Pathian laka awm hrang leh a mawlsawmna pawh dawng pha tawhlo sawina opposite atan an hmang thin. Tin, Thuthlung Hlui lamah chuan puithiamten Lalpa rawng an bawl dawna maicham an va hnaih sawi nan an hmang bawk.

Pathian Hnaihtute nundan:

            Pathian hnaih chungchang Jakoba sawi dan leh Davida fakna hla Sam 24 a kan hmuh hi a in zul khawp mai. Chuvangin, heng atang bik hian sawi ila.

Davida hian Lalpa tlanga chho tur leh a hmun thianghlima ding thei tur qualification a sawi chu – Kut fai leh thinlung thianghlim, milem belo leh mi bum tuma chhechham ngailo a ni. Jakoba pawh hian Pathian hnaih chungchang ah Kutsil fai, thinlung thianghlim a rawn sawi ve chiah bawk.

Kut fai: Judate hian an chaw ei dawn in kut an sil ngei ngei thin. Puithiam ten Maicham hmaa thil hlan an hlan dawn hma in an kut leh ke an silfai bawk thin. Pawn lam hmuh theih thianghlimna a ngaih a ni. Isaiah 1:15-16 ah chuan “in kutte chu thisen in a khat si, in sil ula, intifai rawh u;…. Sual tih hi bang tawh ula” a ti.

            Mihring ten atak ngeia thil kan tiha kan hman rim ber chu kan kut hi a ni. Bible in ‘kut’ a tih hian Mihring thiltih (action) a sawina (representation) a ni fo. Chuvangin, Kut fai/ kut silfai tih hian lang theia Pathian duh loh zawng sual, hmuh theiha thil sual lakah fihlim tura min tihna a ni.

Thinlung thianghlim: Lal Isua chuan, “Thinlunga thianghlimte chu an eng a thawl e, Pathian an la hmu dâwn si a,” (Mat. 5:8) tiin a sawi a. ‘Thinlunga thianghlim’ tih chu thinlung sakhat, ngaihtuahna sakhat, tihna a ni ber awm e. Rilru hlawm khat, ngaihtuahna sakhat hmanga Pathian pawl thînte chuan Pathian ropuizia leh a thianghlimziate an hmu thar zel a, Pathian anga thianghlim zual zel an duh thîn. Thinlung hi mihringte nun kaihruaitu a ni a. Thinlung bawlhhlawhte tân thianghlim taka nun a harsa a. Mahse, Thlarau Thianghlim chuan mite thinlung tidanglamin, thinlung thar a siamsak thei.

Pathian kan hnaih em?

            Pathian hi hmun tin luah, khawikipa awm a ni. Hmuh theih loh leh hmuh phak loh a neilo a, hriat theih loh a nei hek lo. Chuvangin, Pathian hi chu a hlat zawk a rinawm loh va,  Pathian hi hla viau a kan ngaih chuan keimahni zawk hi Pathian lakah kan hla tihna ani zawk fo.

            A chunga kan sawi Pathian hnaih tute quality neih pahnih Kut fai, thinlung thianghlim pu mi kan ni em? KTP huanga rawngbawlna ah chuan kan ti ho dual dual a, kan inhlim chhuah a, active taka kan tel chuan ‘Pathian hnaih’ emaw intih a awl fo thin. Mahse, KTP a tel te, Kohhrana in hman te hi Pathian hnaihtute tihtur chauh a ni zawk. Dik tak chuan Pathian hnaih tak tak silovin a in hman viau theih a nia. Kut bal chung hian hruaitu a nih theih, Rilru bawlhlawh ru tak chungin Zaipawl ah kan tel thei tho, a inkhawm kim ve thap thap theih tho a sin!

            KTP activity hrang hranga tel hi kan hnual suat a nilo. Mahse, KTP ah theihtawp chhuah ve anga in ngai si, Pathian hnaih tak tak silo, a phaw vuak leh rual pawl nana tel, Lalpa tlang lawn chhuak lo tawk vel hian kan awm ang tih ka hlau a ni.

Pathian I hnaih ang u: Kan awm dan chu eng pawh lo ni rawh se, mahni theuh in enlet ila, Kut sil a ngaih chuan huaisen takin sil ngam ila, rilru thianghlim pu turin in ngaitlawm ila, Pathiana rinna mumal  pu lo kan nih pawh in Thlarau Thianghlim hnenah tawngtai in I dil ang u.

Pathian in sangha leh tui chhunga cheng chi a siam dawn khan Tui hnenah thu a sawi a, Thing leh hnim, ramsa chi hrang hrang a siam dawn khan Lei hnenah thu a sawi bawk. Anih leh mihring min siam dawn khan tu hnenah thu a sawi? “Kan anpuiin, keimahni ang takin mihring siam ila…”tiin Amah a in be thung. Lei hmanga siam nimahila lei hnenah thu a sawi lo. Tui atangin Sangha hi la chhuak ila engtin nge a awm ang? A thi ang. Lei atangin thing hi a zung chawp in la chhuak ila, a thi ang. Chutiang chiah chuan Pathian hnena kan awm loh chuan ‘kan thi ang’ Mihring chu siam anih dan phungah Pathian zawm tlat tur, Pathian hnaih tlat tura siam a ni.

            Lal Isuan Grep hrui tak nen a intehkhin tum pawh khan eng tin nge a tih kha? “Mi keimaha a awm reng loh chuan, peng atanga paih chhuah in a awm thin, a vuai a…, mei ah an paih thin…”

Conclusion: Sam ziak tu ‘Kei atan zawng Pathian hnaih hi a tha a ni’ titu nun kha kan hria em? Pathian hnaih lo tute dinhmun a en a, an tukverh atangin khawvel a thlir ve khan chuan a awt a ni. An hausa a, an vannei thei em em lehnghal. Khawvel kha chen bik in a hria a ni. Tin, nuam sa takin an khawsa a, an chapo em em bawk. Sum leh pai ah an buai lo a, an mit it zawng an hlah lo. Khawvel kha a nawm hmel bik a ni, Chuvangin, Sam ziak tu Asapha pawh hian Kut fai nih reng bik te, thinlung thianghlim put leh Pathian rin tlat te kha harsa a ti fo thin. Anmahni anga awm ve mai te kha a tum thut thut thin a nih hmel, “Ka rap pelh thelh thelh a, ka ke pen te hi a tleu lek lek thin” a ti.

            Sam ziaktu sawi angin Pathian hnaih lo tute hian Sum leh pai an ngaina a, measuring tape angah ngaiin thil zawng zawng teh nan an hmang a, khawvel hlimhlawp bawlna kha nundan turah an ngai tihna a ni ber.

Tangka sum ngainat hi sual tinreng bul a ni (1 Tim.6:10) tih te hi kan va sawi khat ta ve ! Pathian min hnaih loh tir tu langsar ber a sin. Eng vangin nge corruption a hluar? Ruihhlo zuar an tam? Engah mah hian kan rinawm theih tak loh? Dik taka sawi chuan sual kan tih zawng zawng deuh thaw hi sum leh pai duhna, duhamna vang ani deuh zel.

Gold digger awmzia kan hria em? A mihring duh tak tak silo a an sum leh pai vanga va ngaihzawn der emaw nupui/pasal atana neih hi a ni. Pathian hnaih duh tak tak silo a ‘Mal min sawm rawh’ tih fo te hi Kristian Gold digger nihna a ni. Tunlai khawvel ah KTP/Kohhran kan fimkhur  a ngai. Pathian lama kan hlim hleih theih tawh loh chhan te hi sum leh pai kan duh lutuk vang ani em? Pathian hnaih tura va sawm aia an sum va khawn kan ngaih pawimawh zawk chuan KTP/Kohhran pawh hi a ro telh telh ang a, rawngbawltu tha teh nan kan la hmang thuai bawk ang.

            Hawh u, Pathian hnaih turin Kut silfai ila, Thinlung thianghlim kan put theih nan Pathian hnenah tih tak zet in inhlan thar leh ang u.